بقلم / صموئيل نبيل
– بس فيه ناس لفتها فى الحياه على الطريق الدائرى
سكة سالكة و وبيوصل لكل مكان و عليه اكتر البشر
بس سِكتة طوييييلة و وحشة
تجرى فيها بين عربيات و ناس ما تعرفكش ولا تعرفها
ولو حصلت لك حاجة مش هتلاقى حد يسندك
– و فيه ناس لفتها على الاوتوستراد- طريق المطار
شوارع مسفلتة و ناس رايقة وطريق آخره المطار ومنه تسافر بره البلد
– وناس لفتها فى الزراعى
مطبات و شبورة بس تمشى بين جمال الخضرة و الناس الطيبة
لما تتزنق الف مين يساعدك و ما تحس انك وحيد حتى لو مسافر لوحدك
* اللى ماشيين على الزراعى يحدسوا اللى على الدائرى و يقولوا يا بختهم سكه سالكة و طريق مفتوح يؤدى لكل مكان و مش شايفين قد ايه هما تعبانين من السكة الطويلة و الاحساس بالوحدة
المزيد من المشاركات
و اللى ماشى على الاوتوستراد يحسد الناس اللى ماشيين على الزراعى على جمال المنظر و يفتكر اغنيه عبد الوهاب( محلاها عيشة الفلاح ) و يقول يا بختهم عايشين فى هدوء و راحة بال . ومش دارى بتعبهم و الشمس اللى بتضرب فيهم طول النهار
و اللى على الدائرى بيحسد الاثنين من كتر الحوادث اللى بيشوفها على الطريق و انه عارف انه وحيد لو حصلت مشكله محدش هيساعدة
…صورة مصغرة للحياة
لا تحسد شخص علي حاله
. لو شايف شخص حياته سالكة و ماشي بسرعه و ناجح… افتكر أن معظم الوقت هو وحيد و في حياته خوف زى الدائرى لأن دى ضريبة النجاح ..أنك لازم تشتغل 24 ساعه و مافيش وقت ل ال الأصحاب و ل العيله…
و لو قابلت شخص حياته مليانه أصدقاء و حبايب.. . افتكر انه زى الطريق الزراعى حياته مليانة مطبات و من كتر المطبات التى واجهها فى حياته عِرف ازاى يساعد الناس و يكون معاهم .
أما بتوع الاوتوستراد . موجودين في الافلام و المسلسلات بس لأنه للأسف الحياه دايما مش كاملة
..محدش عاجبه حياته
معلش لففتكوا معاي …