حوار| محمود فارس: العمل السينمائي الأقرب إلى قلبي.. ووالدي أول من دعمني وشجعني
محمود فارس: أعتز بكل أدواري وأتمنى تجسيد سيرة الراحل بليغ حمدي
حوار/ فاطـمة عبدالحميد
فنان صاحب ملامح مصرية أصيلة، يمتلك كاريزما وطباع ابن البلد الشهم، يسعى دائماً للتميز والانفراد بالشخصيات التي يقدمها حيث يرغب في الوصول بها إلى قلب المشاهد ويبقى هو هدفه الأول والأخير، ليس لديه سقف لطموحاته وأحلامه رغم مسيرته الفنية المرصعة ببصماته الفريدة إلا أنه يسعى دائماً للأفضل، إنه الفنان المصري محمود فارس.
أجرينا معه حوار صحفي شامل يبرز أهم المحطات في حياته على المستوى المهني والشخصي، فكان الحوار كالتالي:
بعد الانتهاء من محمد حسين ودفع رباعي ثم ورقة جمعية..كيف تمكنت من التوفيق بين مواعيد التصوير المختلفة الفترة الماضية؟
هو كان ضغط كبير طبعاً لكن التصوير مكنش في وقت واحد الحقيقة، أنا خلصت تصوير فيلم محمد حسين الأول، بعدها بدأت تصوير فيلم دفع رباعي وانتهيت منه، بعدها ابتديت تصوير ورقة الجمعية وخلصته وبدأت دلوقتي الهجام مع أحمد عبدالله محمود ومحسن منصور ونهى عابدين ووائل عبدالعزيز.
ماذا عن الشخصيات الثلاث.. فما الفرق بين كل شخصية والأخرى وانطباعها على نفس محمود فارس؟
كل عمل مختلف عن التاني خالص، لكن كلها لايت كوميدي ، هي حاجة مختلفة وإن شاء الله هتعجبكم.
ماذا عن تجربتك الفنية مع النجم محمد سعد في فيلم محمد حسين؟
حقيقي انبسطت بيها جداً، رغم إني أول مرة أشتغل مع محمد سعد وكان بترشيح من ا. محمد عادل المخرج ، لكن بصراحة محمد سعد كان عظيم جداً وهتشوفوا فيلم جديد ومختلف إن شاء الله.
هل هناك أعمال للماراثون الرمضاني المقبل وماذا عن تجربتك مع التليفزيون بعد حالة النشاط السينمائي التي تعيشها الآن؟
آه طبعاً فيه…وأنا ستاند باي للتصوير، وفي حاجة إن شاء الله لرمضان لكن مخليها مفاجأة مش حابب أكشف عنها دلوقتي، وإن شاء الله السنادي فيه مفاجأت كتير يارب على خير وتعجبكم.
العمل التليفزيوني والسينمائي..أيهم أقرب إلى قلب محمود فارس..ولماذا؟
أنا بحب التمثيل عموماً سواء السينمائي أو التليفزيوني هي هي نفس المهنة أفلام كانت ولا مسلسلات، لكن الحقيقة في ميول أكتر للسينما، هي المقربة لقلبي أكتر شيء.
على أي أساس يختار محمود فارس أدواره؟
أنا من أول ما يتعرض عليا أي عمل فيه روح كده بحبها أو لاء، أولاً بشوف العمل كله هل القصة حلوة، لو حلوة يبقى تمام ، بعدها بشوف دوري جوا العمل حتى لو صغير لكن هل هو مؤثر فعلاً، إذا كان كده فتمام جداً بتوكل على الله، إلى جانب إن الشخصية لازم تكون مختلفة، يعني بدور على شيء مختلف دايماً، بس عامة الناس بتحب منطقة البطل الشعبي أوي وأنا حابب أقدم للناس الشخصيات دي وبتستهويني جداً.
ما الدور الذي قمت بتجسيده وكان المفضل إلى قلبك دائماً مهما تعددت الأدوار والشخصيات بعده؟
أنا مبدئياً بعتز بشغلي كله، ورغم إن في شخصيات كتير لسه معملتهاش لكن أنا فخور إني عملت شخصية هشام نصر في الزيبق وتم اختياري ليها ، كمان شخصية خيري رستم في طاقة نور شوية كانت شخصية كرتونية صنعت مكانة كبيرة مع الجيل الصغير اللي لحد 15 سنة ده، الفئة دي بالتحديد وسعدت بيها جداً، برده شخصية الغريب في ظل الرئيس، أنا بحب كل دور عملته لحاجة مميزة فيه، بحبهم كلهم فعلاً.
هل لديك أدوار ندمت على تجسيدها؟
لا خالص، معنديش دور ندمت عليه أبداً، بالعكس أنا بحب كل أدواري جدا وبشوفها حلوة، أينعم كلها فيها تتابع وتتدرج من البدايات لحد دلوقتي لكن طبعا بحبها كلها، يعني أنا أفتكر شخصية حورس اللي عملتها في بداية ما وقفت على المسرح في أوائل التسعينات، دي لحد دلوقتي معلقة مع الناس وبقى أصحابي مسميني حورس، يعني أثرت فيهم جداً لدرجة إنها بقت شخصية حقيقية موجودة وعايشة معاهم لحد دلوقتي.
شخصية على المستوى الفني أو التاريخي أو الاجتماعي ترغب في تجسيد سيرتها الذاتية..ولماذا؟
بليغ حمدي
أولاً بحبه جداً
ثانياً عايز أعمل شخصية رومانسية، وملقتش مزيكا أجمل وأبدع من بليغ حمدي عشان أجسده.
فنانة على الساحة الفنية حالياً ترغب في تجسيد البطولة المطلقة أمامها؟
أنا أحب أشتغل معاهم كلهم طبعاً .. لكن لو أُتيحت ليه الفرصة إني أختار هيكون أول حد أختاره منه شلبي، ولو محصلش نصيب مع منه ممكن نكتشف شخصية جديدة بقى.
ماذا عن رؤيتك لحال المجال الفني حالياً..هل تدنى المستوى عما سبق ؟
والله أنا شايف إنه رغم الفوضي اللي حصلت الأيام اللي فاتت والدوشة الكتير إلا إننا في عصر قوي جداً من الإبداع والنجاح ومش هيتكرر تاني، الناس دلوقتي بتاخد فرص كبيرة وعظيمة إحنا قعدنا نبنيها لنفسنا من 25 سنة فاتوا، دلوقتي الفرص بقت كتيرة جداً والإبداع بقى خيالي بقينا قادرين نحقق الأوسكار رغم كل الدوشة دي، ومهما إنتاجنا السينمائي اتكلف الجمهور بيغطي التكلفة دي وزيادة وده نجاح في حد ذاته، فرغم اللخبطة والهفوات اللي بتحصل لكن فعلا في حالة إبداع كبيرة وحقيقية.
من أكثر شخص دعمك منذ اكتشاف موهبتك ودخولك المجال الفني حتى الآن ؟
أول حد دعمني على المستوى الشخصي كان والدي طبعاً ربنا يرحمه، وبعده مراتي بصراحة ربنا يبارك فيها.
وعلى المستوى المهني أستاذ أحمد زكي وأستاذ خالد صالح ربنا يرحمهم، حقيقي كان ليهم أفضال كتير عليا.
إلى أي مدى طموحاتك؟
مفيش حدود لأحلامي وطموحاتي حقيقي خالص، وكل اللي عملته مجرد خطوة واحدة بس من كل اللي حلمت بيه، ولحد دلوقتي ما زلت بجتهد إني أقدم نفسي للناس بالشكل اللي بحلم بيه، لأني فعلاً نفسي أعمل حاجة تلمس الناس وتتكلم عنهم.
إلى أي مدى يعني لك الجمهور؟
الجمهور هو المالك، صاحب الكلمة الأولى والأخيرة، إحنا بنشتغل عشانه وليه ، هو اللي بيحب بطله ويختاره ويرفعه للسما، الجمهور هو النجاح الحقيقي للفنان.
ماذا عن رد فعلك إذا فاجأك أحد أبناءك برغبته في دخول المجال الفني؟
هو حر طبعا….ده قراره هو مسؤول عنه ولو احتاجني هيلاقينى جنبه ومعاه طبعاً…لكن أتمنى إنه يبني نفسه بنفسه…حلو أووووي إنه يحقق أحلامه بنفسه وبطريقته الخاصة ويكون أكتر واحد عارف هو عملها إزاي وتعب فيها أد أيه.
وجه رسالة لـ شخص خذلك وقت احتياجك إليه
أقوله شكراً
ماذا تعني لك الكلمات الأتية والرد بكلمة واحدة؟
2018…….بحبها
المرأة…….الملكة
الكره….معرفوش
النجاح…..طموح
اليأس…. لاء
الأبناء…مُلْك الدنيا
