حوار| كريم عبد المنعم “حبيب الزملكاوية”: 90٪ من قوة برشلونة في وجود ميسي .. وأرى الزمالك في وجه حسن شحاتة

بدأ حياته كلاعب ناشيء في عدة أندية،كان أبرزها النادي الإسماعيلي حتى سن 20 عاماً، ثم شاءت الأقدار أن تقف الإصابة عائقاً في طريقه لتقف مسيرته كلاعب كرة قدم عند هذا الحد، ويبدأ في سلك درب جديد لم يبعد كثيراً عن نفس المجال الذي يجري في دمه فتحول من لاعب إلى محلل مباريات كرة القدم العالمية والمحلية، زملكاوي من القدم حتى النخاع، لقبه جمهور الزمالك بحبيب الزملكاوية، له دائماً وجهات نظر صائبة في تحليلاته لمباريات الكرة العالمية أو المحلية، فهو يرى الأمور من منظور مختلف عن أي مشجع عادي ، لا يأخذه التعصب بعيداً عن لمس نقاط الضعف قبل القوة لكل فريق، لديه حنكة قوية وبصمة فريدة ورؤية خاصة لتحركات كل لاعب على أرض الملعب.

إنه ” حبيب الزملكاوية” كريم عبدالمنعم، أجرينا معه حواراً صحفياً بموقعنا “أسرار المشاهير” لمعرفة كواليس وأسباب تركه لعب كرة القدم واتجاهه إلى مجال الإعلام والتحليل وسر حبه لنادي الزمالك والسبب خلف لقب “حبيب الزملكاوية” ، فكان حوارنا معه كالتالي:

★★حدثنا عن نفسك..من هو “حبيب الزملكاوية” كريم عبدالمنعم ؟

أنا كريم عبدالمنعم، لعبت في قطاع ناشئين نادي الإسماعيلي فترة كبيرة إلى سن 20 عام، ثم اتجهت بعد ذلك إلى الإعلام وإلى التحليل..

حللت مبارايات كأس العالم 2018، ودوري أبطال أفريقيا، وبعض ماتشات الكرة الأفريقية، وبحلل دلوقتي الكرة العالمية والدوري الإنجليزي ، وبعض مباريات الزمالك في قناة الحدث.

★★لماذا تركت اللعب واتجهت للتحليل ومن أول من رشحك لذلك ؟

الإصابات طبعاً كانت خلف تركي لعب كرة القدم، وكابتن وائل عيسى هو من رشحني لتحليل المباريات وتوسم بي خير في هذا المجال، وحابب طبعاً أشكره جداً على دعمه المستمر وثقته الكبيرة دائماً.

★★ما السبب وراء لقب “حبيب الزمالكاوية” ؟

حبيب الزملكاوية ده لقب طلعوا عليه جمهور الزمالك لإنه شايف إني في يوم من الأيام هكون في أكبر المنصات الإعلامية وهدافع عن الزمالك وأديله حقه، فلقبوني بحبيب الزملكاوية، فممكن تكون جاية من شدة حبي وإخلاصي ودفاعي عن نادي الزمالك.

★★ما هو السر خلف حبك لنادي الزمالك ؟

أنا بعتبر نفسي اتولدت زملكاوي، أنا خالي كان بيفرجني وأنا صغير معاه على الماتشات ومقاليش خالص إني أشجع الزمالك، أنا اتفرجت وعجبني لعب الزمالك، ومن وقتها أنا متعلق بنادي الزمالك وبحبه جداً..

النادي الأهلي نادي كبير طبعاً بس دايماً كُرته إيجابية أكتر ماهي ممتعة، لكن أنا بستمتع بكرة الزمالك ولعبه أكتر، لعبه ممتع، بحب أتفرج وأستمتع بالكرة معاه، كمان لو بصينا على عمالقة الكرة الموهوبين في تاريخ مصر هتلاقي إن لو في الأهلي كابتن الخطيب، كابتن أبو تريكة، كابتن وليد صلاح الدين، لو روحنا للزمالك حدِّث ولا حرج، كابتن حسن شحاته، كابتن فاروق جعفر، كابتن حمادة عبداللطيف، شيكابالا، حازم إمام، كابتن أحمد الكاس، علي خليل، عفت نصار، أيمن حفني، جمال حمزة، اللاعيبة دي هي اللي عملت شعبية للزمالك، الزمالك فترة طويلة مأخدش بطولات حوالي 10 سنين عجاف من 2004 لـ2014، لكن رغم ذلك شعبيته كانت بتزيد، ورغم كده الإحصائيات أثبتت إن جمهوره كان بيزيد، وده بسبب اللاعيبة الحريفة جداً الموهوبة اللي بتفرق في تاريخ أندية الكرة.

أنا بالنسبالي شجعت الزمالك من حبي لكابتن أحمد الكاس، ويعتبر سبب من أسباب عشقي للزمالك، ومش أنا بس في ناس كتير شجعت الزمالك من حبهم وتشجيعهم للاعب معين، فعلاً كابتن أحمد الكاس لاعب عظيم، وهي دي اللاعيبة اللي بتتسبب في زيادة جمهور النادي مش فوز بدوري أو غيره.

★★كيف ترى جماهير الزمالك ؟

ياريت كل الجماهير زي جماهير الزمالك، جماهير عندها ثقافة ووفاء بشكل مش موجود عند أي جماهير لنادي تاني، جماهير تمتلك مثالية ووفاء وإخلاص للنادي بشكل مش طبيعي، الزمالك قضى عشر سنين عجاف بدون ما يفوز بأي دوري، لمدة عشر سنين وجماهير الزمالك بتحبه وبتعشقه ومع ذلك حبها للنادي كان بيزيد، أنا أرى أن أفضل جمهور في الوطن العربي هو جمهور نادي الزمالك وده مش كلامي بس ده كلام كل النقاد حتى النقاد الأهلاوية، وده على فكرة بيصعب الأمور شوية على لاعبي الزمالك، لإن لما يكون ورا اللاعب جمهور واعي يعني مش هيقبل بأي أداء، مش هيقبل غير أداء قوى وممتع ومش هيعرف يضحك عليهم بأي مكسب وخلاص.

★★ما رأيك في فوز الزمالك 1_0 على النجم الساحلي في مصر؟ وهل كانت النتيجة كافية أم لا ؟

النتيجة مميزة جداً رغم إن فيه زمالكاوية كتير شايفين إنها مش كبيرة ومش كافية، وأنا شايف إن أهم حاجة إن الزمالك سجِل هدف لصالحه ومستقبلش..

المدير الفني لنادي الزمالك كريستيان جروس فكر إنه ميستقبلش أكتر من إنه يسجل وده الصح، لإن الهدف في ملعبك بيدي الأفضلية للمنافس، لكن نتيجة واحد صفر بدون استقبال أهداف بتقلل سيناريوهات أفضلية المنافس أو فوزه، فأنا من وجهة نظري إن الزمالك ظهر بأداء كويس  وأن كريستيان جروس أدار اللقاء بشكل رائع وحصل على ما كان يتمناه من هذا اللقاء، وأعتقد إن الزمالك في لقاء العودة هيلعب على تسجيل هدف وتصعيب المأمورية على النجم الساحلي.

★★ما هي النقاط التي يجب تركيز نادي الزمالك عليها لتفادي ضغط جماهير النجم الساحلي في تونس ؟

بالفعل المباريات في ملاعب تونس صعبة جداً، بسبب ضغط الجماهير الشديد على المنافس، الجماهير هناك عامل إيجابي جداً لفريقهم وفي نفس الوقت عامل سلبي جداً على الخصم، وبيلعبوا على المنافس ويرهقوه ويشتتوا ذهنه جداً، لاعبي الزمالك لابد أن يدركوا ذلك، ويلعبوا بكل تركيزهم على مدار الـ90 دقيقة ، من أول دقيقة لأخر دقيقة التركيز هيفرق جداً في حسم المباراة..

نقطة تاني لازم يتعاملوا مع الضربات الثابتة، لإن النجم الساحلي بيلعب الضربات الثابتة حلو، وده كان واضح بالنسبالنا اللقاء السابق وشوفنا أد أي هما متفوقين فيها

الفرقة هتحاول توترهم وتخرجهم عن تركيزهم، ويبدأوا يخترقوا دفاعات الزمالك، ودي إستراتيجية عندهم ومعروفة أوي، المغرب تونس الجزائر دايماً بيلعبوا على ضغط المنافس، فلازم لاعبية الزمالك يركزوا جداً ويستقبلوا كل ده بهدوء ويكونوا فاهمين عشان ميتوتروش ولا ينساقوا ورا أي مشكلة سواء في أرض الملعب أو مع الجمهور التونسي.

★★ما هي توقعاتك للدوري..فهل يتمكن الزمالك من الصعود رغم تقدم الأهلي بنقطة ؟

الدوري لسه بدري جداً عليه، لسه الزمالك عنده ماتشات مهمة والأهلي عنده ماتشات مهمة، ممكن الأهلي يفقد نقاط، وممكن الزمالك يكسب نقاط، الزمالك لو عايز يكسب الدوري لازم يكسب ماتشاته كلها وأنا كزملكاوي معتبر إنها فرصة للنادي إنه يكسب الأهلي لإن الفوز مش هيكون ليه طعم ولا قيمة ومش هفرح بالدوري من غير ماكسب الأهلي، توقعاتي حالياً إن الدوري بنسبة 50 ٪ للزمالك و50٪ للأهلي إلى الآن.

★★ما رأيك في آخر مباراة بين ليفربول وبرشلونة ؟ وماذا عن رأيك في أداء محمد صلاح ؟

أنا تابعت اللقاء طبعاً والحقيقة شايف إن صلاح كان من أفضل اللاعيبة في اللقاء، وليفربول أدى بشكل كويس جداً جداً، لكن سرعة ميسي كانت الأبرز والأقوى والمسيطرة على المباراة، حتى أنا قولت في مداخلة هاتفية  بعد المباراة مباشرة على إحدى القنوات عقب المباراة، إن يورجن كلوب المدير الفني  لفريق ليفربول كان واضع خطة قوية جداً قدر يحلّْ بيها فريق برشلونة بشكل كبير وكان فارد إسلوب لعبه كويس جداً، لكن الفكرة زي ما نوهت مسبقاً في ميسي، أنا دائماً أرى أنّ ميسي كيان وبرشلونة كيان أخر، وأعتقد لولا وجود ميسي كانت الأفضلية هتكون لفريق ليفربول طبعاً.

أنا تابعت كل مباريات الدوري الأسباني هذا الموسم وأعتقد أن 90٪ من قوة برشلونة متكتلة في وجود ميسي فقط، ولولا وجوده في فريق برشلونة هذا العام كان ممكن لقاءات كتير جداً متتحسمش لصالح برشلونة وكانت النتيجة هتتأخر بفرق جول واتنين وتلاتة على مدار كل مبارياتها.

فأنا شايف إن أداء الفرعون المصري محمد صلاح بشكل خاص وأداء ليفربول بشكل عام كان كويس جداً ولعبوا بشكل حلو جداً.

★★هل تتوقع أن تتغير النتيجة في مباراة العودة بين ليفربول وبرشلونة ؟

لا لا، صعب جداً…إلا إذا حصل أي ظروف أبعدت ميسي عن المشاركة في المباراة، ممكن وقتها الفرصة تكون كبيرة جداً في أن تتغير النتيجة، لأن الفكرة كلها زي ما قولت في ميسي وليست في برشلونة، وطالما ميسي متواجد ستسيطر برشلونة دائماً.

★★ما رأيك في أداء فريق أياكس المبهر وفوزه على فريق توتنهام على أرضها ؟

أداء أياكس المتميز ده مش وليد الصدفة خالص، “كرويف” واحد من أعظم لاعبي برشلونة، وهو هولندي الجنسية والأداء الرائع اللي بيقدمه في برشلونة من تدريبه وتعليمه في الناشئين في بلده، لأنهم في متعودين على اللعب ده بالطريقة دي وبالفكر ده والشكل ده ، في هولندا فريق أياكس مدرسة لوحده في الكرة بعيداً عن أي نادي تاني، ودايماً بيسلك طرق حديثة في اللعب، كل اللاعبين المتواجدين في فريق أياكس حالياً كلهم لعبوا في مراحل عمرية صغيرة في الناشئين ما بين “15، 16، 17” سنة.

ولأنهم كانوا دايماً حاطين إستراتيجية ممنهجة من حوالي عشر سنين إزاي يطلَّعوا فريق قوي كده ويشتغلوا عليه من مراحل عمرية صغيرة شوفناه دلوقتي بالأداء المبهر اللي ده، فأنا أعتقد إنه صعب جداً فريق أياكس يظهر بالأداء ده لمجرد مدير فني جالهم من سنة أو سنتين لكن الواضح إن دي استراتيجية قوية جدا نشأوا عليها من البداية ، حتى اللاعيبة في الملعب فاهمين بعض جداً، كأنهم بيلعبوا مع بعض من زمان جداً من أعمار سنية واحدة.

أنا أرى أن أياكس واحد من أفضل فرق دوري أبطال أوروبا وتمكَن من لفت أنظار كل الجماهير إليه، ولما يكسب فريق بحجم توتنهام فأعتقد ده أخد منهم شغل جامد جداً عشان يقدروا يوصلوله.

★★بنسبة كم بالمائة تتوقع أن تقلب توتنهام الطاولة على أياكس وتكسبها على أرضها وتغير النتيجة ؟

هو صعب جداً، لو قولنا بنسبة كام في المية هتكون لا تتعدى الـ20٪، أنا متأكد إن أياكس ستفوز بجولين أو ثلاثة على الأقل في لقاء العودة.

★★ماذا عن رؤيتك في استمرار محمد صلاح في فريق ليفربول الإنجليزي ؟

والله أنا شايف إن اللاعب محمد صلاح لو بيدور على حصد جوائز شخصية ممكن يكمل في ليفربول، لإنه في ليفربول بيحصد جوايز شخصية كتير جداً، (كأفضل لاعب في ليفربول، أفضل لاعب في الدوري الإنجليزي، كأفضل لاعب في إنجلترا، هداف الدوري الإنجليزي)..

لكن لو بيدور على بطولات جماعية أعتقد إنه لازم يمشي من ليفربول، لو عايز ألقاب جماعية مع فرق أوربية لازم يمشي خاصة لو جاله فريق زي ريال مدريد أو برشلونة، لا يتردد أبداً لإنهم كمان بيساعدوا على حصد ألقاب شخصية، فلو ذهب صلاح لواحد من الناديين دول هيحصد ألقاب على المستوى الشخصي وعلى المستوى الجماعي كمان.

★★من وجهة نظرك مَن الفريق القادر على تعطيل مسيرة مانشستر سيتي خلال الجولات القادمة ؟

كلنا كمصريين وجماهير ليفربول كان أملنا على مانشستر يونايتد إنها تعطل مانشستر سيتي شوية بتعادل أو بخسارة، لأنه الفريق الأقوى ضمن الفرق اللي هتلاعبها مانشستر سيتي في آخر 3 لقاءات، لكن واضح إن مانشستر يونايتد كان عنده مشاكل خلال الفترة اللي فاتت وقدر مانشستر سيتي يعديه بشكل سهل جداً، ودلوقتي ممكن نحط أمل على ليستر سيتي لكن من وجهة نظري إن الأمل هيكون طفيف جداً.

فأنا أعتقد بنسبة كبيرة أن الدوري حُسِم لصالح مانشستر سيتي بنسبة 95٪ ، ليفربول ضيَّع الدوري، ومن وجهة نظري ده أصعب دوري لليفربول من سنة 91 ، فأعتقد بنسبة كبيرة إنه خرج من الموسم وخسر الدوري وهذا الموسم سيكون موسم صعب جدا ًعلى جماهير ليفربول.

★★ماذا عن رد فعلك إذا عُرِض عليك الذهاب إلى قناة الأهلي ؟

لاء مش هوافق، والموضوع مش عنصرية أبداً، ولكن مش هيكون فيه مصداقية، أنا واحد معجون زمالك من طفولته، فلو قبلت عرض قناة الاهلي مش هيكون فيه مصداقية ، طبعاً الأهلي كيان كبير وأنا أُكِن له كل احترام، لكن لو قبلت العرض لا الأهلاوي هيصدقني ولا الزملكاوى هيصدقني برده، أنا بحب الزمالك وبحترم الأهلي، لكن أنا زملكاوي فقط.

★★من وجهة نظرك ما الفرق الحماس والتعصب ؟

الحماس: إنك تشجع فرقتك وتساندها وتدعمها في المكسب والخسارة.

التعصب: إنك متشوفش فريقك وحش أبداً، حتى لو أخطأ وده من تعصبك للكيان ده اللي بيخليك تدافع وبس، وده دفاع أعمى طبعاً بدون أي وعي.

★★من هو أكتر شخص دعمك خلال مسيرتك المهنية ؟

كابتن وائل عيسى، وهو صاحب الفضل الأول عليّ بعد ربنا سبحانه وتعالي، لإنه دعمني كتير ومازال بيدعمني ، وحقيقي مهما أشكره مش هوفيه حقه أبداً، وأنا من خلال حواري ده بوجهله رسالة شكر وتقدير وبقوله شكراً لحضرتك يا كابتن على تدعيمك الدائم وثقتك الكبيرة وكل سنة وحضرتك طيب.

★★صِف كابتن حسن شحاتة بكلمة ؟

أنا أرى الزمالك في وجه كابتن حسن وفي ملامحه، فهو واحد من أعظم 3 لاعيبة في تاريخ مصر

ختاماً..ماذا تعني لك تلك الكلمات:…

_الزمالك: حبي الأبدي

_محمد صلاح: استطاع تغيير خريطة الكرة في مصر… وهو أعظم  لاعب في تاريخ مصر

_الإسماعيلي: ليه جزء كبير جداً في قلبي، يعني لو قلبي أبيض فأنا دمي أصفر عشان الإسماعيلي