شاهد| آراء صادمة وردود أفعال جريئة للنساء على الفياجرا الحريمي “هتموت يا سبعي”

كتبت/ أسماء سمير

ردود أفعال واسعة النطاق أُثيرت في الشارع المصري بوجه عام وبين النساء بمختلف طبقاتهم بوجه خاص، وذلك بعد الإعلان الغريب عن ظهور “الحبة الروز” الفياجرا النسائية، التي يمكن للنساء استخدامها كمنشط جنسي .

ولغرابة وطرافة الموضوع فى آن واحد قامت صحيفة “أسرار المشاهير” بإجراء استطلاع رأي لـ مجموعة من النساء على مستوى الفئات الإجتماعية المختلفة حول هذا الموضوع وسوف نعرضها معكم خلال الملف التالي .

*سخرية النساء*

فى البداية تقول “أمل علوان” 42 سنة “كوافيرة حريمى” : بصراحة من ساعة ماسمعنا الموضوع ده مابطلناش ضحك أنا وكل الستات اللي جم عندى الكوافير النهاردة , ورغم اننا مش عارفين الموضوع حقيقى ولا إشاعة بس بجد فطسنا من الضحك , وسبب ضحكنا تعليقات الستات نفسهم فى الكوافير , منهم اللى بتقول : فياجرا لمين لينا إحنا ؟!!!! ومنهم اللى قالت : مش ممكن يكون حقيقى علشان مش هايتباع أصلا علشان معظم الستات تعبانين من غير فياجرا ولا زفت، ومنهم اللي قالت أكيد الرجالة بيلطموا وبيتمنوا ماينزلش السوق وهكذا”.

*الرجالة غلابة*

وتعلق سهام ن ع ” 35 عاماً موظفة بإحدى الشركات الاستثمارية ” : فياجرا حريمى أيه وزفت أيه , طيب هما عملوها أصلا من زمان للرجالة ونجحت علشان هما غلابة أصلا وماكانوش قادرين على ستاتهم وبيشتكوا من الضعف وبيتحججوا بضغوط الحياة والمشاغل اليومية , وقدر مجموعة كبيرة منهم يعوضوا ضعفهم وخيبتهم بيها , طيب الستات هاتستخدم الحجات ديه ليه أصلا وهما من الاساس بيشتكوا من عدم وجود استعداد لدى أزواجهم”.

*حلو قوى*

وتضحك هبة ن 33 سنة ” فنانة تشكيلية ” وتقول : “ده موضوع حلو قوى وهايساعد ستات كتير من اللى بيعانوا من الضعف وأزواجهم بيشتكوا منهم , وكان لازم يوجدوا حلول للحجات ديه من زمان تحديداً منذ ظهور الفياجرا الرجالى والتى تسببت في مشاكل كتير للستات مع أزواجهم , لكون الرجال أو كتير منهم بقى عندهم طاقة كبيرة وستاتهم مش قادرين عليهم , وكان مبرر لرجالة كتير فى خيانة أزواجهم، أطالب بسرعة طرح هذه العقاقير بالآسواق لكونها ستحل مشاكل كثيرة فعلاً” .

*هتموت يا سبعي*

فيما سخرت فاطمة ع 25 سنة ولكن هذه المرة ليست من الفياجرا، بل سخرت من الرجال مستشهدة بمشهد محمد هنيدي في فيلم عسكر في المعسكر ولكن بالنسخة الحريمي الحديثة قائلة: “هتموت يا سبعي”.

كوميك ساخر

*إعلانات القنوات*

وتقول نجلاء ع 22 سنة ” زوجة شابة” : المشكلة بس إن الموضوع هايكون فيه جانب كبير من الإحراج للستات , إذاي واحدة تدخل الصيدلية وتقول للصيدلى عايزة الحباية كذا ده عيب ومش مظبوط يحصل أصلا , وكمان الصدمة إن فيه أكيد قنوات من بتاعت بير السلم هاتعلن عنها بطرق سخيفة ومنحطة وتسبب إحراج للستات قدام ولادهم زى ماعملت ولسه بتعمل مع الرجالة نفسهم لا لا عيب حقيقى” .

خوف بعض السيدات من سخف الإعلانات

*عقول الستات*

ومن حيث أنهت نجلاء حديثها تقول أمينة جلال ” ربة منزل” : “ديه قلة أدب وسفالة وماينفعش أصلا نتناقش فى الكلام ده , ديه حجات بيبعتوها لينا من بره علشان يبوظوا أخلاق الستات العرب أكتر وأكتر , ويشغلوا عقول الستات والبنات الصغيرين , لازم الدولة ووزارة الصحة تتصدى للكلام ده وتمنع تداوله فى مصر فوراً”.

*تعليق الفنانات*

كانت الشركة المنتجة لـ الفياجرا الحريمى “الحبة الروز” أعلنت عن قيامها بالتحضير لمؤتمر صحفي، يوم الأربعاء المقبل، للإعلان عنها، مما أثار ردود أفعال واسعة وصادمة بين النساء ووصل الأمر لقيام بعض الفنانات بالتعليق على الأمر بشكل ساخر مثل الفنانة سما المصري التي كتبت على حسابها الشخصي عبر “إنستجرام”: “فياجرا حريمى إيه ياجماعة اللي هتنزل السوق؟.. هار أسود؟.. كده عدد السكان هينفجر يا جدعان.. يوم مش فايت”.

وتوالت التعليقات الساخرة ثم فوجئنا بتراجع الشركة التي سبق لها الإعلان، حيث تبرأت من الأمر، ولم يوقف هذا التراجع الجدل المثار حول هذا  الموضوع حتى الآن.

الفياجرا الحريمي