“رساله لمجهول” قصيده جديده للشاعره اسراء عماد

رساله لمجهول ..
التامل فى صوتك امبارح .. و وجودك فجأة على القهوة و ريحتك الممزوجة بريحة البن ..
و خيطك المربوط فى صوتك ليلة امبارح “ممارسة حب على السيرة ”
فعل فاضح فى امتزاج الشيء بالشيء
“بحب اكل القهوه بعد ما أشربها ”
أساطير الف ليلة و ليلة
شهرزاد احكى الحكاية
شهريار صمم يكون موصول فى عقدة للحبكه الممزوجة بحيرة القبول و الرفض
عزفك فى ودنى وقتها خلانى طفلة رقصت كما الكمان على الارض
عجوز انت فى إصرارك
طفلة كنت فى المزج بين القبول و الرفض
“افتراض”
انت و انا ..
المكان مش مباح السيرة أسطورة تبعد تماما عن تحديد المكان و الزمان
يمكن كنّا فى عصر جاهلى
قيس و ليلى بيرسمو اثر الطريق على جسمهم ..
نبضهم متحكم فى إيقاع الشعر
جاهل بيحكى لجاهله عن رغبته فى الوصل
فعل الغرائز وقتها بيطور الفكره لفعل
كل اللى حاصل غلط
كل اللى كان ده الحلو
شابط فى نهد السما بيحكى للفراشات عن حبه للرضعة
مش خايف ليسقط من السماء للأرض
مش خايفه لا تموت الفراشه بقطع النهد
“خيانه”
طيف رفيقة فى ستار شفاف
كنّا جسد واحد بدون اللمس
يمكن يكون ليك شريك على سرير خايف من الحوجه
مراتك متعجبه من امتزاج فكك لضحكه
بكيت من التفاصيل
وقعت فرشتك من السما وياك
“آدم و حواء” ..
مراتك مستحيل تسكن ضلوعك و عينك متطرفه للأرض
و انا مستحيل اترسملك طيف انانى وانت عينك متكتفه فى الارض
قلبك فاتح نبضه للسما مع طيف فراشه بتحضنك من وحى الخيال
بس كل اللى ممكن أصدقه انى كنت مجرد هوا بتتنفسه فتنام مكتمل رغم نقصانى
“وصفك للحالة”
كوباية نصها فاضى
لكنها مليانه بحبة هوا
انتى مجرد هواء
انت مجرد رسم
مين فينا أوضح
يمكن تكون صورة الميه رغم انها صوره مجرده من الطعم