تامر عطوه يكتب : فوائد الكورونا ال19
مؤكد ان العالم كله يعيش الأن في حالة ذعر وهلع من خطر الاصابة بالكورونا . فيروس فتاك بيهاجم الرئة والعدوى بتاعته من أسهل ما يمكن لدرجة ان الناس افتكرت ان العدوى ممكن تيجي بالايحاء والتفكير فيه
لكن الغريب ان لاقيت له شوية فوائد
وتعالو كدة نشوفها مع بعض بالراحة ومن غير عصبية
1- انخفاض نسبة التلوث للثلث تقريبا….
عشان معظم الناس في البيوت فمشاوير السيارات والمواصلات قلت جدا وبالتالي التلوث البيئي قل جدا في الشوراع لدرجة ان بقى فيه نسمات هوا عليلة زي زمان حتى التلوث السمعي تقريبا انتهى من الشارع
2-جمع شمل الأسرة من تاني ………
من بعد غلق القهاوي والكافيهات والمولات واماكن التجمع رجعت الأسرة تشوف بعضها تاني ممكن يكون الامر ممل في الاول لكن التفاعل الاسري حلو مافيش كلام كمان التعاون بينهم هيكون في اعلى درجاته .. رجعت الاسرة تجتمع على سفرة او طبلية واحدة
3- الغاء الدروس الخصوصية
فائدة أخرى عظيمة للكورونا ان قضت فعلا على مافيا الدورس الخصوصية اللى ضيعت هيبة المدرس وحولته لمندوب مبيعات من بيت لبيت ومن سنتر لسنتر وبقت الدراسة اولاين واللى عاوز يتعلم هيتعلم مش ياخد العلم بالمعلقة وبتكلفة ارهقت البيت المصري جدا ورحمت الاسرة من شوية رفاهية حقيقية بسبب فلوس الدروس الخصوصية المسعورة
4- انخفاض الاستهلاك والطلب على أكل الشارع والمطاعم
الناس بقت بتعمل الأكل في البيت وشوية شوية هينتشر نظام الاكل الصحي عشان يرفع مناعة الناس وهترجع الام تهتم بتغذيةاسرتها بطريقة صحية وسليمة وهترجع السبانخ والكوسة والقلقاس والشربة والخضار والسلطة الخضرا بتاعة زمان مش تقوللى اكل محمر في الزيت ومليان دهون وقرف
5-اختفاء المنازعات الدولية والحروب الصغيرة بين الدول
الدول دلوقتي مش فاضية للاهداف السياسية والاقتصادية بقدر اهتمامها باحتواء العدوى والاصابات وممكن تلاقي دول بتساعد دول تانية بالمعدات والخبرات والامصال والادوية ..يعني ممكن تلاقي مصر بتساعد تركيا مثلا والقطر بتساعد السعودية وهكذا
6-اختفاء المشاهير عديمي القيمة واللي كانو مصدعينا بأخبارهم
يعني مابقيناش نشوف سما المصري ولا بتوع المهرجانات ولا مين عمل ايه ولا مين شتم مين ولا مرتضى منصور ولا البلاوي دي اللى شوهت اخلاقنا وخليتنا شوية شراشيح عشان بنتأثر بيهم وبنشوفهم طول الوقت كله التزم الصمت واترعب عشان خايف على عمره وعرفنا قيمهم الحقيقية اللى هيا اصلا تحت الصفر بنقطتين
7-اختفاء حلم السفر لاوروبا وأمريكا ودبي
بعد ما كان حلم الشينجل والسفر والهجرة غير الشرعية مالية دماغ الشباب دلوقتي كله عرف ان مصير الكوكب واحد وانه يفضل يموت في بلده احسن ما يموت في الغربة اللى كلها بقت مصابة ومرعوبة ومش عارفة تشيل نفسها (فرنسا والمانيا وطبعا ايطاليا الغلبانة)
8-العودة للعبادة والدعوات والتواصل الروحي بين الناس والله
طبعا لا يخفى عليكم ان كلام الناس دلوقتي بقى مليان بالقيم الروحية العظمى وذكر الله والرب دون التواصل مع الشيوخ والقساوسة عشان العبادة , كله بيعبد ربه بينه وبين نفسه وبمنتهى الاخلاص حتى غلق الجوامع والكنائس قلل من العنصرية وبقت الناس كلها بتعبد الرب الحقيقي مش رب الطقوس والجدران المزركشة لا بقت العبادة عبادة قلوب وارواح وكله بيناجي ربه من قلبه مش من الجوامع والكنايس
9-اختفاء الخصومات وبوستات التلقيح بالكلام والذي منه
اي واحد هيتنمر او هيلقح بالكلام على اي حد تاني محدش هيعبرو ولا هيهتم بيه لان الناس مشغولة بعمرها وسلامتها مش بالفضايح والاسكرين شوت اللى كان طاغي على وسائل التواصل الاجتماعي بالعكس الناس هتحس بتفاهة اى حد هيلقح او يستعرض حياته وامتيازاته وشهرته وهينسوه فعلا
10-اختفاء المعارضة السلبية
صحيح ان المعارضة مهمة في كل البلاد لكن حتى المعارضة الخارجية بقى صوتها واهي جدا لان الناس يهمها دلوقتي استقرار الاوضاع اكتر ما يهمها مين يحكم ومين يتحاكم وبقت الناس هيا اللى بتحكم على اداء الحكومة بطريقة مباشرة وعلنية من غير هبد سياسي ولا دياولو , بقت الناس على تواصل صريخ مع البلد ومش محتاجين حد يقولنا ولا يريسنا على الفولة احنا بقينا فاهمين كل حاجة
11- النظافة العامة والشخصية
طبعا دي مش عايزة تعقيب لأن الكل بقى عارف ان النظافة القصوى بقت من ضرروات الحياة فبنلاقي الناس بيتطهرو وبيبالغو جدا كمان فيها لدجة ان فيه ناس قربت تبوش زي الصابونة من كتر ماهي هارية نفسها تعقيم
12-اختفاء العلاقات المشبوهة والدعارة
طبعا محدش هيغامر بعمره في علاقات متعددة الاطراف زي علاقات الدعارة المدفوعة وما الى ذلك من الصفقات الجنسية اللى وصلت لدرجة علنية في الايام الاخيرة
13-كسر قواعد الشركات الكبيرة والبراندات المبالغ فيها
يعني دلوقتي انت مش مهم عندك تاكل في بيتزا هت وكنتاكي ولا يهمك ان تلبس الكوتش اديداس اصلي اد ما ما يهمك النظافة الشخصية والمواصافت الصحية الآمنة سواء في الاكل او اللبس حتى لو كوتش من باتا او طبق محشي من ايد الماما
14-تهذيب الاخلاق واختفاء الخصومات
مابقتش الناس متنمرة على بعض ولا بقى فيه الطبقية الفارغة اللى كانت الناس عايشة فيها لاننا كلنا في الهوا سوا ولو الفقير اتصاب الغني لازم ييجي عليه الدور بالعكس الغني بقى يهمه ان الفقير يكون سليم ومعافى عشان البلد هنقع كلها لو الفقرا حصلهم حاجة باختصار مش هيلاقو شعب يحكموه والاصابة هتبقى اكبر عبئ على المنظومة الصحية ولان الغني مبقاش يقدر يسافر برا لان برا اسخم واوسخ من جوة
15- بقت الناس بتزعل وتترحم على غيرهم مهما كان دينهم او توجههم السياسي.. يعني دلوقتي الناس زعلت على ايران واللى جرى فيها مع اختلافنا معاهم في العقيدة والسياسة لكن رؤيتنا ليهم وهما بيقعو في الشوراع بجد قطعت قلبنا وكذلك في الصين وفي ايطاليا واسبانيا مع انهم مش من عرقنا ولا ثقافتنا لكن الانسان يبقى انسان في الاخر
16- الأولية للعلم والبخث العلمي
بعد ما كان السياسيين والاعلاميين والطبالين والهلافيت هما اللى مانو بيتصدرو المشهد بقت الأولوية للبحث العلمي والاطباء والعلماء اللى المفروض يتصدرو المشهد باعتبارهم هما المنقذين الحقيقيين للبشرية وهما دول مصر أمننا وسلامتنا بجد
17-التأديب العام
بجد احنا كنا محتاجين حاجة زي الوباء ده يأدبنا شوية ويكسر كبريائنا الاجوف واللى كان وصل لحد الوقاحة والتنمر والأذى والفضائح .. كنا وصلنا اننا بقينا وحوش متنافسين على الامتيازات والشهرة والنفوذ وفرم الخصوم والتندر بسيرة الناس والجشع والمظاهر الفارغة
18- الجمال هيبقى طبيعي
يعني المبالغة في الزواق والمكياج والقرف ده كله زمانه راح خلاص بقى الوش الصحي والسليم والملامح الطبيعية هيا اللى هتبقى موضة مش الوش المدهون والرموش العيرة اللى خلت البنات بقى شكلهم مرعب في الفترة الاخيرة
19- التغيير الحتمي
انا شايف اننا مش على شفا هلاك ولا دمار اد منا شايف اننا على شفا تغيير جذري هيغير العلاقات الانسانية لدرجة كبيرة تكاد تكون مفصلية يمكن البشر هيوصلو لطريقة انهم يحكمو نفسهم بنفسهم بدون حكومات ولا جنسيات وحدود لان التجحربة دي هنخرج منها بشر وبني ادمين حقيقيين مش مجرد حسابات على مواقع التواصل وارقام في البطاقة والباسبور
….
انا خلصت كلامي واللي معترض على حاجة او عاوز يضيف حاجة يتفضل في الكومنتات وانا معاه قلبا وقالبا لاننا كلنا كلنا في الهوا سوا وطبعا انا مش بقلل ولا بتسهين انا بس بحاول اشوف نص الكوباية الفاضي فيه ايه يارب سلم
