جديد الشاعر اسامة عاطف

الشاعر والروائي اسامة عاطف وجه جديد للابداع سيصدر له قريبا انشاء الله ديوان شعر ورواية في معرض الكتاب 2019 اترك لكم متعة القراءة

“النُص الفاضي”

بيعدّي يومياً علي كُل الحانات و يلف
كروح شبح بتحوم موجوده حتي الآن
دار كشُراين
و دم الجحافل ف قلبُه يسف
كافر بأديان السعاده
مع إنه من ضمن الآذان
مع إنه من ضمن الل كانوا عشمانين
ف لحظة لُقا
موته اصبح شئ من المنطق
حياته كشئ بيشبه للجنون
مؤمن بكُل مُعطيات الكأبه
مع انه مش مجنون
تتمازج الافكار
تتمايز العتمه
حتي يبانلُه نهار
شُريان سعادتُه
بالإكتئاب مسكون
بيبص علي انعكاس نفسُه
فا يلاقي روحُه معدّيه جمبُه
كسرب حمام اتلاقي بعد الحرب
الضرب ف الميت حرام
و انا روحي شبعت ضرب
درب المُسافر معافر
يجيب سعاده الأرض
ضرب الخيال
يجوز من اب لو يشبه الواقع
درب الواقع
اصعب كتير من ان شخص زيُّه يصدّقُه
كحبوب دوا مكتوبه لجثه هامده
اثبتت العنابر انها مفارقه الحياه بعد ما دققوا
فضل الخيال حواليه
زي الحمار بيبص علي رجليه
فا يلاقي اخر حته يشبهها بتتسحب منُه
بيبص ف المرايا فا يلاقي جوّا عنيه
شلال دموع بيكُب ع الجُدران
فا بيكتب الآتي :-
فرّقت روحك ليه ف موائد العُشّاق
و جريت عشان مُشتاق ملقتش غير شبرين
فردت روحك ليه مع انهم شبرين
و مفيش نفر ويّاك من اكتئابك داق
و لسا بتجازف و تقول دي بني آدم
مربوط ف دُنيا بتضرب المربوط
لجل امّا يجي الخوف مع السايب
حلم السعاده سليم لكنُّه جه مغلوط
عشم الحقيقه صحيح لكنُّه عاش غايب
زيّك كدا كومبارس
ف حياه متشبهاش
كام مره و انت بتلضُم الدنيا بإيدين حبيبتك و السما
بتلاقي جزء ف قلبك
بيحاول انه يعيش
كام مره روحك طلعت للسما و رجعت
– مفيش
كام حلم حققتُه لحد هذا الوقت
كام حد صدّقتُه
مهوش ويّاك ف هذا الوقت
نَفَسك بيكتر ف الرئه علشان
يكوّن سحابه من الل كانوا معاك
كوريث اتحرم من نعمة النسيان
و كل ما يروحلها
يلاقيها لسّا هناك
بيعشّم نفسه يومياً
بقولة خلاص المرادي
بتفوق من المشهد
علي صوت صديق بيقول
ازاي كدا يا عبيط !
بتكلّم نُص ازازتك الفاضي

تقرير /ميريام حنون