حمو بيكا بعد خلافه مع عمر كمال “هفضل أستاذ”

 حمو بيكا مطرب المهرجانات وتفاصيل خلافاته مع عمر كمال

شهدت الساعات القليلة الماضية، حدوث خلاف كبير بين مطربي المهرجانات حمو بيكا، وعمر كمال، على موقع التواصل الاجتماعي «فيس بوك»، ليتصدر بعدها حمو بيكا موقع التدوينات القصيرة «تويتر».

مطرب المهرجانات حمو بيكا

بدأت القصة بنشر حمو بيكا صورة لعمر كمال مصاحبة لعلامة «إكس» على وجهه، وعلق عليها: «ياريت محدش يكلمني في شغل على الشخصية دي، عشان أنا كنت بحبها، والشخصية دى بتتهرب من شغلي اللي خلاني اتفق عليه، والإثبات بعد الصورة دى هنزل فيديو»، مضيفا: «هو عامل بيحبني وهو بيكرهني، مع السلامة يا صحاب مزيفة».

الخلاف بين بيكا وعمر كمال

ولم يكتفي «بيكا» بذلك، وظهر بعدها بأقل من ساعة في بث مباشر، وقال: «من سنتين مكنتش أعرف عمر كمال ولا أعرف مين ده، وجاب رقمي وبعتلي أنا عمر كمال اللي عمل أغنية الغربة وقالي وقتها أنا محتاج أعمل معاك أغنية، قولتله ده مكانك ومكان أخوك وتنزل تشرف أي وقت، وعشان أنا أبيض وبحب الخير لكل الناس فتحتله دراعي وعملتله أول أغنية كلكم عارفينها اسمها مساء النقص الأغنية نجحت ساعتها».

المشكلة بين حمو وكمال

كلمني بعدها بفترة، وقالي نعمل أغنية تانية قولتله تيجي دي مكانك ووافقت عملنا وقتها شمس المجرة بدأت من هنا مهرجانات كتيرة بتجمعنا، ومن فترة كنا بنسجل مهرجان انتي معلمة وهو عمل الفيديو وكان مسؤول عن كل حاجة وعمل كل حاجة لأن التراك ده كان هينزل على قناته بتاعت اليوتيوب وهيكسب منه وأنا عشان قلبي أبيض وكنت بعتبره طيب وغلبان لكن هو مطلعش طيب ولا غلبان».

التبادل بالألفاظ

تابع «بيكا»، في البث المباشر: «بعد ما عملتله أغنيته كنا قاعدين وإسلام ساسو موزع المهرجانات يشهد بالكلام ده كنا قاعدين وكلمت عمر وقولتله فيه تراك اسمه فستان الفرح والناس عايزيني أنا وأنت اتفق ولا لأ، رد عليا قالي اتفق خدت العربون بناءا على ذلك وكلمته تاني يوم كلمته قالي أنا مش فاضي وبدأت أكلمه كتير وكل ما أوصله يقولي مش فاضي وبدأ يتهرب مني وميردش عليا وأنا في الآخر رجعت للناس فلوسها وخليت شكلي مش كويس لأنك أناني بتحب نفسك والناس قالتلي أنت ملكش ذنب أنا بس حابب أقولك حاجة اللي دايم في الدنيا دي هو الصحوبية».

استكمل: «أنت بقى عمال تلم فلوس وتجمع في فلوس وده اللي همك، وأنا هقفل كل التراكات اللي صوتي طالع معاك فيها لأن ده حقي وهتواصل مع الشركة لأنك بني ادم مش كويس».

الإهانات 

اختتم البث المباشر بتوجيه رسالة له هو وحسن شاكوش الذي هاجمه منذ فترة عبر بث مباشر أيضا، وقال: «أنا مبقاش ورايا غيركم انتوا الاتنين العجوز والقصير ربنا يكفيكم شر الغلبان لما هيطلع لأن انتوا مش جاية معاكم بالمحبة ولا بالطيبة وأنا زي ما صغرت مع الناس هصغركم انتوا الاتنين».

وفي بث مباشر عبر صفحته الرسمية على موقع التواصل الاجتماعي «فيس بوك»، رد مطرب المهرجانت، عمر كمال، على هجوم حمو بيكا، وقال: «أنا تحملت كثير جدا إهانات بعض الناس، لكن أنا ممكن أطلع أقولك يا (أبوكرش) لكن كل دي إهانات أنا ماليش فيها».

انتي معلمة

وأضاف «كمال»: «أنا أول أغنية أتربح من خلالها كانت من خلال أغنية (انتي معلمة)، وكل الأغاني اللي قبل كده كنت بديها لحمو بيكا، عشان يرفعها من خلال قناته ويكسب منها بما فيهم أغاني كانت من إنتاجي أنا، والله مكنتش باخد فلوسهم لأني بكسب من زمان وسيبتك تاكل عيش».

هفضل أستاذ 

لم تمر ساعات قليلة على «خناقة» مطرب المهرجانات حمو بيكا، مع الفنان عمر كمال، بسبب «الأموال» التي يحصلها كلا منهما من يوتيوب، وقيام «بيكا» بتوجيه انتقادات لاذعة لـ «كمال» وتأكيده بأنه «مش عايز يعرفه تاني»، حتى تم اليوم الإعلان عن مهرجان غنائي جديد يجمعهما معا بعنوان «هفضل أستاذ».

الأمر الذي جعل متابعيهم عبر السوشيال ميديا يصفون خلافاتهما بـ«الزائفة» من أجل «التريند»، وسبق «بيكا وكمال» في هذا الأسلوب الثنائي محمود العسيلي وأمير عيد، اللذان افتعلا أزمة حول أحقية كل منهما بملكية أغنية «دنيا جديدة»، ليتضح بعد ذلك أن الأمر مجرد خلاف مفتعل للترويج لدويتو غنائي يجمعهما، بحسب رواد مواقع التواصل الاجتماعي.