شباك عليه قله .. للشاعر الكبير / إبراهيم رضوان

شباك عليه قله .. للشاعر الكبير / إبراهيم رضوان

يا ام العيون طله .. وام النجوم هله
لو حتى طال الليل .. بكره أكيد أحلى
ياما نفسى أملاكى .. بروايح الفُله
دا انا كل أملاكى .. شباك عليه قُله

ومشيت فى بستانك .. إنسان معاه بستان
بصيت لفستانك .. شفت القمر نعسان
ولقيتنى مش خايف .. من أى شئ زايف
ياما نفسى أملاكى .. بروايح الفُله
دا انا كل أملاكى .. شباك عليه قُله

على فين ما هاتروحى .. لازم معاكى أطير
ما تحيريش روحى .. وتطيِّرى العصافير
وكفايه جرح زمان .. فى مملكة نسيان
ياما نفسى أملاكى .. بروايح الفُله
دا انا كل أملاكى .. شباك عليه قُله

أيوه انزلى تانى .. يا ليلى للمجنون
فى البعد هاتعانى .. ملكة جمال الكون
يا اللى انتى ست الناس .. وام الوتر حساس
ياما نفسى أملاكى .. بروايح الفُله
دا انا كل أملاكى .. شباك عليه قُله

مستغربه جدا .. أنا غنوتى مَهرك
لما الديوك تدن .. هاتوضى من نهرك
وارجع أغنيلك .. وارتاح على نيلك
ياما نفسى أملاكى .. بروايح الفُله
دا انا كل أملاكى .. شباك عليه قُله