“ده نصيب” قصده للشاعره حنان جمال
الحق كان على مين؟
القلب ولا العين ولا على الاتنين
الحق كان واضح بس انت كنت كفيف
الحق مش بالكيف
والحب مش غنوة والفُجر صار عِنوةَ
وانا وانت متفارقين
ولقانا عين بالعين أصبح جنون ومحال
الكل صار مختال والفرحة للاندال
والجري للمتاعيس
الكوشة بدون عريس والفرحة مقسومة
اتوزعت شربات والقفلة محسومة
والدمعة بتزلزل جوا العيون انهار
والضحكة لو تنهار تشيب الأطفال
وانا وانت جنة ونار
“القرب مش لينا”
اتقطعوا أيدينا لما لمسنا الفرح
والحزن نازل طرح
وصفع ف وشوشنا
والصفعة بتعلم اسمع وهتكلم
لا ف يوم بقينا لبعض ولا عمرنا هنكون
“أقرب مابينا البعد”
يشبه سواد ف عيون م الهم سهرانة
وانا بردو إنسانة بتعب وبتألم
بصرخ وهتكلم بس اللي يسمع مين
انا وانت كنا اتنين بس النصيب واحد
أَنسِج خيوط لهواك وانت ف جفاك زايد
هبعد يجوز أنساك وحنيني ليك فايض
حتى الحنين حالف ف البعد يغلبني
“ببعد واقول أبني ”
بالله ف حد يحب بالقوة دي ويسيب
“ملناش لقا ده نصيب”