لقد تعودنا من وقتاً لأخر أن نقوم بعمل حوار مع إحدى المبدعين فى مجالهم لنتعرف عليهم وعلى إبداعاتهم المختلفة .. واليوم سندخلكم عالم جديد عالم تملأه الإثاره والتشويق هو عالم الأنميشن الذى يعشقه كل من رأه ..

والمبدع اليوم شاب مصري صنع بنفسه فيلم إنميشن بعنوان “ألف ليلة وليلة” من الألف للياء بتقنية مختلفة لم تستخدم من قبل بمصر بشكل موسع دون مساعدة أحد متمنياً أن يصل لحلمه الذى يتبلور حول تنفيذ أفلام أنميشن هو المبدع حسن سرحان ..

فهيا بنا لنتعرف عليه وعلى فيلمه عن قرب  ..

• فى البداية عرفنا بنفسك أكتر ؟

أنا اسمي حسن سرحان, خريج المعهد العالي للسينما قسم إخراج وعندى حلم بحاول أحققه بإني أعمل في السينما المصرية أول فيلم 3D أنيميشن بمستوى ينافس الغرب .

• الأصرار على الهدف صعب فمن ساندك فى تنمية موهبتك وزاد من هذا الأصرار ؟

والدي الله يرحمه كان بيشاركنى في نفس الحلم الصعب ده وبعد وفاته قررت إنى أكمل لحد ما أحقق الحلم ده بإذن الله.

•  أستخدامك لتقنية جديد فى مصر تخص الأنميشن شئ ليس بالسهل حدثنا أكثر عن هذه التقنية ؟ ولما أخترتها هيا بالأخص ؟

أفلام الـ 3D أنيميشن فيها بحر من التقنيات والعلوم اللى بدرسها بقالى سنين واللي بتتجدد كل يوم ولازم الواحد يكون متابع لكل العلوم الجديدة للسينما في العالم وأنا شايف إننا في مصر ماينفعش نتجاهل السينما الحديثة اكتر من كده.

• أنتشر لك فيلم أنميشن قصير بالتقنية الجديدة التى تحدثت عنها  بالسوشيال ميديا من تنفيذك .. حدثنا عن الفيلم القصير هذا وكيف جاءتك الفكرة ؟

الناس في مصر والعالم العربي بينظروا لتقنيات الغرب في السينما وأفلام الأنيميشن 3D على إنها مستحيلة بالنسبة لنا فا أنا عملت فيديو 6 دقائق أورى فيه الناس إن الموضوع مش مستحيل وممكن يتحقق عندنا وضربت مثل بفكرة زي ألف ليلة وليلة عشان أعرض من خلالها إن كل الإمكانيات نقدر ننفذها بإذن الله وده كله بمجهود شخص واحد بدون تمويل فا يتخيلوا اللى نقدر نحققه بقى لو فيه دعم واهتمام بجد.

• ماهيا البرامج المستخدمة فى هذا الفيديو ؟

مش هاقدر أقول اسم برنامج واحد لإن فيه أكتر من 10 برامج مستخدمة في الفيديو لكل تفصيله صغيرة برنامج كامل عشان ينفذها سواء تصميم أماكن, تصميم شخصيات, إكسسوار, تحريك, ملابس, شعر, سوائل, إضاءة…إلخ

• هل هذه التقنية مكلفه أم لا ؟

في هوليود أفلام الـ 3D أنيميشن بيصرفوا عليها مبالغ خرافية, بس في المقابل بتجيب إيرادات خرافية أكتر بكتير..مكاسبها بتعدي مليارات الدولارات..أنا عارف إن هنا في مصر مش هانقدر نكلفها زي هوليوود طبعاً, بس نقدر دلوقتى ننتج أفلام 3D أنيميشن بمستوى عالمى بتكلفة زي الأفلام العادية اللي بننتجها في مصر.

• هل تعتقد أن المنتجين سيغيرون تفكيرهم عندما يروا نجاح هذه التقنية فى مصر ؟

المنتجين ممكن يكونوا بيخافوا يجربوا حاجة جديدة, بس من غير مغامرة عمرنا ما هانبدأ حاجة جديدة ولا هانتطور..أنا باتمنى إن المنتجين لما يشوفوا الصدى بتاع التجربة البسيطة اللى أنا عملتها عند الناس يتشجعوا أكتر للخطوة الأولى والأكثر ربحاً دائماً.

• كلمة تقولها لكل من يشجعك لتحقيق حلمك هذا ؟
  

أنا أكتر حاجة مفرحانى كم التشجيع والطاقة الإيجابية وردود الأفعال اللى جاتلى من الناس اللي بتبين إن الناس نفسها تشوفنا نقدر وواصلين لمستوى زي برا وعندنا علوم ننافس بيها في العالم..أحب أقول شكراً جداً لكل شخص دعمني ولو بكلمة تشجيع عشان أكمل ونحقق الحلم ده إن شاء الله .

وفى النهاية أحب أشكرك على هذا الوقت الممتع الذى قضيناه معك متمنين أن يتحقق حلمك هذا ..

وإلى اللقاء أعزائي القراء مع مبدع جديد مع تحياتي أنا مي إسماعيل .