حكاية حب
الشاعر / فؤاد ابراهيم
حكايه حب
نامى فى حضن الروح
نامى ودفينى
محتاج انا حضنك
محتاج تضمينى
بيتك فى ننِّى العين
وغطاكى من رمشى
واغزل سنينى بُساط
وانتى عليه تمشى
لو قلتى يوم الآه
قلبى يبات مجروح
أفضل أقول الآه
وابكى بدمع الروح
وان يوم حِزِنتى أموت
وازاى أعيش وانتى
بسمه فى قلب الموت
تِحْيينى يا بنتى
لو يوم تعاكسينى
بعمل قوام زعلان
علشان تصالحينى
واشبع عسل وحنان
وامَّا تلاعبينى
الكون يطير بينا
أنا ببقى مش عارف
الطفل مين فينا
وحَجَوِّزِك عندى
ياغاليه يا حبيبه
مانا أصْلى مش حقدر
أتحمل الغيبه
المزيد من المشاركات
واللى حياخدك يوم
لازم يكون فارس
ياخدك على حصانه
ويكون أمين حارس
وسط البنات الحور
شفتك فى أحلامى
نايمه فى حضن النور
يا كل أيامى
وملايكةْ الرحمن
حواليكى بيدُوروا
يتغنوا بالقرآن
ويسبِّحوا بنوره
بدعى فى كل صلاه
يارب يحميكى
من شر خلق الله
من غدر لياليكى
وزرعت فيكى الخير
والطهر والعفه
وحكون عليكى بصير
م اللفه للزفه
أول حروف غنِّت
فوق شفتك ” بابا”
كان لحن ربانى
مش عود ولا ربابه
من يومها مش شايف
فى الدنيا غير بنتى
و الدنيا يا مريم
صبحت أنا وانتى .
********************************************
هذا النص مهداه من الشاعر فؤاد ابراهيم لابنته مريم فؤاد ابراهيم
الشاعر فؤاد ابراهيم
