بيفكر بالصينى..بقلم : رانيا كمال العربي
_مامي انا عرفت هشتغل ايه لمااكبر
_ايه يا فروحه
_هشتغل باحثثثه
_باحثه عن ايه يا حبيبتي
_ههه باحثه يا مامي
_ ازاي ده انا لما بقولك ابحثي لي عن اي حاجه مش بتعرفي ده انتي الحاجه بتبقي قدامك ومتخديش بالك وتيجي تقوليلي. مش موجوده
ده انا اللي طول النهار ابحث وادور لك علي حاجتك قال باحثه قال. طيب روحي ابحثي لي عن نظاره بابي
بعد خمس دقايق
_ دورت كتير اوى ومش لاقياها
_ دى قدام عينك اهى عالترابيزة!!
وتقولى باحثة!!
نيوتن وقعت عليها تفاحه اكتشف قانون الجاذبية الارضية
وانتى لو وقت عليكى تفاحة هتاكليها
_ لا انا بحب الموز مش بحب التفاح
_ الواد الصينى المفعوص عنده ١٣ سنة يعنى اكبر منك بسنتين ووقف الفيسبوك بوك فى العالم كله
وانتى مش عارفة تلاقى نظارة بابى!!
_ يارب يقفل الزووم كمان عشان عندى امتحان ماث بكرة
_ اه صحيح تعالى اديكى شوية مسائل
_ طب مامى ممكن العب عالتاب شويه قبل ماتدينى المسائل
_ لا بقولك ايه مفيش لعب قبل ماتخترعى لى اى حاجة النهاردة
او توقفى لى الواتس اب او اليوتيوب او توقف لى برامج اللعب اللى بتلعبوها طول النهار دى عشان نرتاح خالص
_ يامامى ده بيفكر بالصينى
_ مليش دعوة اتصرفى وعرفيهم ان التفكير المصرى اجمد
_ عندى حل اسهل يامامى
_ ايه ياحبيبتى؟
_ اقفلى الرواتر
التعليقات مغلقة.