حلم صغير بقلم فاطمه سعد الجر

حلم صغير
فكر يخرج بره الببت
فكر يمشى ع الاسفلت
ويشخبط اسمه على الحيط
فكر يكبر فكر يعرف
حاول يمسك طرف الخيط
كان عايز يتنفس شمس ويشبع نور
عايز جناحته ترفرف برة السور
عايز نقطة حب جميله
تروي عطشه في ايامه القاسيه
وتلم قلبه المكسور
نفسه يدوب مع موج البحر
نفسه يضم الرمل بشوقه
ويكتب اسمه فوق الصخر
زي الناس ما هي عايشه يعيش
طعم القسوه صعب و مر
نفسه سنين العتمه تمر
نفسه لاول مرة في عمره يصبح حر
فكر وملاه الاحساس
لازم يكبر لازم يبقي في وسط الناس
لازم يلمس كل الكون بايديه وعينيه
لازم يعرف فين وازاي ولامتا وليه
مش قادر يتحمل تاني
انه يعيش مكسور وحداني
فكر وامتلكه الاحساس
خرج الحلم في وسط الناس
وعلشان هو حلم صغير مين
هيشوفه
راح الحلم في وسط الزحمة
مات وانداس