شادية: أتصدمت لما شوفت عبد الحليم حافظ لأول مرة.. كنت فاكره طويل وعريض
احمد علي
في تسجيل إذاعي نادر من الفنانة الراحلة شادية تحدثت فيه عن أول لقاء لها مع العندليب الأسمر عبد الحليم حافظ ورأيها فيه كمغني وممثل ورأيها في شخصيته،وتحدثت أيضا عن تجربتها معه في الغناء والتمثيل.
المذيعةقدمت الفنانة شادية بهذه الكلمات، وقالت” في مذكراته التي نشرتها آخر ساعة قال عبد الحليم حافظ، أن شادية هي من أحب الأصوات الي قلبه،لهذا اختارها لتغني معه الثنائيات الغنائية، مثل “تعالي اقولك” “احتار خيالي” “أحنا كنا فين” “حاجة غريبة ” وغيرها، وشادية واحدة من ألمع مطربات جيل عبد الحليم حافظ.
شادية تسمع صوت حليم لأول مرة
ووجهت المذيعة الفنانة شادية سؤال عن بداية معرفتها بصوت العندليب، واجابت شادية “أنا سمعت صوته لأول مرة وانا في البيت قاعدة قبل كل أروح علي الاستديو، سمعت في الراديو واحد بيغني صوته جميل وقوي وكله أحساس، صوت مسمعتهوش قبل كده ، صوت مختلف عن باقي الأصوات اللي موجودة علي الساحة الغنائية في تلك الأيام، وكان بيغني اغنية “ظالم” ولقيت صوته مختلف ماشي مع أيامنا وحياتنا وسننا ساعتها حقيقي حبيت صوته،واتخيلته شاب طويل وعريض وضخم.
أول لقاء بين شادية وعبد الحليم
بالصدفة كنت في معهد الموسيقي وكان معايا كمال الطويل، وقالت له اما انا يا كمال سمعت صوت لمطرب جميل وقوي اسمه عبد الحليم حافظ، قالي يا سلام ده انا اعرفه ،واحنا واقفين في طرقة المعهد راح كمال الطويل قالي الصوت اللي معجبة بيه جاي أهو في الطرقة، لمحت شخص جاي لقيت جسمه صغير ونحيف بصراحة انا اتصدمت شوية، وقولت في نفسي بقي الجسم الضعيف ده يطلع صوت بالقوة دي.
ومع مرور الوقت لما قعدت معاه قاعدتين، تلاتة لقيت شخصيته أضخم من صوته، وليه شخصية عنيدة وده كان أول تعارف بينا.
شادية وعمل دويتو مع حليم
وسألتها المذيعة “في افلامكم قدمتي معاه الثنائيات الغنائية زي اغنية “تعالي اقولك” في فيلم لحن الوفاء وحاجة غريبة ،وغيرها من الأغنيات ،وكنتي المطربة الوحيدة اللي شاركتي العندليب الدويتو ،تقولي ايه ؟
هو عشان ممثلش مع مطربات غيري انا وصباح، بس معملش دويتو مع صباح يمكن عشان فيلم شارع الحب اللي عملوه مع بعض مكنش فيه موقف يغنوا فيه دويتو مع بعض،إنما احنا كان فيه في الأفلام اللي عملتها معاه لازم نغني مع بعض.
رأي شادية في حليم كممثل
وعن سؤال المذيعة عن رأيها في عبدالحليم حافظ الممثل، اللي شاركها أول أفلامه لحن الوفاء لحد معبودة الجماهير
قالت شادية” هو فنان عظيم وممثل بيحس، هو مكنش ممثل صنعة بيعملها، أنما بيحس بالكلمة اللي بيقولها، ده كان بيريح الممثل اللي قصاده، بصراحة كنا برتاح معاه في الشغل،بحس الشخص اللي بيكلمني في المشاهد، بيكلمني بكل أحساسه ومشاعره، وكنا بنندمج مع بعض ،حقيقي هو كان ممثل كويس.
رأي شادية في صوت عبد الحليم
وردا هل عبد الحليم حافظ له لون مميز في الغناء، قالت شادية، طبعا طبعا صوته كان مميز جدا، صوت فيه رجولة تحسي انه صوت مصري، تحس انه صوت طالع من بلده، من الترعة،صوت بيطلع وهو بيلعب في الطين،أو بيطلع الشجرة ده صوته اللي تحسيه، غير كده كمان صوته كان طلع احساس ونبرة حزن دي كمان كانت بتضيف جمال لصوته.
عبد الحليم الصديق والزميل
وسألتها المذيعة، ماذا يعني اسم عبد الحليم حافظ الزميل والصديق؟
قالت شادية، لما بسمع صوته بحس انه اخويا،أو أبويا او حبيبي دول متجمعين في صوت عبد الحليم،بحس انه الصديق اللي بيكون معاكي لما تكوني متجاه، وعكس ما يقال عنه انه مجامل، هو فعلا يجامل اااه،إنما مش ممكن يتخلي عن أصدقائه ويحافظ علي العشرة.
