قلم بحق وحقيقي
كتبت / غادة العليمى
لو شفت فيلم السبع بنات هتلاقى اسم زيزي البدراوي قبل سعاد حسني .. الكل كان بيتوقع أن زيزي هتبقى نجمة مصر الاولى .. بس دا محصلش للاسف.. هي حظها قليل جدا..
في مرة من المرات بتمثل قدام حمدي غيث في مسرحية شيء في صدري.. وحمدي غيث إيده قد 8 ايادي من بتوع الايام دي… وهي كانت خايفة من فكرة القلم نفسه.. ما بالك ان اللي هيضربه حمدي غيث… وهما ع المسرح فمافييش خدع سينمائية و لازم تاخدي قلم بجد…
المخرج راسم تكنيك الحركة ان حمدي يكون باصص بضهره، ويلف يضربها بالقلم.. عايز بس اقولك ان قطعية جسم الاستاذ حمدي تفصل 4 مستريح من قطعية زيزي البدراوي… المهم عمك حمدي غيث الشيخ بدار الراجل الطيب.. راح لافف وضاربها بالقلم…
هي خدت القلم من شدته نزلت ع سن الطراييزة .. اتفتح ثقب جنب عينيها .. في مكان خطر جدا.. هي كانت لابسة قميص ابيض .. بقى لونه احمر .. الاستاذ حمدي مش شايف ومكمل ضرب عادي .. وراح مقومها ومكمل ضرب في حالة اندماج ع المسرح.. وزيزي اصلا فاضلها دقيقتين وتفقد الوعى
لحقتها لبنى عبد العزيز.. وقالت لاااااااااااااا دا دم مش مكياج.. دا دم .. زيزي بتنزف.. الجو اتكهرب.. والجمهور اتلجم والصالة هاجت وهاصت.. فقفلوا الستارة.. زوزو نبيل رفعالها راسها علشان الدم مينزلش.. ولبنى بتحاول تكبسها بن..
لحد ما ظهر واحد عرف نفسه انه طبيب وكان بيتفرج على المسرحية ومعجب بالاستاذ حمدي غيث.. وعمل اسعافات اولية وقالهم الجرح عمقه 5 سم لازم تطلع حالا على المستشفى.. لكن هي رفضت وقالت لازم اكمل دوري .. الناس اللي جات وقطعت تذاكر ملهاش اي ذنب..
وخرج السيد بدير مدير فرق مسرح التلفزيون.. وقالهم زيزي هتكمل المسرحية حبا فيكم.. فالناس صقفوا قوي.. وهي خرجت فعلا .. يا دوب مشهدين وراحت واقعة من طولها.. وجريوا بيها على المستشفى.. وفضل الجرح دا معلم في وشها لغاية ما ماتت..مع انها كانت لسه صغيرة.. بس هي بتقول الاستاذ حمدي غيث كانت أيده ضخمة وكان بيضرب بضمير..
وفعلا الفنون جنون
