..حوار على الفيسبوك

..حوار على الفيسبوك
الزوج السابق : اخيرا عرفت الاقيكى على الفيسبوك ازيك
الزوجة : الحمدلله بخير
الزوج السابق : حبيت اطمن عليكى وعلى حالك
الزوجة : بخير الحمدلله .خير كنت عاوز منى حاجة
الزوج السابق : حبيت اطمن
الزوجة : خلاص اطمنت انا بخير
الزوج السابق : انتى ليه بتتكلمى معايا كده نسيتى الحب ال كان بينا ببساطة كده.
الزوجة : الحب ؟ ملوش لازمة الكلام ده انا دلوقت متجوزة وسعيدة فى زواجى
الزوج السابق : انتى مااتجوزتيش عن حب
الزوجة : مفيش حاجة اسمها حب دى خالص
الزوج السابق : ازاى تقولى كده انتى نسيتى حبنا
الزوجة : واتفرقنا ليه ياترى
الزوج السابق : كانت غلطة ارجوكى تسامحينى
الزوجة : هو انت بتعتذر عشان كسرت القلم بتاعى والا ضيعت لى الاستيكة .انت جاى تعتذر بعد 10سنين .
الزوج السابق : انا اكتشفت انى مش قادر اعيش من غيرك وانا مش سعيد فى جوازى
الزوجة : انت لسه سمعك تقيل
الزوج السابق :سمعى تقيل ؟ مش فاهم
الزوجة : عمرك ماسمعتنى انت بتسمع صوت نفسك بس
الزوج السابق : وانتى مفيش بينك وبين جوزك حب
الزوجة : فعلا ال بينى وبين جوزى مش حب
بيقول لى كلام حلو كل يوم الصبح ويقول كلام احلى وهو فى ازماته …بيشوف طلباتى ويحرص يحققها ولو ماقدرش بيعتذر ويطيب خاطرى بكلمتين ….جوزى بيقف معايا فى المطبخ يحكى لى يومه واحكى له يومى
جوزى باتكلم معاه ببساطة ال فى قلبي على لسانى مش بانمق كلامى واختار اسلوبى بيتقبلنى كما انا …جوزى بيتمشى معايا عارف انى باحب المشى ويشترى لى ورق والوان لانى باحب الرسم بيجيب لى بسبوسة لانى باحب البسبوسة …جوزى بيود اهلى ويرحب بوجودهم وانا باحب اهله عشانه وباتودد لامه عشان هو بيحبها وباحب القهوة عشان اشربها معاه وباحب ام كلثوم عشان اسمعها معاه .
جوزى لما بامرض بالاقيه جنبى يطببنى ويسيلينى ويطيب خاطرى ويضحكنى عشان اخف بسرعة . جوزى علمنى ان مفيش حاجة اسمها انا عصبية لانها عادة مكتسبة علمنى الشخص الحليم علمنى معنى الحوار عند الخطأ ويتقبل اعتذارى ويقولى عارف انك مش قاصدة وانه خطأ غير متعمد
جوزى علمنى معنى الطاعة والعبادة واداوم على صلاة الفجر وقيام الليل معنى العمل الصالح وازاى نعمل خير …ال بينا خارج معتقداتك ال بينى وبين جوزى حاجة احلى كتير من الحب ال بينا سكن ومودة ورحمة
وانا متاكدة انك مش سعيد فى جوازك عشان التلاتة دول مش موجودين
الزوج السابق : من فضلك
الزوجة : من فضلك انت ماتكلمنيش تانى ولاتدور على غلطتك فى حقى كانت احسن حاجة انت عملتها لولاها ماكنت عشت السعادة الحقيقية .
…شروق فريد