تبقى غلطاااان … للشاعر / محمد زيدان
تبقى غلطااان
محمد زيدان
لو فاكر ان حبك فرصة مش هتكرر … تبقى غلطان
وان من بعده مسارى فى الحياه هيتغير … تبقى غلطان
هما يومين وابقى تعالى زورنى
هتلاقينى عايش فى الدنيادى من بعدك .. اسعد انسان
تبقى غلطان
لو فاكر ان بعدك هحس بضعف وكسرة … تبقى غلطان
انا اللى زيك انساه بنزوة انساه فى سهرة … مهما كان
هعتبرك فترة مشاعرى فيها خانتنى
وهعديها باى طريقة واى وسيلة .. اياً كان
تبقى غلطان
********************
تبقى غلطان
لو فاكر انى هفضل بعدك *** عايش فى وهم تحس بغلطك
واضيع عمرى على قصة فاشلة
وحياتك من بكرة لابدا بغيرها *** وفى لايديا ميت ايد ممدودالها
فى غيرك كتير بحبى اولى
انا سهل جدا ارجع لطبيعتى *** ماانت عارفنى مشاعرى بارادتى
اسلمها لمين ومن مين اسحبها
فى دنيتنا ناس اتخلقت اصلا *** متعرفش الحب غير بس اسماً
والناس دى انت واحد منها
تبقى غلطان
واديك هتبعد وادينى هبعد
وهنشوف
مين اللى الزمان علية هيفرض
يحتاج للتانى … وبرهان
تبقى غلطان
***********************
تبقى غلطان
لو متخيل ان حبى هيضعفنى *** اومن تانى عاطفة هتاخدنى
بعد ما فضلت بفراقنا تطالب
تبقى معرفتش اللى حبك صح *** وردوا لواتمست كرامتة بجرح
قبل ماتسيبة هيكون هو سايب
قسما باللى قسم بالسما والطارق *** لامحيك من حياتى فى بحر دقايق
بقلبك وذكرياتة وبعنيك اللى غدروا
قسما باللى قسم بالسما والطارق *** لاثبتلك انك كنت ف قرارك خاطىء
لاديلك درس هتفضل عمرك تذاكروا
تبقى غلطان
واديك هتبعد وادينى هبعد
وهنشوف
مين هيقبل ومين هيرفض
يعلن فشلة مع النسيان
تبقى غلطان
**********************
تبقى غلطان
وخدها من حد حبك قاعدة *** اى انسان بيحب بقوة
اه صعب يجرح بس سهل انه يبعد
ومش مضمون فى عمرك كلة *** تقابل الحب اكتر من مرة
وبعد كدة ارتبطاتك هيقوم ع التعود
وانا كنت فعلا بحبك حقيقى *** بس انت حبك مكانشى حقيقى
وعشان كدة انا هلقى ميت دافع
اللى بيهم انسى وامشى ف طريقى *** واكمل حياتى وانا مرتاح ضميرى
ولو قلبى حن .. عقلى يجيبلة الف مانع
تبقى غلطان
واديك هتبعد وادينى هبعد
وهسيب
الزمان على اختياراتك يشهد
ويفصل
فى اللى بينا … قصدى اللى كان
تبقى غلطااان
****************
محمد زيدان
التعليقات مغلقة.