حوار / مي اسماعيل محمد

“لا أشعر بالوحدة أبدا عندما أكون مستمتعا بوقتى” انها مقوله شهيره للطبيب المتخصص فى علم النفس أوليفر ساكس تنطبق على ضيفتنا اليوم ..

اليوم سنبحر فى عالم خاص جدا وسنغوص فى علوم النفس البشريه ومن افضل من ضيفتنا ابنة محافظة بني سويف التي واجهت الصعوبات من خلال والدها الذي لم يحبط طموحها يوما رغم العادات والتقاليد وشجعها وزرع فيها ما سيكمل معها حياتها انها نموذج يشرف كونها بنت قويه انها دكتور رشا الجندي استاذ الطب النفسي فهيا بنا لنتحاور معها ونتعرف عليها عن قرب ..

فى البدايه احب ان اعبر لكي عن خالص سعادتي بهذا الحوار .. كثير منا يعرف دكتور رشا الجندي من الناحية العمليه ولكننا نريد ان نتعرف عنها عن قرب لذلك نريد ان نعرف اولا ماهو برجك الفلكي ؟

انا مواليد 21 /9 برج العذراء وبرج العذراء بيكون خيالي شويه

– من ساندك لتصلي لما انت فيه الأن ؟

في كل مرحله فى حياتي بيبقى فى ناس بيساندوني مافيش حد ثابت طول المراحل غير بابا طبعا واهلي وبابا اولهم لانه امن بيا وقدر يفهم شخصيتي  وبعد كده على مراحل كتير فى حياتي وقفوا جانبي ناس كتير قوي لو مثلا على مستوى الجامعه وقفوا جانبي اساتذه كتير جدا لانهم امنوا بيا وكانوا بيشجعوني لحد ماطلعت الاولى على الدفعه واتعينت معيده ومن ضمنهم الله يرحمها دكتورة امل مختار قناوي وبعد كده دكتورة سهير كامل كانت بتدرسلي هى كانت عميد كلية رياض الاطفال جامعة القاهرة ال بتربطني بيها علاقه قويه جدا والله يرحموا دكتور سعيد ابو العيص ودكتور سليمان محمد سليمان ال كان مشرف على رسالة الماجستير بتاعتي فى جامعة بني سويف ودكتور عبدالفتاح غزال استاذ بجامعة اسكندريه ودكتورة سهام حنفي عميد كليه تربية جامعة بني سويف ودكتورة ابتهاج طلبه يعني الحمدلله انا كنت محظوظه جدا ايام الجامعه لما بقه بدأت اخرج للحياة وانطلق فى 2004 ربنا رزقني ربنا رزقني دكتوره شيخة الملا من الامارات دي كان ليها تأثير ونقله جديدة فى حياتي ان من حظي ان كنا بندرس فى جامعه واحده وربنا وضع القبول فى قلبي وقلبها وبدأت صداقه بين عيلتي وعيلتها ولفيت معاها دول كتير فوقفت جنبي وكانت صديقه واخت وام ولما جيت ابدأ ادخل الميديا كان فى ناس وجودها مهم فى حياتي زي بانوراما دراما المنتج حسام مهدي وحاتم مهدي واحمد مهدي وحازم مهدي دول اول ناس ساندوني فى مجال الميديا بعد كده جيه استاذ خالد صلاح اليوم السابع لما بدأت اكتب عندهم فى الجرنال امن بيا وكان سبب تحول كبير لما عملي برنامج مش عيب فى اليوم السابع ورجل الأعمال ايهاب طلعت لما عملي برنامج افهموا بقه وطبعاً مانساش اختي الصغيرة رانيا هى مأمورة جمرك فى مطار القاهرة هى عندها الحته ال بتكملني عندها الواقعيه فوجودها مهم جدا فى حياتي ده غير اصحابي زي اشجان الملط والمستشار عادل عبدالحليم والسيد محمد فؤاد فى ناس كتير قوي يعني كمان صديقي رجل الاعمال الشاب كريم طه.. – الاستاذ الدكتور/ محمد عبد الحميد لاشين كان عميدا لكليتي وفِي عهده لم اتذكر انني حزنت ولو مرة .. – الاستاذ الدكتور والإنسان قبل اَي شيء مصطفى عبد الجواد استاذ القانون بكلية الحقوق جامعة بني سويف .. – سمو الشيخة مايسون القاسمي والدكتور ناصر الفضلي والسيد الراقي خالد الظنحاني من دولة الامارات العربية المتحدة .. – رجل الاعمال ممدوح البارودي الذي اعتبره الاب الروحي لي.. كل منهم أمن بي في وقت من الأوقات ومد لي يد العون بصور مختلفة كمان صديقي الرائد احمد عاصم وصديقتي سندس بالمزينة ورجل القانون السيد المحترم المستشار نادر جعفر ورجل الاعمال المحترم السيد هاشم قيسية الذي ءامن ايمان شديد بنظريتي ( نظرية هرم السلام النفسي ) وتبناها حقاً إعلامياً وإنسانيا والنقيب احمد حسن وكل هوءلاء أكرموني في يوم من الأيام منهم من أكرمني بصفة مباشرة ومنهم من أكرم اهلي الغاليين ولذا فاكرامهم من إكرامي لان سلامي من سلام احبتي والفنان الراقي سامح الصريطي الذي اعتبره اب وأخ وصديق حقيقي واشعر انه واحد من افراد عائلتي وصديقتي الجميلة شيرين فتحي وزوجها السيد محمد عبد الرازق والفنانة الجميلة وفاء عامر والتي لها بقلبي غلاوة خاصة ورجل الاعمال الدكتور عبد العزيز الدخيل من المملكة العربية السعودية: وصديقي الشاب المحترم احمد الديب الذي تكفل بطباعة وترتيب كل اوراقي لرسائل الماجستير والدكتوراة منذ عام ٢٠٠٤ ومازال يساعدني في ترتيب وتنسيق أوراق أبحاثي وكتبي للان والمحامية اميرة همام والأستاذه عبير عوض وادكتورة سمر سيد امام ففي ناس وقفت جانبي ماديا ومعنويا وفى الوقوف بالنصيحه وفي ال وقف انوا يستحملني فى غضبي وال وقف واستحمل احلامي ويصبر عليا .. فاكيد بشكرهم من كل قلبي .

 

– حدثينا اكثر عن والدك ؟

احنا من بني سويف اصلا وبابا كان اول واحد وجوده مهم جدا فى حياتي لانه هو ال رباني وهو ال قدر يفهم شخصيتي قوي وعرف اني عايزه الحريه وعايزه الانطلاق وعندي طموح كبير من قربوا ليا قدر يفهم شخصيتي دي وعرف انى لو اتقيدت حريتي هتعب فهتم قوي انوا يحط جوايا اساس قوي فى التربيه عشان لما اواجه اي مغريات للحياه بعد كده واني هكون لوحدي كتير متاثرش وفعلا لما لفيت بلاد كتير فى حياتي وعشت مع 30 اسره لما بلف الدول وتغربت عن اسرتي بدري بدري والحمدلله ال هو عملوا وزرعوا فيا كان صح فعلا بابا الأساس ال هو حطوا خلاني اعمل حساب واحد بس لربنا سبحانه وتعالي واحب ربنا بس بتبقى قدامي مغريات الدنيا فى الغلط مابقربش منها علشان بحس اني بحب ربنا مش عشان خايفه من بابا او خايفه من اخواتي فده طبعا اول واحد فى حياتي حط جوايا الروحانيه وحب ربنا عشان مهما وجهت فى حياتي مضعفش وماتأثرش وفى نفس الوقت اداني الحريه كان ممكن يقفل عليا ومايخلنيش اتغرب ولا اسافر ويقتل طموحي وكان ممكن مايامنش بيا بس هو امن بيا الحمدلله .

– من قدوتك فى الحياة ؟

بصراحه انا معنديش حد معين اخدوا قدوه فى كل حاجه او اكون زي ده بظبط وده دايما بنصح بيه الناس فاي حد بقابلوا فى الحياه اكبر منى اصغر مني فى سني مختلف عني بحاول اتعلم منوا حاجه اي حد بلاقي عنده حاجه حلوه بتأثر فيا واي حد بيبقى عندوا حاجه وحشه بتعلمني برضوافانا قدوتي كل واحد دخل حياتي واثر فيها ولو 1% وممكن حد 80% فاي حد تعامل معايا واتعرفت عليه او دخل حياتي هتلاقي ليه تأثير عليا فى حاجه سواء هو عمل حلو او عمل وحش الحلو علمني والوحش علمني .

– الم تفكري يوما فى التمثيل كون وجهك به القبول العالي ؟

ميرسيه ليكي اولا انك بتقولي ان وشي فيه القبول ثانيا انا نفسي جدا امثل على فكره لان انى بحس ان عندي الموهبه دي بتاعت الاستعرضات والتمثيل وكنت بعمل ده ايام الجامعه والمدرسه كانوا الفرق ال بيلبسوا الجلاليب الصعيدي او الخليجي ويقعدوا يعملوا استعرضات قدام المحافظ وحفلات المدرسه .. حتى فى حفلات المدرسه كانوا دايما يجبوني ويوقفوني اول واحده وكنت انا ال بدرب زمايلي عليها فى المدرسه وفى الجامعه ودي من هواياتي الكبيرة جدا بس ماعنديش اني اسعي ليها بقول لو فى حد عاوزني هيعرض عليا و ال هيعرض عليا هيجيبلي حاجه مناسبه ويعرضها عليا .. اتعرضت عليا حاجات بس حسيتها مش مناسبه خالص فمحبتش اننا اخوضها بصي دايما فى مراحل حياتي بيبقى فى حد امن بيا فبيوظفني صح كذلك التمثيل احب يكون كده برضوا بس لو اتقدملي شئ كويس ليه لا.

– هل انت شخصية بيتوتية ام عمليه ام مكس بين الأثنين ؟

انا شخصيه بيقولوا ال حواليا اني مليش كتالوج فيا من كل حاجه تلاقيني مرات احب اقعد فى البيت واوقات حابه انطلق جدا ومرات عاقله جدا ومرات مجنونه جدا على حسب اليوم وعلى حسب الحاجه ال بعملها وعلى حسب احساسي بالحاجه ال بعملها فمرات اقعد فى البيت واكون مبسوطه جدا وببقى مش عايزة اخرج واوقات ببقى عايزة اطلع ومش عايزة ارجع فى البيت دلوقتي وممكن افضل سهرانا طول الليل مع صحابي فانا ماليش حاجه ثابته انا فيا من كل حاجه .

– لا يمكن ان يمر هذا الحوار دون ان ناخذ ولو جزء بسيط من علمك ونصائحك لذلك نريدك ان تحدثينا عن الأسباب النفسية التى تؤثر على الأنسان بوجه عام وعلى الأطفال بوجه خاص ؟

بصي احساس الانسان بالحياة ده احساس مهم قوي يعني فى ناس بطبعها كئيبه فبتبقى مهمه جبتيها وودتيها بيبقى ماعندهاش رضا مابتحبش الحياة بتفضل عادي زي ماهيا وفى ناس بطبعها بتحب الحياه يعني ممكن لو حاجه بسيطه مرت بيها حلوه تستمتع بيها وبتكون سعيده بيها بتلاقي الضحك عندها بيجيب ضحك والتفائل بيجيب تفائل فالجو العام دايما بياثر والضغوط ال حولين الانسان سواء الماديه او العاطفيه فلما بيكون الواحد فى حاله حب او الناس ال حواليه بتحبوا بيقدر يتخطى بيهم اى صعوب فهى عوامل كلها بتكمل بعض .. انا بشوف اننا كلنا اتولدنا كلنا فينا خير بفطرتنا واصل الفطرة فينا الخير العدو الأساسي لاي انسان ليتخطى اي ازمه علاقتنا بربنا روحانيتنا مع الناس ال حواليكي ال بيحبوكوا ويقفوا جانبكم ده شئ هيساعد الشخص كتير قوي ده بنسبه للكبار فعالم الكبار هو ال بيأثر على عالم الصغار فالطفل مش عايز ام نموذجية او اب نموذجي او اخ نموذجي او معلم نموذجي الطفل عايز ام سعيده واب سعيد ومعلم سعيد فسعديتنا احنا ال حوالين الأطفال بتتنقل للأطفال لان الطفل عندوا براءه اكبر بكتير من انوا يفكر فى الأمور النموذجيه والمثاليه والماديه لو الناس ال قايمه على رعاية الطفل سعداء هو هيبقى سعيد .

– الضغوطات النفسية اليومية صعب حلها من قبل الانسان العادي فما نصائحك لتجنبها او حل ولو جزء منها ؟

داور على ناس بتحبهم وبيحبوك وخليك معاهم فى حياتي انا لما كنت بضايق كنت بجري على حد بحبوا او بيحبني قادره الاقيه بروح اقعد معاه او ابعتلوا رساله اطلب اشوفوا لو مقدرتش اقبلوا بروح انا لناس عارفه انها بتحبني دي حاجه مهمه جدا ان الشخص يتخطى ضغوط الحياه لابد فى اليوم ولو لوقت قليل قوي تقعدي مع حد بتحبيه او بيحبك عشان ده هيساعدكم كتير قوي

 

– الحب طيش ام احتياج ام هروب من الواقع ؟

الحب حاجه اساسيه من حاجات الانسان فى الحياه زي الأكل والشرب والمشاعر هو كمان زي الهوي زي الماء الحب احتياج اساسي جدا جدا من احياجات الحياه وبعد بقه مانصنفوا انوا احتياج اساسي احنا بقه بنهربلوا من ضغوط الحياة وبنتجنن معاه وبنحب الحياة بيه وبتالم بيه وبنعيش مشاعر حقيقيه فى النفس البشريه ده اساسي فى حياتنا من غيروا مافيش طعم للحياه اصلا

– نريد منك نصائح بسيطه للمقبلين على الزواج ؟

انا من وجهة نظري دايما اشوف ياجماعه خدوا الجواز وسيلة فى الحلال تعيشوا بيها مع حد نفسكم تعيشوا معاه عايزينوا وعايزكم ماتخدوش الجواز هدف للاسف الناس تلت تربعها بتاخد الجواز هدف عشان يبقى عندها بيت واولاد وعشان كده زادت جدا نسبة الطلاق لكن انا رايي ونصيحتي وال بقولها لنفسي عمري ماهتجوز لمجرد الجواز لأه انا لازم اكون عايزة البنى ادم واخد الجواز وسيله فى الحلال عايش بيها مع الشخص ده افضل من الحرام بكتير فى ناس كتير يقولك ايه المشي حاجه والجواز حاجه تانية خالص لا طبعا مافيش الكلام ده فدي اهم نصيحه لان ده ال هيخليكم تكملوا مهما قبلتكم مشاكل هتستحملوا وهتعرفوا تسعدوا بعض فاوصلوا لدرجه انكم عايزين بعض من جوه بعيداً عن اي مصالح .

• واخيرا وليس اخرا نريد ان نعرف كيف تقضي دكتور رشا يومها ؟

انا ليا طقوس يعني لما بصحى من النوم مابعرفش اتعامل مع حد اول مابصحى من النوم كل ال حواليا عارفين ده مش ممكن حد ييجي يتكلم معايا وانا لسه صاحيه من النوم على طول بليل بقه قبل ماانام بشغل القرآن واول مابصحي من النوم ببقى مشغله الأبجوره لون اصفر خفيف بيدي احساس بالأستجمام كمان لما بصحي من النوم بقعد كده شويه واحول التليفزيون بفتح الشباك الشمس تدخل ابدأ افوق ببقى حطه جانبي من بليل ال حاجه ال باكولها الصبح بفضل امطع جسمي شويه على السرير يعني ليا طقوس خاصه وكمان كل يوم عندي مختلف عن التاني لو عندي تصوير بروح التصوير وبعد التصوير بقعد مع صحابي لو عندي جامعه اليوم بيختلف لاني بسافر انا عايشه فى القاهرة وانا بدرس فى جامعة بني سويف فاليوم كلوا بيروح فى الطريق ولو معنديش ده وله ده وعندي مقابله مع حد بحب تكون مقابلاتي متأخر ال مهم عندي يكون كل يوم مختلف عن اليوم ال قبلوا بس بضايق جدا جدا لو معملتش حاجه مفيده فى اليوم المفيد بالنسبالي رياضه او شوفت حد بحبوا كمان ببقى مبسوطه اني عملت حاجه مفيده او عملت حلقه حلوه والكلام كان مؤثر وقتي ماتقدريش تحدديه من قبلها ممكن يطلعي تصوير مفاجئ ممكن يطلعلي مقابله مفاجأه وهكذا فديما بقوله للناس ان ميكونش يومك فيه حاجه واحده بس انا لو حصل كده اتعب ازهق لازم حتى لو عندي تصوير اروح بعدوا اقعد مع اصحابوا يعني لازم اعمل حاجه مختلفه تماماً عن المود ال انا عملتوا وبحاول على قد مقدر ادي كل حاجه حقها يعني اهلي واصحابي وشغلي واكيد بابا وماما دول الأساس كمان ببقى مبسوطه لو ربنا بعتلي حد ياخد منى حسنه مش قادره اقولك ببقى مبسوطه وسعيده قد ايه ولما بيجي يوم وربنا مابيبعتليش حد زي كده بضايق جدا انا بحس اننا مختارين ان ربنا يبعتلك حد كده كمان فى حاجه اساسيه بعمله كل يوم ان كل الناس ال عندي على الواتس اب لازم توصلهم منى حاجه معلومه فى الصحه النفسيه لازم يبقى فى ود بيني وبينهم ولازم توصلهم منى حاجه وده بياخد وقت برضوا منى .

وفى الختام اتقدم بالشكر لشخصك الكريم والى اللقاء اعزائي القراء فى حوار جديد ..

مع حبي انا الصحفيه  مي اسماعيل محمد