حوار| نضال الشافعي: أتمنى الفنانين يخلوا بالهم من تصرفاتهم..قيمة الفن خسرت كتير في 2018
نضال الشافعي: التعاون المصري العالمي يثري العمل فنياً وتسويقياً ويعمل على إمتاع الجمهور
فنان يمتلك هدفاً ثابتاً يسعى لتحقيقه، حال المجال الفني يشغل تفكيره دائماً ويرغب في تحسينه وتغييره للأفضل، يؤمن برسالته الكامنة خلف مهنته الصعبة ويخطو دائماً نحو أهدافه التي يسعى لتحقيقها، يرغب في إصابة قلب الجمهور بسهام أدواره الفنية التي تخلد في ذاكرة المشاهد دائماً، إنه الفنان نضال الشافعي.
أردنا بموقعنا “أسرار المشاهير” الخوض داخل كواليس حياته التي تخفيها الكاميرات، لنتعرف أكثر على حياته وطموحاته وآماله التي يسعى لتحقيقها، فكان لنا معه الحوار التالي:
في بداية حوارنا وجه رسالة للجمهور بمناسبة قدوم العام الجديد 2019؟
أنا حابب أقول للجمهور العربي والمصري كل سنة وأنتم طيبين، وربنا يعيد عليكم الأيام بخير وسعادة، ويارب بلدنا تنعم بأمن ورخاء وخير وسعادة لأهلها وشعبها وقيادتها، والأيام الجاية تكون أفضل في كل حاجة إن شاء الله.
شخص رحل في 2018 تفتقده كثيراً؟
كلهم بصراحة، أساتذة أفاضل توفاهم الله ربنا يرحمهم ويدخلهم فسيح جناته أثروا فينا بوفاتهم ورحيلهم زي ما كانوا بيأثروا فينا بأعمالهم العظيمة في حياتهم.
أمنيات مهنية وشخصية ترغب بـ تحقيقها في 2019؟
على المستوى المهني بتمنى ربنا يوفقني إني أصيب عمل مميز يسيب بصمة قوية وإيجابية مع الناس، لإن أكتر شيء بسعى ليه إني أعمل حاجة مميزة وفريدة للناس، تكون تراث وإرث ليا حتى لما أرحل عنهم يفتكروني بالأعمال دي.
على المستوى الشخصي إنه ربنا يوفقني ويباركلي في أسرتي ويرزقني الصحة ويكرمني في حياتي يارب.
أذكر صفة ذميمة لاحظت انتشارها بشكل كبير في 2018 ترفض تكرارها في 2019؟
حابب إن الفنانين يهتموا بتصرفاتهم أكتر من كده شوية، حصلت الفترة اللي فاتت سقطات كتير من فنانين شوهت صورة الفن ومفهومه عند الناس سواء فستان بقا ولا غيره من مواقف غير مقبولة الحقيقة عملت على هبوط الفن والفنانين وتدني صورتهم بشكل كبير عند الناس، وأنا شايف بصراحة إن قيمة الفن خسرت كتير جداً في 2018 ، أتمنى 2019 تيجي و تكون الصورة دي والفكرة دي إتحسنت بشكل أكبر من كده، وقيمة الفن ترجع بنفس قوتها، إحنا في فترة من الفترات مصر كانت مشهورة بصناعات عديدة على رأسها صناعة السينما، إحنا اللي صدرنا الفن للعالم فلازم نحافظ على ده ونفضل بنفس الصورة والقيمة والقامة دي ، مينفعش نتدني ونقبل بأقل من كده خالص، أتمنى الفنانين و الفن يسترجع مكانته مرة أخرى في قلوب الناس ووجدانهم بجد.
ماذا عن العروض القائمة للماراثون الرمضاني المقبل؟
هناك عروض كثيرة تحت الدراسة ومفاوضات قائمة فعلياً، لكن لم يتم الانتهاء من المفاوضات حتى الآن بشكل نهائي.
ماذا عن أجواء التصوير في “زنزانة 7” بعد رفض ستيفن سيجال المشاركة في العمل؟
هي كانت مفاوضات معاه لكنه رفض لأسبابه الخاصة بيه، وللأسف منجحناش في إننا نتعاون وبدأنا الفيلم “زنزانة7″، وأدينا بنصوره أهو مفيش مشكلة خالص، ومعانا فريق عمل رااائع جداً.
عقب الاقتراب من انتهاء التصوير ماذا عن توقعاتك لـ”زنزانة 7″ ؟
بتمنى من الله يرزقنا النجاح والتوفيق فيه طبعاً، لكن مستحيل أعرف أي اللي هيحصل بالتحديد، لكني متفائل لإن العمل حلو جداً، ومعايا المخرج الجميل إبرام نشأت، والمؤلف المبدع حسام موسى، وفريق عمل غاية في الجمال أحمد زاهر ومنه فضالي ومايا نصري والتهامي وأنا متفائل بيهم، وصورنا جزء في القاهرة وجزء في الغردقة وفاضل أخر جزء لسه وربنا ييسر يارب، نتمنى الخير طبعاً والباقي على ربنا.
هل التعاون المصري العالمي شيء إيجابي أم وأد للفن المصري بالبطيء في وجهة نظرك؟
لا خالص، لأن محدش هيغطي على حد، بالعكس التعاون شيء جيد جداً، وفيه عملية إثراء كبيرة جداً للعمل، بالذات لما يكون مُستغَل درامياً كويس، يعني مثلاً لما أمير كرارة اشتغل مع بويكا، وجود بويكا أثرى العمل فعلاً، لكن الفيلم كله رائع وأمير هايل وكل واحد ليه دوره اللي كان جدير بيه جداً، فالتعاون حلو جداً طبعاً وفكرة تُحتَرم تسويقياً وفنياً، وخطوة رائعة جداً وبتمتع الجمهور وتسعده أكتر لما يتفرج على عمل مشترك مصري أجنبي ده شيء رائع أكيد، وبيعمل على تقارب الثقافات وقربها من بعض، فهو شيء حلو جداً طبعاً مفيش خلاف.
هل يوجد دور معين في مخيلة نضال الشافعي يرغب أن يجسده؟
هو الدور بس يكون كويس وفي مسلسل كويس والعرض يكون كويس ويسيب أثر مع الناس وبناءه يكون جيد.
إذا عرضنا على نضال الشافعي اختيار شخصية تؤثر فيه بشكل خاص لتجسيدها فمن سيختار؟
بحب الشخصيات التاريخية جداً وبميل ليها أكتر شيء، يعني أنا الحقيقة أتمنى إننا نسلط الضوء أوي على الشخصيات التاريخية الدينية ونوضح حياتهم ورسالتهم ونعرف الناس رسالتهم الحقيقة، عشان نرد على حاجات كتير الواحد بيسمعها وبتستفزه بجد بدون ذكر مواقف طبعاً، بس فعلاً بتمنى نركز على الشخصيات دي ونبين سنة الرسول الكريم بشكل صحيح وأكيد هيكون بمساعدة المتخصصين طبعاً.
والشخصيات الفنية أكيد مقدرش أنكرها كذلك، في أساتذة كانوا قمة وقامة وقدوة يستحقوا فعلاً إننا نجسد مسيرتهم الفنية والشخصية ونعرف الناس قد أي كان في ظروف صعبة جداً محدش كان يتخيلها ورغم ذلك واصلوا مسيرتهم، نفسي الناس تفهم إن الفن مش مجرد تنطيط ولهو وعبث، الناس دي بتتعب بجد عشان تسعد الجمهور، ولذلك لابد من إعادة صياغة فكرة الفن لدى الجمهور صياغة كاملة.
الشخصيات الفنية الناجحة اللي سابت أثر في وجدان الشعب المصري مهم إنها تتجسد وتتقدم والناس تعرف إزاي أسعدوهم على حساب نفسهم وإزاي عانوا عشان يوصلوا لغيرهم عمل فني راقي على حساب نفسهم حتى، الناس دي مش عرايس خشب، لازم الجمهور يفهم كده ويقدّر قيمة الفن والفنانين بجد وده طبعاً هيكون من خلال تجسيد السير الذاتية الكاملة للشخصيات دي والعمل على إعادة صياغة مفهوم الفن عند الناس.
وجوه على الساحة الفنية نضال الشافعي يؤمن بهم وبقدراتهم؟
كلهم بصراحة، مقدرش أقول حد وأسيب حد،معظمهم هايل وعنده قدرات عالية وموهبة حقيقية وطبعاً كله بيتمنى إنه يعمل لنفسه بصمة خاصة وأنا بتمنالهم التوفيق ويركزوا عشان يطلعوا اللي جواهم فعلاً، بس المهم انهم يترجموه صح ويحسنوا اختيار أدوارهم، لأنها هتأثر في ناس كتير، وبتمنى إنهم يعرفوا إن الفن مش رسالة شيطانية أو مجرد لهو وعبث. لازم يفهموا إنهم قوة مغيرة وقدوة فلازم يكونوا أد ده وبتمنالهم التوفيق أكيد.
إلى أين تصل طموحات نضال الشافعي وإلى أي شيء يسعى؟
أنا طموحي اني استحوذ على بصمة خاصة ليا في تاريخ الفن، أسيب أثر بأعمالي الخالدة في نفوس الجمهور وقلوبهم، أحب مصدر نجوميتي يكون من منطقة اختيار الأعمال الصائبة اللي تسيب أثر جميل في كل نفس.
ماذا تمثل المرأة في حياتك بشكل عام والأم بشكل خاص؟
المرأة كل حاجة، هي الأخت و الأم من المهد ثم الحبيبة ثم الابنة، هي كل حاجة بجد هي كل شحنة فيها عاطفة ومواساة وحنان ومصدر قوة يمدني بالصبر في كل شيء.
أما الأم دي دنيتي وما فيها، هي البركة والخير والسعد ، واحنا عايشين ببركة دعا الوالدين أصلا، فهي أكيد دنيتي بحالها مع أسرتي ، وربنا يقدرني على إسعادها وخدمتها ويديها الصحة يارب.
نضال الشافعي شخص هاديء أم عصبي؟
أنا شخص جوزائي، من ده على ده، أنا بعض الأحيان بكون هادي جداً حتى لو في أمر مستفز بس باخده بهدوء، والبعض الأخر عصبي جداً بدون أسباب، لكنها حالات قليلة الحقيقة، بس في الغالب بحاول أكون شخص هادي وبستوعب كل اللي حواليا على قد ماقدر.
