دوق ملحك بقا

دوق ملحك بقا … عبارة بنقولها للي بيقول كلام من غير مايفهم هو بيقول ايه
العبارة دي وجب قولها الآن للكثير من البشر

المتابع للسوشيال ميديا يجد أحوال ما أنزل الله بها من سلطان
وللأسف الناس بتنشر وإيه كمان كله بيجوِّد

ياجدعان الفيسبوك مش حايعمل لحد شهرة
حضراتكم وحضراتنا مجرد ناس لقت منفذ تتكلم فيه مع بعضها
مايختلفش كتير عن شبابيك المنور بين الجيران زمان
زي المشهد الشهير في مسلسل عيلة شلش

للأسف
ناس من خلال الفيس عاشت دور النجوم
وده أطلق عندهم أمراض نفسية ومجتمعية خطيرة
أحطرها
الشائعات

وده بدأ انتشاره أكثر مابعد 2011
تبقا قاعد كده في امان الله وسط بشر تلاقي واحد قال لك شفتش ما اعرفش ايه في ايه
جررررررررررررررررري
يروح وحد من اللي قاعدين عامل بوست ومنزله
فوررررررررررررريرة
يتلقط منه ويزودوا عليه
وزغرطي يا اللي ما انتيش غرمانة
ماهو الموبايل في اليد …وعليه باقة …. والكلام ماعليهش جمرك

لا والأكادة يقول لك مصدر موثوق منه
على أساس ان الواد فوركيشة بتاع القهوة اللي بسلامته قاعد عليها مسئول أخبار المنطشئة
إيشي رز بلاستيك
على بيض بلاستيك
مش عارفة نزلوا فراخ بلاستيك والا لأ في المنشورات
ونازلين تحوير في أي هتش
وكله بيشير

موضوع الإعلام ده عمل جنون للبعض كله بقى إعلامي ياجدعان
مع إن مافيش حد مؤهل لكده

ولا خريجي إعلام أنفسهم إلا لمن مارس المهنة وتمرس فيها

لو اني سمعت اللي بيقول من بلغ عدد متابعيه 5000 أو أكثر يتم معاملته كمؤسسة صحفية

يعني بالصلاة على النبي
عن نفسي عندي على الأقل سبع مؤسسات صحفية
سواء بصفحتي الشخصية
أو صفحاتي العامة
وعلى فكرة لا أعتبرني إلا مجرد هاوية للكلمة …
أحاول من خلالها تقديم مايفيد …وجمع الناس على عمل نافع أو كلمة سواء
يعني الموضوع ماله علاقة أبدا بأي حرفة من أي نوع

خلاصة الكلام
مرر كل كلمة على عقلك قبل أن تسارع بنشر مايثير فتن من أي نوع فتصبح من حيث لاتدري خنجرا في ضهر بلدك
وخلي بالك أحسن بجد مسَّخِت قوي
وسلام يا أهل الكلام

—————–
فاتن فتح الله نصر