دورس ادارية فقط وحصريا داخل النادى الأهلى

اللي بيحصل من الكابتن الخطيب حاليا ده هو فن الإدارة بعينه.. ازاي تكون داعم للجميع وتخلي الكل حواليك.. ازاي تقدم السبت وازاي لما حد يقدملك خطوة تقدمله عشرة.

الأهلي حاليا بيخطو خطوات عظيمة جدا في إطار دوره ككبير للأندية والأخ الأكبر والداعم الأول.. وقت صفقة متولي الأهلي أدارها بشكل إحترافي للغاية.. وفي عمق الأزمة الحالية للإسماعيلي كان الأهلي هو اللي بيفتح ذراعيه وبيستقبل وفدهم بكل ترحاب، وقالهم شاوروا بس على أي لاعب ولو وافق فده هدية مننا بالمجان لتخطي هذه الأزمة.

الأهلي قدر بذكاء وفي عمق إنطلاقة بيراميدز يشكل علاقة تشاركية هائلة مع الجونة لدرجة تلقيبه بالأهلي ب! وأصبح منفذ للنادي لإخراج مواهبه وشبابه وإثقالهم بالخبرات مثل أكرم وريان والجزار وغيرهم.. وبالتالي وقت صفقة بواليا كان لينا كامل الأولوية.

بيبو النهاردة بيبدأ جولته في الأسكندرية.. وبيزور سموحة وبيوطد العلاقات ومنها صفقة مهمة في السلة وغيرها والعلاقة مفتوحة لصالح الطرفين اللي سموحة هتستفيد أكتر منها.. وغدا سيكمل بيبو جولته داخل الإتحاد وسبورتينج والأوليمبي.

ومش بس محليا الأمر بيتسع لقاريا وتشكيل علاقات قوية جدا مع رئيس مازيمبي وكذلك ماتسيبي رئيس صان داونز والكاف حاليا.. وشوفنا ازاي أدير ملف موسيماني بشكل أعمق من إنتقال مدرب، وأصبح الأهلي هو حديث الساعة في جنوب إفريقيا.

كذلك إهتمام الأهلي بالإنفتاح عالميا وتبادل العلاقات مع كبرى الأندية مثل البايرن والريال.. وشوفنا خطاب بيريز الأخير الموجه للأهلي ورئيسه الخطيب.. وكذلك الفيفا واستثناءها لتيشرت الأهلي بوضعه داخل متحفها بتوقيع رئيسه.

كمان الشراكة مع شركة بريزنتيشن ثم شركة استادات والوحدة الإقتصادية ل٢٠٤٥ ثم بنك سايب وإهتمام الأهلي بتشكيل علاقات وتحالفات رسمية مغلفة بأفكار واستثمارات متبادلة.. وميبقاش الشغل على مشروع فردي بل شراكة وتحالف وسلسلة أفكار ومشروعات مستدامة.

كذلك وقت لائحة النادي في ٢٠١٨ شوفنا ازاي الأهلي قدر يعالج كل الصدامات السابقة في اللائحة المجمدة.. وأشرك اللجنة الأوليمبية في إعدادها.. كذلك العلاقة أكثر من ممتازة مع وزارة الرياضة والدكتور أشرف صبحي اللي صبح وليل بيفتتحلنا مشاريع في مقار النادي المختلفة وآخرها الأقصر.

ومننساش ان العلاقات بين الأهلي والمؤسسة العسكرية كانت منقطعة تماما لسنوات لكن نجح بييو وإدارته في إعادة العلاقات وتوقيع بروتوكول تعاون مع الإدارة الهندسية بالقوات المسلحة للإشراف الكامل على منشآت النادي في جميع فروعه.. وإتمام صفقة أحمد علاء من الداخلية وهو التعاون التعاقدي الأول.

الأهلي سياسيا ودبلوماسيا بيسير بخطى عملاقة وفترة غير مسبوقة.. اسم الأهلي مفيش أكبر منه والكل يتمناك ويسعالك.. وده يسهلك استثمار اسمك وتاريخك وجمهورك واستغلاله على أوسع نطاق.

دروس إدارية فقط وحصريا في ٣ شارع صالح سليم.