حدوتة الطفل القنوع بقلم الكاتبة شيماء أبو زيد
حدوتة الطفل القنوع
بقلم.الكاتبة.شيماءأبوزيد.
كان ياما كان ياسادة ياكرام ولا يحلى الكلام الا بذكر النبي عليه الصلاة والسلام ….
كان في مرة زمان ولد عنده صفة صعبة جدََا كان كل ما يشوف حاجة بيكون عايزها حتى لو عنده منها، كل ما يخرج مع ماما أو بابا يشاور على كل حاجة ويعيط ويصرخ جامد علشان يجيبها، وفي مرة من المرات ماما زعلت جدََا من تصرفاته وقالتله:ياحبيبي ماينفعش كده مش كل حاجة لازم تكون عندنا لازم شوية تحس بالنعمة اللي عندك وأحمد ربنا عليها لازم تكون قنوع….
رد الولد وقال:لا بس انا عايز كل اللعب والحلويات اللي بره وزي اللي عند أصحابي، ليه هما عندهم وأنا لأ!!!
ردت ماما وقالت:بس أنا مش دايمََا بكون قادرة أجيب كل حاجة وخصوصاً لو عندك زيها وأنت واحد مننا لازم تفهم وتقدر ظروفنا…
رد الولد وقال:بس انا بزعل أوي لما بكون نفسي في حاجة ومش بقدر أجيبها ولما بجيب حاجة بكون عايز أجيب تاني….
سكتت ماما شوية وفضلت تفكر ياترى تحل الموضوع ده إزاي؟!!!!
بعد شوية تفكير نادت على الولد وقالتله:حبيبي عايزين نتعلم إن القناعة والرضا كنز لا يفنى يعني الحمد لله على كل النعم والحاجات الجميلة اللي
ربنا عملها لينا ورزقنا علشان نقدر نجيبهالك؛ وإيه رأيك ليك عندي كل يوم أجيبلك حاجة إنت بتحبها بس بشرط هو إنك تقسم الحاجة اللي هجيبهالك مع حد بتحبه علشان تفرح غيرك وتفهم قصدي.
رد الولد وقال:بس أنا بكون حاسس إني نفسي أجيب كل حاجة وحاجة واحدة بس لابتعجبني ولا بترضيني.
ردت ماما وقالت: يبقى تعتمد على نفسك وتجيب بس من مصروفك ومتطلبش مني علشان تعرف قيمة الحاجة اللي بتجيبها…
تاني يوم الولد راح المدرسة وبيفكر في كلام ماما، شاف واحد صاحبه بيعيط سأله مالك؛ رد صاحبه وقال:أصلي جعان ومش معايا أكل علشان ماما كانت تعبانه أوي النهاردة وانا ماقدرتش أتعبها
أكتر،فجأه كلام ماما بدأ يجي تاني وإفتكر كل كلمة مامته قالتهاله فقرر انه هيقسم أكله ومصروفه مع صاحبه وهما الاتنين كانو بياكلوا وهما فرحانين جدََا…
الولد بعد الموقف ده إقتنع فعلا وعرف أن مش لازم كل حاجة نطلبها نلاقيها لأن حوالينا كتييير محتاجين ولازم نحس بيهم.
وكمان بدأ يحوش من مصروفه ويقسمه جزء صدقة وجزء تاني يجيب بيه لعبة أو أي شيء نفسه فيه…
بدأ يحس بسعادة من نوع مختلف.
فهم قيمة الطلب اللي بيطلبه من ماما وبابا.
فهم ماما وبابا بيتعبوا إزاي علشان هو يكون سعيد ومرتاح.
فهم يعني إيه حوالينا كتير محتاجين مش لاقيين اللي يساعدهم…
فهم فعلا إن القناعة كنز من كنوز الجنة.
القناعة كنز لا يفنى.
وإن الطمع والانانية صفات مش كويسة ومش هتخلي حد يحبه،بالعكس العطاء والكرم والمحبة هتخلي كل الناس تحبه راح لمامته وحضنها كتير وقالها:شكرا ياماما علمتيني حاجات حلوة وانا قدرت اتغير
شكرا
أنا قنوع يامامتي…..
وتوتة توتة خلصت الحدوتة…
