جمالك مع أسرار المشاهير
جمالك مع أسرار المشاهير …
كتبت / نسرين يسرى
الجمال والجاذبية هما أحدى أسرار المرأة ويكمن السر فى مستحضرات التجميل وكيفية أستخدامها وعن مدى إتقان المرأة لوصفها وإذا كانت مستحضرات التجميل أو المكياج تزيد المرأة جمالا وسحرا إلا إنه من الممكن أن يأتى يعكس ذلك تماما ويشوه جمالها لذلك نقدم مع خبيرة التجميل منى خلاف كل ما يجب إتباعه عند إستخدام المكياج
هل لمستحضرات التجميل أضرار ومشاكل
١ : لكل حاجة فى حياتنا إيجابيات وسلبيات.. أما عن ايجابيات مستحضرات التجميل فهي بتساعدنا على إظهار مواطن الجمال عندنا.. وأما عن الأضرار والسلبيات لمستحضرات التجميل ممكن أن تتمثل فى الآتي :
١- وضع الميكب علي بشرة غير نضيفة .
٢- إستعمال منتجات رديئة مجهولة المصدر
٣- إبقاء الميكب على الوجه لفترات طويلة
٤- النوم بالميكب بدون داعي لذلك .
هل مشاركة الغير فى إستخدام المستحضرات الخاصة قد ينقل العدوى من شخص لآخر “مثل ترطيب الأسفنجة أو الفرشاة التى تستخدم فى وضع الميكاج
٢ : بكل تأكيد أن مكياجك وأدواتك من خصوصياتك لان مشاركتها مع الغير يساعد على سهولة نقل البكتريا من مستخدمة لآخري ..
لذلك يفضل أن تلتزم كل فتاة بعدم مشاركة الغير في إستخدام المستحضرات الخاصة بها من مكياجها وأدواتها نظيفة ومعقمة لإستعمالها الشخصى ..وأما بالنسبة لأدوات الميكب ارتسيت .. إحنا بنضفها بعد كل إستخدام وبنعقمها ونطهرها منعا لنقل أي عدوي أو تلف للأدوات ..
كمان بيكون موجود معانا أكتر من سيت من كل نوع عشان لو هنشتغل مع أكتر من حد فى المرة الواحدة .
هل النوم بالميكاج دون إزالته خطأ
٣ : أكيد النوم بالمكياج دون إزالته خطأ علي البشرة .. لانه بيمنع تنفس البشرة ويترك آثار تتخلل المسمام ، ومن ثم تعمل علي ظهور الحبوب والبثور والهالات والتجاعيد ..
لذلك يجب علي كل مستخدمة ميكب إزالته قبل النوم بالمزيل المناسب لنوع كل بشرة وأيضا إستخدام مرطب مناسب لبشرتها لمساعدتها على استعادة نضارتها ..
كيفية إخفاء عيوب ملامح الوجه أو البشرة بالميكاج ، ومكياج المحجبة
٤ : أولا بالنسبة لطرق إخفاء عيوب ملامح الوجه أو البشرة :
لازم الأول تعرفي نوع بشرتك ، وهجاوبك بإذن ربي فى سؤال منفصل أزاي تتعرفي على نوع بشرتك عشان تعرفي تتعاملى معاها وتدلليها ..
بعد كده تقدري تستعينى ببعض مستحضرات التجميل لإخفاء ديفوهات البشرة ..
– ومن أمثلة المنتجات دي الآتي :
١- المرطب .. يعمل على طراوة البشرة لتقليل الجفاف والقشور .
٢- البرايمير .. يعمل على قفل المسام ويعمل طبقة ناعمة علي البشرة تمنع تسرب باقى المستحضرات داخل المسام .
٣- الكريكتور .. وبيطلق عليه اسم ” المصحح ” فيه منه أنواع مختلفة وليه عدة ألوان كل لون بنستخدمه لتعديل عيب من عيوب البشرة ومن أمثلة ذلك ..
أ/ اللون الأورنج : نستخدمه لإخفاف الهالات الغامقة تحت العين لزوات البشرة القمحاوية فالاغمق كما يستخدم في المناطقة الغامقة حول الأنف والفم وآثار الحبوب القديمة ..
ب/ اللون الأخضر : يستخدم لإخفاء أحمرار البشرة سواء نتيجة حبوب أو تغير اللون من آثار الشمس أو التهاب فى البشرة ..
ج/ اللون الأصفر : يستخدم لإخفاء الشعيرات الدموية التى يميل لونها إلي الأزرق أو الموف ..
د / اللون البنفسجي : يستخدم لتوحيد لون البشرة المرهقة الشاحبة المايلة للإصفرار ..
ه / اللون الوردي : يستخدم لإخفاء هالات تحت العين لزوات البشرة الفاتحة والشقراء
و / اللون الكريمي : يستخدم إما لعمل إضاءة او إخفاء الألوان السابقة عن طريق الدمج ..
– ثانيا بالنسبة لمكياج المحجبات : فسوف نتناول الإجابه عليه فى سؤال لاحق فى نفس المقال بإذن الله …..
ما هو الكريم المرطب للبشرة
الكريم المرطب هو المدخل الصحيح لوضع الميكب .. لأنه بيعمل على منح البشرة الليونه المطلوبة لتقلليل ضرر جفاف وقشور البشرة التى تعمل على تجير وتشقق باقى المستحضرات مثل الكونسيلر أو الفاونديشن وكمان البودر .
ما هي الطريقة المثلى لوضع الماسكارا ، ورسم العيون الضيقة ، والواسعة ؟؟
أولا بالنسبة لطريقة وضع الماسكرا :
الماسكرا آخر حاجة يتم وضعها قبل وضع الروج …
بسحب فرشة الماسكرا للخارج بدون ما أطلعها وأدخلها أكتر من مرة فى علبه الماسكرا لان ده بيخرج الهوا منها وبتنشف بعد كده بحرك الفرشة بالعرض على الرموش برفق عشان أعبى الرموش بالماسكرا بعمل نفس الحركة بالنسبة للرموش العلوية والسفلية .. بعد كده بمشط الرموش العلوية من الأسفل للأعلي مع تقويس الرموش للداخل ..
# ملحوظة # بعمل حركة التقويس والرموش مبلولة بالماسكرا فقط وليس بعد جفافها منعا لتكسرها ..
وبعد كده بمشط الرموش السفليه من أعلى إلي أسفل الرموش .. .. لو حابه لوك تقيل للرموش كرري نفس الخطوات مرة تانية.
كيفة إختيار الروج المناسب
الروج المناسب بنختاره تبعا للون بشرتنا …
ملحوظة
عند الشراء يجب أختيار الماركات الجيده لأنها تبقى طويلا ولا تعرض الشفاه للجفاف والتشقق ..
١. ذوات البشرة السمراء والشعر الأسود : أغلب الألوان هتكون مناسبه ليهم ولاسيما الأحمر والبنفسجي ..
٢. ذوات البشره القمحيه والشعر أسود : فإن جميع درجات اللون الأحمر والألوان الترابيه واللون الموف والألوان البنيه والبيج تكون هي الأنسب لهم ..
٣. ذوات البشره الشاحبه : فإن ما يناسبها هو الأحمر اللامع بدرجات اللون الوردي خاصه الفاتح منها ، اللون البيج ..
٤. ذوات البشره البيضاء والشعر الأشقر : تناسبهم درجات الألوان الزهريه والبرتقاليه..
٥. ذوات البشرة البيضاء والشعر الأحمر : تناسبها الألوان البنيه والبرونزيه ..
ما هي أبرز خطوط المكياج فى كل مرحلة عمرية ؟؟
ابرز خطوط المكياج فى المراحل العمرية تتميز بالبساطة فى مرحلة المراهقة بغرض الحفاظ علي البشرة وعدم تعرضها لأضرار المكياج ، وأنصح البنات فى المرحلة دي بالإكتفاء بألوان الروج الفاتحة مثل الروز والبينك والبيج ووضع الكحل الأزرق أو الأخضر أو الموف . وهو ما يطلق عليه الميكب التركي ..
_أما مرحلة بعد المراهقة لكى فيها مطلق الحرية فى وضع الميكب اللى بتفضليه ولكن عليكى ان تفرقي بين مكياج الصباح مثل المكيب التركي ، وبعد الظهر مثل ميكب اللايت ، ومكياج المساء مثل ميكب السوارية ..
_كلما تقدم السن كلما قل احتياجنا الميكب عكس المعروف .. لان كثرة استخدام مساحيق التجميل تبرز عيوب وتجاعيد الوجه .. لذلك علينا أختيار المنتجات التى تعمل على اخفاء تلك التجاعيد او البقع من نوعيات جيده وعدم المغالاه فى وضع الميكب ..
كيف اضع مكياج النهار ومكياج الليل
أكيد كل وقت ليه المكياج الخاص بيه اللى يناسب طبيعة الوقت وطبيعة الخروج نفسه فى وقت معين …
_ لو أتكلمنا عن مكياج النهار ..
هنلاقيه يتميز بالبساطة والألوان الهادية مثل المكياج التركي او النو ميكب .. يعنى لا يعتمد على الخطوط الواضحة للمكياج ..
ممكن نستخدم الكحل الأزرق أو الأخضر أو الموف مع بلاشر وردي وروج وردي أو بيج وماسكرا خفيفة ..
_ أما مكياج الليل يعتمد علي الخطوط الواضحة والصريحة من تحديد شكل الحواجب ورسمة العين والرموش والكنتور وإبراز جمال الشفايف ..
هل مكياج المحجبة يختلف عن مكياج الغير محجبة على أساس أن وجه المحجبة بيكون الأساس اما غير المحجبة فلديها عناصر آخري “مثل الشعر ” لإبراز جمالها
كل بنوته تمتلك قدر من الجمال فى راي الشخصي لا علاقة للحجاب او الشعر بيه ..
المهم نعرف ازاي نبرز الجمال ده ونخفي العيوب .. مع العلم انه ده ممكن يتحقق بمكيب بسيط ورقيق ..
منطقة العين معروفة انها حساسة جدا وكل البنات دلوقتى بيحبوا يحطوا الكونسيلر … تنصحيهم بإيه
منطقة العين منطقة حساسة جدا ، ولذلك يجب التعامل معاها برفق وبعناية شديدة
بالنسبة للكونسيلر ليه عدة إستخدامات وعليكى تختاري إحتياجاتك منها والمناسب ليكى ..
١.. كونسيلر نفس لون البشرة لإخفاء الهالات.
٢.. كونسيلر درجة أو درجتين أفتح من لون البشرة لعمل إضاءة مثلث الوجه ، وطرف الانف ، والجبهه والذقن ، وتحت الحاجب ..
٣.. تحديد الحاجب بعد رسمها لابراز منطقة العين ..
فى بنات كثيرة جدا بتحب تتقل حواجبها … لكن مش عارفين يستخدموا لون اغمق ، ولا أفتح من لون الحواجب الاصلية
رسمة الحاحب هى خطوة مهمة لابراز جمال العين وتحديدها واعطاء طله للوجه .. لذا علينا ان نعرف طبيعة الحاجب لنتمكن من اختيار الوسيلة المناسبة لرسمه ..
اولا .. لو كانت الحواجب غامقة بفتح عن لونها درجة او درجتين على الاكثر .. ولو الحواجب فاتحة بغمق درجة واحدة ..
ثانيا .. لو الحواجب خفيفة هستعمل أما البروجيل وبيكون فى انبوبة .. او الجيل وبيكون فى علبة مدورة .. وبمشط بماسكرا الحواجب ..
لو الحواجب تقيلة ومفرغة بستخدم بودر الحواجب وبملا بيه الفراغات وبردوا همشط بماسكرا الحواجب ..
والبنات كمان محتارة بين أقلام الحواجب ولا آى شادو الحواجب
عشان تحافظي علي شعر حواجبك حاولي تتجني إستخدام أقلام الحواجب غير فى أضيق الحدود وعند الضرورة فقط لأنها بتسبب وقوع شعر الحاجب وضمور البوصيلة ..
وأنصحك بإستخدام البروجيل او الجيل او البودر ..
بنات كثير بتقول أن قلم الكحل بيسيح … تنصحيهم بإيه
معظم أقلام الكحل حتي الجيد منها مع الوقت والحركة وطبيعة الجو بيسيح تحت العين..
اول حاجة لازم تختاري نوع كحل جيد عشان سلامة عنيكي .. وكمان هيكون اقل عرضه انه يسيل تحت العين .. بعد ما تحطى الكحل اقفلي عليه بخط رفيع من الاي شادو البودر .. هيمنع أنه يسيح لأطول وقت ممكن ..
س بنسمع عن كريمات ليلية … هل هذه الكريمات تستخدم بالليل فقط وهل فى كريمات للصبح
مهم جدا يكون لنا روتين يومي للحفاظ على بشرتنا .. الروتين ده يتمثل فى الغسول والتونر والمرطب .. والمرطب ينقسم الى كريم النهار وكريم العين وكريم الليل ..
_ أول حاجة لازم تتعرفى على نوع بشرتك عشان تقدري تختاري المنتج اللى يقدر يساعدك على الإعتناء بيها ..
_ بعدما قمنا بتحديد بشرتنا ومن ثما نتبع الروتين اليومى .. هام جدا لبشرتنا يبدأ بالغسول ثم بالتونر ثم المرطب والذي ينقسم إلي … كريم النهار ، وكريم العين فى فترة الصباح ، وفى المساء كريم الليل ، وكريم العين..
_ تعالوا نعرف مع بعض أهمية كلً من الغسول والتونر وكريم العين وكريم النهار والليل
_ اولا :ً الغسول من أهم الأساسيات للعناية بالبشرة حيث أنه يقوم بتخليص البشرة من الأتربة والبكتريا فقد يتغلل فى مسام البشرة ليزيل الأوساخ التى تواجه البشرة طوال اليوم..
_ ثانياً التونر لم يكن معروفاً من قبل لدى الكثير ولكنه له اهمية كبيرة حيث انه يقوم بغلق مسام البشرة بعدما تفتحت من الغسول كما يجعل البشرة مستعدة لأمتصاص كريم النهار وكريم الليل، واكثر من يشتكون من المسام الواسعة ننصحهم بإستخدام التونر فقد يضيق المسام ويمنع دخول اى أتربة للبشرة ، يوضع على بشرة جافة بعد الغسول يوضع منه على قطنة ويملس به الوجه والرقبة…
_ ثالثاً : كريم العين يعتبر سبق من نوعه فى العناية بالبشرة وذلك لكونه عامل أساسى فى تأخير ظهور التجاعيد حول منطقة العينين ، وإذا ظهرت التجاعيد بحكم السن فقد تكون قليلة جدا ، قد يكون مرطب يومى يعمل فى فترة الليل والنهار على ترطيب أرق مناطق البشرة مما يؤدى لتأخير ظهور التجاعيد بشكل ملحوظ وعينين أكثر شباباً ، يوضع حول منطقة العينين بطريقة ( الطبطبة ) بأصبع واحد بطريقة خفيفة جدا …
_ رابعاً : كريم النهار ، وكريم الليل … لا تقل أهميتهم عن الأساسيات السابقة فقد يكون كريم النهار به عامل حماية من الشمس ونسبة ترطيب عالية تمتصه البشرة لتصبح أكثر نضارة بالصباح ، بينما كريم الليل يعمل على الترطيب فى فترة المساء ، ولايمكن إستخدام كريم نهار فقط أو ليل فقط للحصول على نتيجة مرضية يجب إستخدام كلاهما معاً ، يوضع جزء من الكريم على راحة الأصبع ثم يتم وضعه على الوجه من الأسفل تجاه الرقبة لأعلي بحركات دائرية …
فى بنات كثير بتعانى من عدم ثبات المكياج خصوصا فى فصل الصيف ؟؟
مشكلة عدم ثبات الميكب قدرنا بفضل الله نسيطر عليها بخطوات بسيطة ..
اولا .. لازم تعرفي نوع بشرتك عشان تقدري تختاري المستحضرات المناسبة من حيث الثبات سواء كانت دهنية او عادية او جافة او مختلطة ..
ثانيا .. لازم برايمير قبل وضع الميكب .. ده بيقفل مسام الوجه عشان البشرة ما تمتصش الميكب كمان بيساعد على اظهاره شكل الوجه رايق ويعمل على التثبت ..
ثالثا .. بعد وضع اي كريمات مثل الفاونديشن او الكنتور او الكونسيلر يلزم التثبيت بالبودر او اللوس بودر .. دي اهم خطوة فى تثبيت الميكب ..
رابعا .. وضع الفيكس بلاس أو المثبت .. هو عبارة عن اسبري بيترش بعد الإنتهاء من وضع الميكب لتثبيته اطول وقت ممكن
فى كثير مش بيعرفوا يضبطوا المكياج … هل فى أدوات تساعدها على رسم عينيها كويس
أكيد عشان أعرف أظبط ميكب العين لازم أستخدم الفرش المناسبة لكل جزء من العين ..
فى فرش الدمج وفى فرش الجفن المتحرك وفى فرش الزاوية .. وفى فرش الاي لاينر
الاى لاينر دايما بنستخدم الأسود هل فى الوان اخرى؟
بالنسبة للاي لاينر هو يتميز باللون الأسود ولكن متوفر منه الوان كتير مثل الأزرق والأخضر والموف …
أزاى أضع الماسكرا؟
إستخدام الماسكرا مهم جدا لإبراز جمال العين ..وللحصول علي نتيحة جذابه عليكى ان تضعي الماسكرا برفق كالتالي ::
اول حاجة وانتى بتسحبي فرشة الماسكرا من العلبة تجنبي انك تدخليها وتطلعيها أكتر من مرة ظنا منك لإخراج قدر وافى من الماسكرا لانها ده بيخرج الهوا من العبوة مما ينتج عنه جفاف الماسكرا .. كمان الكمية الكتير ممكن تكلكع على الرموش ..
بعد كده هتمشي بالماسكرا بالعرض على الرموش العلوية لملا الرموش بها ثم التمشيط من أسفل لأعلى مع ثنى الرموش وهى مبتله بالماسكرا للداخل ..
ملحوظة .. أحذري حركة ثنى الرموش بعد جفاف الماسكرا لمنع تقصف وتكسر الرموش ..
ونفس الحركة مع الرموش السفلية ولكن الثنى لأسفل ..
ملحوظة … لو نزل بعض نقط من الماسكرا تحت العين .. أوعي تمسحيها وهى طرية لأنها هتبوظ مكياجك وتسود تحت العين أتركيها تجف ثم أفريكها بقطنة الأذان ..
هل هناك طريقة معينة لوضع كريم الأساس ” الفاونديشن ” تمنع ظهور التجاعيد ؟؟
يمكن لمستحضرات التجميل أخفاء التجاعيد ..
ولكن منع ظهورها يعتمد على أتباع برنامج يومي من سن ال ٣٠ بواسطة إستخدام الغسول والتونر والمرطب الذي يتكون من كريم الصباح وكريم العين وكريم الليل وقد تطرقنا لشرحهم بالتفصيل فى سؤال سابق فى نفس المقال ..
لكن يمكن أخفاء هذه التجاعيد مؤقتا عن طريق الكونسيلر والفاونديشن ..
دايما من الإرهاق بيوجد هالات سودا … كيف أخفيها ؟؟
بالنسبة للهالات اللى تحت العين.. لازم الاول إستشارة طبيب جلدية .. ومن هنا لحد ما ده يحصل “” عارفة ان انتوا كسلاااانين “” هنشرب ماية كتير على الاقل ٢ لتر ف اليوم .. هنعمل كمدات شاي اخضر متلج قبل النوم .. نحاول ننام بدري على الاقل ٨ ساعات …
بعد كده ازاي اخفيها بالميكب
انا هكتب الخطوات كلها بالترتيب وأنتى أعملي اللى تقدري عليه ..
١.. بحط كريم مرطب ..
٢.. بحط البرايمير ..
٣.. بحط كوريكتور اورنج واطبطب ..
٤.. بحط كونسيلر نفس درجة بشرتي واطبطب ..
٥.. بحط الفاونديشن المناسب للون بشرتي واطبطب ..
٦.. بحط كونسيلر أفتح من بشرتي درجة أو درجتين واطبطب ..
٧.. بحط لوس بودر عشان اثبت وافتح وأعمل إضاءة للمنطقة ..
ملحوظة .. سيبي وقت مناسب بين كل خطوة وخطوه عشان المستحضرات متسحش على بعض ..
ما هو المكياج المناسب للعيون الواسعة والعيون الضيقة؟؟
العيون الواسعة يناسبها المكيب الخليجي وميكب السموكي ..
أما العيون الضيقة فيناسبها الميكب التركي وميكب الايت ..
هل أضع ال ” صن بلوك ” واقى الشمس قبل أم بعد ” الفاونديشن ” كريم الأساس؟
يتم وضع الصن بلوك قبل وضع الفاونديش ويترك من ٥ ل ١٠ دقايق قبل لكى تتشبع به البشرة ثم يتم وضع الفاونديشن ..
محتاجة أعرف نوع كونسينلر ، وكحول ثابت نوع كويس؟
بالنسبة لأنواع الكونسيلر .. ميبلين .. كريولاين .. لاجيريل ..
وبالنسبة للكحل .. ديبورا .. ريميل .. فورايفر ..
طريقة تركيب الرموش؟؟
طريقة تركيب الرموش ..
أول حاجة بقيس الرموش على عينى .. لو كانت أعرض من عينى بقص الجزء الزيادة من الطرف الخارجي للرمش ..
بعد كده بأخد نقطة بسيطة من الجلو الخاص للرموش بطرف دبوس طرحة وامشي بالنقطة دي على حرف الرمش بفرده كويس عشان ميكلعش ..
بعد كده بسيبه ٣٠ ثانية عشان ينشف .. دي خطوة مهمة انه ينشف شوية قبل تركيبه وبكرر نفس الخطوة مع الرمش التانى ..
وبعد كده بمسكه من المنتصف واركبه على الجفن المتحرك اعلي خط الرموش واضغط عليه برفق مع الرموش الطبيعية.. ولما احس انه لزق خلاص .. بدمجه مع الرموش الطبيعية بالماسكرا برفق ..
ما هو الفرق بين ال BB ، CC ، DD
١.. كريم “BB” :
– هو إختصار لكلمة “Beauty Balm” أى بلسم الجمال.
– أخف من كريم الأساس، ولكن أثقل من المرطبات العادية.
– يحتوي على عامل حمايةSPF ضد أشعة الشمس الضارة لبشرتك..
– يوفر تغطية جيدة للبشرة، لكنه ليس فعال في الترطيب.
– يمكنك العثور على كريم “BB” يطابق لون بشرتك تماماً، حيث يحتوي على درجات ألوان البشرة المختلفة.
٢.. كريم”CC” :
– هو إختصار لكلمة”colour correctors” أي مصحح اللون..
– يعمل على معالجة وتغطية مشاكل البشرة مثل الأحمرار أو الشحوب ..
– في حين أن كريم “BB” يشبه كريم الأساس ولكنه أخف قليلا، فإن كريم “CC” مصحح للون ويخفى عيوب البشرة ويكون أخف على الجلد ..
– له فوائد للعناية بالبشرة، فيحسن مظهر البشرة ويحميها من الشمس ..
– يحتوي على فيتامين “C” وفيتامين”” E ، المضاد للشيخوخة ، والمضاد للأكسدة ..
– كريم “BB” وكريم “CC” لها تقريبا نفس التأثير، ولكن لكلا منهم تغطية مختلفة ، فالفرق بينها يكون فى تصحيح الألوان ..
٣.. كريم “DD” :
– يعتبر الإختصار لكلمة “Dynamic Do–All” ..
– أطلق فى نوفمبر 2012 ، كمستحضر تجميل حديث يحمل مميزات كريم “BB” ، وكريم “CC” ، حيث إنه مصحح للعيوب ، ومرطب للبشرة ، وواقي من الشمس..
– يمكن إستخدامه كبرايمر للمكياج ، بالإضافة إلى أنه يحتوي على مواد مضادة للشيخوخة ..
– يوازن لون البشرة ، ومناسب للأشخاص ذوي البشرة الحساسة ..
إزاي اختار لون ” الفاونديشن ” كريم الأساس المناسب لبشرتي
مهم جدا أني أعرف أزاي أختار لون الفاونديشن المناسب لبشرتي…
اولا… لا يجب أن يكون كريم الأساس أفتح أو أغمق من لون بشرتي بعدة درجات لأن ده هيتسبب فى حدوث تجير على البشرة ، وربما بعد وقت قليل يتغير لونه …
إذن الطريقة المناسبة للإختيار الصحيح هي تجربة الفاونديشن على أعلي عظمة الفك .. ده اكتر مكان مناسب تقدري تميزي بيه اللون المناسب للون بشرتك ..
إزاي أعرف نوع بشرتي
تعرفى على نوع بشرتك وكيفية العناية بها
بهذه التجربة البسيطة يمكنك التعرف على نوع بشرتك بسهولة ، قومى بغسل وجهك في المساء ، ولا تضعى أية كريمات ، وفى الصباح قبل غسل الوجه من ملمس وجهك ستعرفى ما نوع بشرتك ..؟ ستتعرفين على نوع بشرتك بهذه العلامات :
١.. البشرة الدهنية :
يمكن التعرف عليها بسهولة يكون بها العديد من الحبوب والبثور والمسام يكون واسع ودائماً فى حالة لمعان ولا يثبت عليها الميكب…
٢.. البشرة العادية :
من أسمها عادية فهى تتأثر بعوامل الجو أى فى فصل الشتاء تبدو جافة ، ولا تكون دهنية ، ولا جافة..لا يظهر بها حبوب …
٣.. البشرة الحساسة أو الجافة :
دائماً تكون البشرة الجافة حساسة ، وذلك من كثرة الجفاف تصبح البشرة حساسة ، وللتعرف على بشرتك الجافة لا يظهر ابداً بها حبوب ، يظهر عليها أحمرار أو قشرة، والمسام تكون ضيقة جدا ، وليس بها أى لمعان …
٤.. البشرة المركبة أو المختلطة :
من أصعب أنواع البشرة فى العناية حيث أنك تحملين بشرتين ببشرة واحدة بشره دهنية ، ويكون الجزء الدهنى على الجبهة والأنف وتسمي منطقة التيزون وتكون علي شكل حرف ال T ،وتكون أكثر لمعاناً من باقى الوجه – أما باقى الوجه يكون بشرة عادية ، هذا النوع له عناية خاصة …
لو عروسة ومحتاجة تشتري ميكب .. إيه الحاجات الأساسية اللى هتحتاجيها
لو أنتى عروسة ، ومحتاجة تشتري ميكب وأدوات .. ضروري يكون عندك أساسيات الميكب اللى يكون سهل عليكى إستخدامها وهي ::
فاونديشن * كونسيلر * روج * كحل * ماسكرا * بودر * شادو * بلاشر …
بالنسبة للأدوات ::
سبونج أو فرشة للفاونديشن ⚘ كمان سبونج او فرشة للبودر ⚘ فرشة او ٢ للشادو ⚘ فرشة للبلاشر ..
آخر سؤال معانا خطوات عمل المكياج؟؟
عشان أحصل علي نتيجة جيدة للميكب بتاعي لازم أعرف الخطوط الأساسية لعمل الميكب .. أما طريقة الوضع نفسها بتختلف من واحدة لواحدة حسب راحتها فى الشغل أو فى طريقة الوضع نفسها ..
١.. وضع المرطب ..
٢.. رسم الحواجب ..
٣.. تحديد الحواجب ..
٤.. وضع برايمير العين ..
٥.. رسم العين ..
٦.. وضع برايمير الوجه ..
٧.. وضع الكوريكتور فى حالة وجود عيوب أو هالات ..
٨.. وضع الكونسيلر سواء لإخفاء العيوب او للإضاءة ..
٩.. وضع البودر للتثبيت ..
١٠.. عمل الكنتور كريمي وبودر ..
١١.. وضع البلاشر ..
١٢.. وضع الهايلايتر ..
١٣.. تركيب الرموش ووضع الماسكرا ..
١٤.. وضع الروج ..
١٥.. وضع الفيكس بلاس .. المثبت ..
شكرا جدا أستاذة / نسرين يسري علي الحوار الممتع مع حضرتك .. سعيدة جدا بمشاركتي ليكم بعض خبرتي في مجال الميك آب ، وأتمنى من الله اني أكون قدرت أجاوب بطريقة واضحة على كل أسئلتكم وإستفسارتكم ..
