“تشرفت بالغناء أمام الرئيس وبنظرته اللي كلها أبوه” أول تعليق من دنيا على احتفالية قادورن باختلاف

نسرين أشرف

نشرت الفنانة دنيا سمير غانم صور لها، أثناء مشاركتها في احتفالية قادورن باختلاف، والتي قد غنت من خلالها أمام الرئيس عبدالفتاح السيسي.

حيث علقت عليهم قائلة:”تشرفت انهارده بالغناء أمام سيادة الرئيس عبد الفتاح السيسي في احتفالية قادرون باختلاف، وسعدت و تشرفت بكلامه ليا جدا وبنظرته اللى كلها أبوة”

وأضافت دنيا قائلة:”أحب أشكر الجمهور العظيم اللي دائمًا بيشجعني وشفت في عنيهم وفي ردود أفعالهم فرحتهم بوجودي في الحدث الهادف مع الملائكة اللي كانوا سبب في ثقتي بنفسي انهارده بإحساسهم الصادق في تعبيرهم عن حبهم ليا”.

وتابعت قائلة:” الحمد لله وفرحتهم باليوم ده وأن في حد مهتم بيهم وبيفكر فيهم وفي احتياجاتهم، بشكر كل الزملاء والأساتذة إلي اتشرفت إني كنت موجودة معاهم في نفس الحفلة وعلى رأسهم الموسيقار الكبير عمر خيرت وأستاذ أشرف عبد الباقي، سعيدة جدًا إني ابتديت يومي بتشجيعهم وحرصهم أنهم يطمأنوا عليا قبل ما أطلع و كمان زملائي الأعزاء مصطفي شعبان ويوسف الشريف والمذيعين شريف مدكور وإيمان الحصري اللي مروا بظروف صعبة وعدوها بكل قوه وثبات بفضل ربنا ورحمته”.

وأضافت دنيا قائلة:”كنت مبسوطة بيهم و حسيت بأد إيه أغلب الموجودين مننا كان عندهم تحديات في حياتهم زي الملائكة اللي استمددنا قوتنا منهم انهارده ومن أهلهم الأبطال”.

وتابعت دنيا خلال المنشور الذي نشرته عبر حسابها الشخصى بموقع إنستجرام:” بشكر كل القائمين على الاحتفال د/أمل مبدا الأم التانية للقادرون باختلاف، فخورة جدًا بأخويا هشام جمال لإنه اشتغل وتعب من قلبه في إخراج الحفلة والأغاني واختيار الأصوات اللي دخلت قلوبنا كلنا وعن نفسي بشكره على أغنيتي “بلادي اسلمي” كلمات الشاعر الموهوب محمد إبراهيم وألحان العبقري المتنوع هشام جمال وتوزيع الموزع الشاطر جدا مادي”.

واختتمت دنيا المنشور قائلة: “وفي النهاية حبايبي الغاليين بابي ومامي تأثرت جدًا النهاردة أنى لأول مرة أروح في يوم مهم ليا من غير ما أسمعك يا مامي بتدعيلي أو ترقيني قبل ما أنزل أو بابي بيقول لي ربنا معاكي يا حبيب بابي، يا رب أكون شرفتكم، بحبكم و وحشتوني أوي، ربنا يرحمكم يا أغلي حاجة في حياتي”.