رامي جمال عن مرض البهاق”حبوا نعم ربنا الألوان دي انتم مميزين بيها”

كتبت: يمنى أحمد

أصيب المغني رامي جمال بمرض البهاق ، الذي أصابه بالآونة الأخيرة ، حيث أنه نشر فيديو توعوي عبر الإنستجرام ، ليجيب فيه عن أسئلة جمهوره قائلاً:-

عشان الناس اللي بتسألني وبتقولي البهاق فين و خفيت ازاي انا عايز اقول اني مخفتش و اهو البهاق في أيدي اهو و جنب شفايفي و جنب عيني وفي كل جسمي، و أعرب عن خوفه و قلقه من المرض في بداية الأمر قائلاً :-

انا الاول لما كنت بشوف نقطه كنت أراقبها و كنت بزعل اوي دلوقتي بحس انها ميزه لانها خلتني اشوف حب الناس و دعمهم ليا.

كما ذكر :الحاجه اللي بصور الفيديو عشانها إني عايز اقول لكل أم ابنها عنده بهاق هو معندوش مشكله بس انتي لازم تربيه انه ولد عنده ميزه ربنا ميزه بيها و الميزه دي حاولي تقنعي كل اللي حواليه بيها.

واستكمل :أنا مغني و الشكل جزء من شغلي بس بسببكوا بقيت شايف انها ميزه انا لما كنت بصور بوستر البوم اللي هينزل المصور بتاعي بيقولي ايدك فيها حته باينه قولتله سيبها لانه ده مش عيب و اللي شايف ده عيب ميهمناش احنا يهمنا التلاته اربعه اللي حوالينا و بيحبونا.

كما علق أيضاً :البنت اللي بتقول انا عندي بهاق و داخلة على خطوبة او جواز وخايفه عريسي يسيبنى انا اهو بقولك متكمليش معاه لو مش قابلك لانه مشاكل الدنيا اكبر بكتير من شوية ألوان في جسمك انا بقولك متتجوزيش منه لانك مميزة مفيش عندك مشكلة و ممكن اقولك انه بياض قلبك باين على جسمك.

وأنهي رامي جمال حديثه ، برسالة بالغة الأهمية قائلاً: حبوا نعم ربنا، الألوان دي انتوا مميزين بيها و الله اللي عنده بهاق ده مميز، والله انا بقيت سعيد جداً و انتوا حررتوني واسعدتوني بدعمكم الدائم ليا .

والجدير بالذكر أن أحدث أعماله ، هي أغنية جديدة له تحمل عنوان “دقيقة واحدة” وقد قام بطرحها عبر حسابه الرسمي على موقع الفيديوهات الشهير “يوتيوب”، والأغنية من ألحان ياسر نور و كلمات رفيق نجيب.