تامر حسنى يكشف أسرار دخوله المستشفي ومذاكرته للسائق .. يظهر للمره الأولي
كتب: هاني سليم
بعد طرح ألبومه الجديد “لينا معاد” وتحقيقه صدى واسع على مواقع التواصل الاجتماعي وتصدره قوائم التريند، خرج النجم تامر حسني عن صمته ليكشف كواليس رحلة الألبوم، والتحديات التي واجهها حتى يرى النور، مؤكداً أنه تعب بشكل غير طبيعي ووصل به الأمر لدخول المستشفى في منتصف العام، في الوقت الذي فضل فيه عدم الإعلان عن هذه المعاناة في حينها.
النجاح بعد التعب
تامر بدأ حديثه عبر حسابه الرسمي على إنستجرام برسالة لجمهوره قال فيها:
«عايز أستغل اللحظة الحلوة دي، إن أغنية الذوق العالي مع حبيبي وأسطورة الغناء الكينج محمد منير بقت تريند عام رقم واحد من أول يوم، ولسه باقي الأغاني من ألبومي لينا معاد في التريند».
وتابع قائلاً: «عايز أقولكم حاجة مهمة.. علشان أوصل للحظة دي كان لازم أمشي طريق صعب. كنت بقرأ كل التعليقات السلبية قبل الإيجابية، لأنّي عارف إنكم بتحبوني وعايزيني دايمًا أحسن، وده خلاني أركز وأتحدى نفسي. احترمت كل الذكريات اللي ارتبطت بأغانيّ القديمة، وقررت أديكم حاجة مختلفة تليق بيكم، وصدقوني تعبت تعب مش طبيعي».
رحلة من المستشفى إلى الاستوديو
كشف تامر لأول مرة أنه تعرض لوعكة صحية قوية خلال العام الماضي:
«وصلت لمرحلة دخلت فيها المستشفى نص السنة ومبحبش أتكلم عن الحاجات دي، لكن عشان تعرفوا قد إيه تعبت في الشغل ده. كان عندي هدف واحد: أعمل ألبوم يفرّحكم ويخلّيني واجهة فنية جميلة لبلدي مصر وأنا بمثلها قدام العالم».
تحدي “عيش بشوقك”
تامر حسني أكد أنه كان في تحدي كبير مع نفسه لتقديم عمل يتجاوز نجاح ألبومه السابق:
«عارف قد إيه بتحبوا ألبوم عيش بشوقك، علشان كده كان لازم أشتغل أكتر وأتحدى نفسي. فضلت أذاكر السوق الغنائي سنتين، وأتابع التغيرات في أنماط الموسيقى، مع احترامي لكل الألوان والفنانين اللي نجحوا فيها».
سنتان من الإعداد والتطوير
عن مراحل تنفيذ الألبوم قال:
«قضيت سنتين في الاستوديو، بشتغل مع مهندسين صوت وموزعين وملحنين كبار، وأحيانًا كنت أغيّر وأعيد في الأغنية أكتر من مرة لدرجة إن الناس زعلت مني، لكن كنت مصمم إن الألبوم يطلع على أعلى مستوى، وده اللي فرحني النهارده لما سمعت كلمات الإشادة منكم ومن كل فريق العمل».
رسالة حب للجمهور
واختتم تامر حديثه برسالة مؤثرة لجمهوره:
«متشكر من قلبي لكل حد نصحني أو انتقدني بحب. أنا تعبت عشانكم، وعشان أرفع اسم مصر في العالم. بحبكم من قلبي».
