شادية والخدعة الكبرى التى تعرضت لها علي يد حسين كمال .. قصة مثيرة

شادية والخدعة الكبرى التى تعرضت لها علي يد حسين كمال .. قصة مثيرة

شادية والخدعة الكبرى .. قصة لطيفة جدا قرأتها بأسم خدعة حسين كمال .. جذبتني ووجدت بداخلي رغبة قوية في سردها عليكم والتعليق عليها ….

بقلم / دعاء جلال

المخرج حسين كمال لما كان بيحضر لمسرحية ريا وسكينة وبيحط تصوره للادوار والشخصيات اخد قرار جريء لما رشح النجمة شادية لدور “ريا” في اول تجربة مسرحية في تاريخها وفعلا اتصل بيها عشان يعرض عليها الموضوع.
اول ما شادية سمعت منه كلمت “مسرحية” كان ردها حازم وعنيف جدا وقالتله “انا مش حضحى بتاريخي عشان خاطر حضرتك” واتأكد حسين ان مهمته مستحيلة لكن ما استسلمش وقرر يعمل حركة خبيثة عشان يقنعها تقبل الدور.

عرق تركى ودماغها ناشفة

بيحكي حسين انه كان فاهم شادية وعارف ان عندها “عرق تركي” يعني دماغها ناشفة بس في نفس الوقت “قلبها حنين” عشان كده قالها خلاص انسي الموضوع بس انا عايز منك خدمة تساعدي اخوكي بيها عشان المسرحية دي مهمة بالنسبالي ورأيك يهمني .. انا حبعتلك اول مشهد تقريه وتقوليلي رأيك وياريت بخبرتك ترشحيلي حد يعمل الدور مكانك.

رحبت شادية جدا وقرت المشهد الاول .. وبعدين كلمته وقالتله انه عجبها جدا راح باعتلها المشهد التاني ومشهد جر مشهد لحد ما قرأت التلات فصول كلهم واتثبتت وكلمنه تاني عشان تقوله اد ايه عجبتها الرواية وكان رده “مش قولتلك انا مش شايف حد غيرك للدور ايه رأيك ؟!”.

أقرأ ايضا:وزير الصناعة والثروة المعدنية السعودي بالرياض ورئيس الوزراء المصري يبحثان سبل التعاون بين البلدين 

خوف من الفشل أدى لنجاح كبير

رغم اعجابها بالنص لكن شادية قالت لحسين كمال إنها خايفة جدا وما عندهاش اي خبرة في المسرح وخايفة ده يأثر على جماهيريتها لكن رد حسين قطع شكوك شادية لما قالها “لو فشلتي انت لسه شادية برضه انا اللي حتهاجم وحيقولوا حسين كمال بوظ تاريخ شادية .. انا اللي حاخد الرصاص بدالك”.
وفعلا بدأت شادية الشغل في المسرحية عشان تكون اول واخر تحربة مسرحية في تاريخها … وشادية اللي كانت خايفة من الفشل كانت اهم اسباب نجاح المسرحية وده بشهادة النجمة “سهير البابلي” اللي رغم انها كانت نجمة مسرح كبيرة وقتها لكن قالت ان شادية جابت جمهور جديد ما كانش ممكن المسرحية دي توصله لكن الجمهور ده جه عشان يشوف شادية على المسرح .
#شفتوا ازاي ممكن الخوف يخلي الانسان يخسر حاجات كتير ممكن تضيفله وتكبره وتلمعه “خوف شادية”

قلق يعقبه فرح ونجاح

#شفتوا ازاي ممكن استخدام العقل اللي هو نعمة ربنا اللي مفضل بيها الانسان عن سائر مخلوقاته ممكن نستخدمها كنعمة تجيب النجاح والفرح بدل ما نستخدمها في حاجة ممكن تضرنا او تضر غيرنا .
مجرد شوية تفكير في نجاحي بس ممكن يغير قدر شخص وينقل حياته نقلة تانيه “ذكاء حسين كمال”

#شوفتوا ازاي احساسك أنك تقدر وقدها ومفيش غيرك قدها ازاي بيخليك تنفرد وتتميز وتكسر الدنيا ( شادية بعد ما قرأت المشاهد )
#شوفتوا ازاي اما حد بيشوف الحلو اللي فينا حتي لو احنا مش شيفينوا ويبقي بجد واثق فينا الدنيا بتتغير وخوفنا بيقل و الصعب بيبقي ممكن وممكن جداً كمان .

نرشح لك:حنان مطاوع تعود بقوة فى رمضان 2025 بمسلسل ‘دهب’: عودة منتظرة بعد غياب

رؤية حسين كمال واصراره علي شادية

 

** عاوزه بس اقول لكل واحد فيكم أستخدم عقلك و ذكائك والله تقدر وهتغيير و اوعي تخاف وصدقني ممكن تكسر الدنيا وربنا يرزقك شخص مأمن بيك في حياتك لان دا أجمل رزق .