حزن حسن حسني علي ضياع ابراهيم سردينة : كتب احمد علي

حسن حسني ندم بشدة علي ضياع دور ابراهيم سردينة منه وشعر بالحزن بعد نجاح الدور مع المشاهدين وتألق عبد الرحمن ابو زهرة فيه، واحس انه اضاع منه دور عمره الذي اصبح ايقونة الادوار التلفزيونية مع جمهور المشاهدين، في هذه المقالة نكشف لكم كواليس رفض حسن حسني لهذا الدور واسباب الرفض وحزن حسن حسني بعد نجاح الدور.

بلال فضل يكتب عن حسن حسني

في كتابه الموهوبون في الارض حكي الكاتب بلال فضل عن الجميل حسن حسني انه كان راجل في منتهى الطيبة ومتساهل جدا في حق نفسه أهم حاجة عنده انه يشتغل مهما كان الاجر او حجم الدور، ومن فرط تساهله في حق نفسه بيحكي بلال ان في فيلم “تعالب أرانب” اللي كان من بطولة حسن مع فاروق الفيشاوي واحمد بدير.

حسن حسني ونهاية فيلم تعالب أرانب

بعيدا عن انه فيلم ميتشافش اصلا حاجة كده من اعماق سينما الهبوط والمقاولات المهم ان الفيشاوي وبدير اعترضوا على مشهد نهاية الفيلم لانه هيبان ان حسن هو البطل واقنعوا المنتج والمخرج بتغيير مشهد النهاية لكن المؤلف “وليد سيف” اعترض ورفض لكنه اتفاجيء من حسن نفسه اللي قاله :”يا ابني عدي الازمة واكتر حاجة ممكن تضر الفنان في بدايته هي سمعة انه بتاع مشاكل وخسارة مشهد في فيلم زي خسارة معركة في حرب وطبيعي تخسر معارك والممثل اللي زيي فاهم ان النجم هو الاساس وإلا هقعد في بيتي من غير شغل”.

حسن حسني يرفض دور ابراهيم سردينة

لكن بعد كده حسن بدأ يكبر والادوار اللي بتتعرض عليه زادت بشكل ضخم فقرر بقى انه يتخلى عن طيبته وميتساهلش في حقه تاني فأول دور اتعرض عليه بعد قراره ده كانت شخصية “ابراهيم سردينة” في “لن اعيش في جلباب ابي” قعد عم حسن باشا رجل على رجل بعد ما عجبه الدور طبعا قالهم الاجر مش عاجبني وطلب زيادة، قاموا خدوا الدور وادوه لعبدالرحمن ابوزهرة.

حزن حسن حسني 

نزل المسلسل نجح وكسر الدنيا فعم حسن يا عيني اتقهر من انه اول مرة يستنصح وميتساهلش في حق نفسه قام مضيع منه دور بقى ايقونة درامية فقرر يرجع لطبيعته تاني حسن الطيب المتساهل لا بقى يسأل عن الاجر ولا عن حجم الدور وأي حاجة تتعرض عليه يعملها بشرط بس انها تعجبه