رجعوني اعيش ايام زمان بقلم انتصار احمد رجب
رجعوني اعيش ايام زمان
بقلم انتصار احمد رجب
انتصار احمد رجب
نفسي أرجع أعيش ولو يوم واحد من أيام زمان ، أيام ما كان الواحد رايق دايما و حاسس بالأمان ، ايام جميله و ناس طيبه بتحب بعض بجد ايام مفهاش سرقه ولا قتل ولا صديق خاين ، كنا بنعيش اليوم بيومه مفهوش قلق ولا خوف ولا فاهمين غدر الزمان ، صفحة أعمالنا لسه بيضا كنا أحباب الرحمن.
رجعوني لأيام زمان ، رجعونى استني جرس الباب ورجوع بابا من الشغل وانا بتنطط من الفرحه و جايبلي معاه الورد الي بحبه والبيت كلة بهجه ، و احنا بنتغدي مع بعض في نفس الوقت ومفيش حد فينا غايب ، ضحك ونكت وهزار وكانت الفرحه ماليه الدار ، رجعوني نروح نصيف ونتمشي بالليل واللي يأجر عجل واللي بيشتري ايس كريم وصوت الأغاني و القرآن في كل بيت.
رجعوني لذكرياتي
رجعوني افرح بجزمتي وشنطة المدرسة الجديدة والألوان و الجلاد ، وسعادة اول يوم رايحين فيه المدرسه بعد اجازه وفرحة اول مره اكتب بالقلم الجاف ، ووقت الفسحه وجرس المدرسه والصحاب ، رجعوني نقلب التلفزيون بايدينا وحد يقوم يقلب القناة ، رجعوني لـ رمضان وصلاة التراويح وزينة الشوارع و نشوف الفوازير ومن بعدها المسلسل واليوم خلص ننام بقي ونصحي نتسحر رجعوني لـ بيت بسيط كله حب واب وام ملهمش مسيل .
رجعوني لفرحة العيد ولبسة الجديد ونلف علي العيلة وعيلة العيلة ، نروح بيت جدي نلم العدية ونعيد عليهم و اشتري العروسه ونظارة شمس الملونة واخويه المسدس والهزار واللعب وايامنا البريئة.
ذكرياتي في صوره
رجعوني استني بابا القلب الكبير جاب كاميرا وفيلم ٣٦ صورة عشان نتصور ونتفرج علي صورنا وذكرياتنا ، رجعوني لجرس تليفون البيت يرن واهالينا واصحابنا بيسالوا علينا ويزرونا ، رجعوني اروح لـ جاراتنا بطبق الكعك علشان تدوقه من ايد امي رجعوني لـ لأيامي الحلوه رجعوني وسيبوني هناك
