شرف البنت مرتبط بغشاء البكارة .. ماذا عن شرف الولد ؟!!!

تحقيق / منال سالم

كوني أنثي يجعلني أتساءل دائما عن قضايا المرأة في المجتمعات الشرقية ومن الموضوعات التي أثارت اهتمامي وشغلت تفكيري موضوع شرف المرأة المرتبط بغشاء بكارتها مع العلم أن هناك بعض الفتيات يولدن دون غشاء بكارة وبعضهن يفقدن غشاء البكارة لأسباب اخري غير عمل علاقة جنسية .. وقد طرحت هذا التساؤل علي احدي مواقع التواصل الاجتماعي وأكثرها تداولا الفيس بوك وكان بعنوان ” شرف البنت مرتبط بغشاء البكارة في المجتمعات الشرقية .. ماذا عن شرف الولد؟!!!
عند طرح هذا التساؤل جاءني العديد من الردود والمشاركات أردت مشاركة بعضها ولكن منعا الاحراج فسوف اكتفي بكتابة اول اسم من كل صديق دون ذكر اسمه كاملا وكانت كالآتي :
سامح: بتفتحي موضوع صعب جدا مع أن غشاء البكارة ممكن يترقع
منال: اكيد.
صلاح: هنا هنحتاج بعض من عاداتنا علي بعض من الثقافة الغربية وللأسف لو حد كنا اتكلم هنا هتتفتح عليه أبواب جهنم
منال: وأبواب جهنم اللي بتتفتح علي البنات بسبب غشاء البكارة واللي أحيانا بتوصل للقتل ايه رأي حضرتك فيها؟
صلاح: دي ثقافة وموروث شعبي وللأسف أغلب الشباب مايعرفش أنواع غشاء البكارة.
الكلام ممكن يكون بطريقة تانية ماذا لو أخطأت البنت ثم تابت هل يغفر لها الرجل ويأمنها علي نفسه؟
منال: ب تعتبر علاقة البنت الجنسية قبل الزواج خطأ وماذا عن علاقات الرجل المتعددة والامتناهية قبل الزواج؟ أنا في رأي الشخصي العفة واجبة ولازمة للرجل والأنثى علي السواء.
صلاح: الاتنين ممكن يغلطوا المعضلة زي ماقولت لك مش في غشاء البكارة المشكلة في الدماغ والموروث الشعبي .. التغيير مستحيل. بصي انا اعرف اكتر من حد اتجوز بنات مش فيرجن (بدون غشاء بكارة) وعايشين في سعادة.
أحمد: غشاء بكارة البنت اللي قدامه.
منال: يعني ايه؟
احمد: يعني برده شرف الرجل مرتبط بمحافظته علي البنت اللي معاه.
منال: تمام وازاي نعرف اذا كان عمل علاقات جنسية قبل الزواج أم لأ؟
احمد: مش هتقدري طبعا ومش هيقدر طبعا في ظل العمليات بس الاختيار الخاطئ ده يتحمله صاحب الاختيار سواء رجل أو ست مفيش ضمانات .. نفسك هي الضمان.
محمد: ده مرتبط بعدد شعر رأسه.
شريف: كلمته وجيبه.
منال: وليه البنت شرفها يكون غشاء بكارة؟ مش شايف ان ده ظلم لها؟
شريف: ما انتوا اللي بتحبوا ال bad boys ( الولاد السيئين) اعملوا ايه انا! ! وبعدين ده مفهوم العموم مش مفهومي.
اسامة: من كلامه وألفاظ واحترامه لنفسه وللناس وأيضا الفتاة ليس بغشاء البكارة أساس إلا لأصحاب العقول الضعيفة وبيان من كلامها عندها غشاء أخلاق أن لا.
منال : تمام
طارق: في المقدرة في خداع البنت .. هو المجتمع هبط للقاع من قليل؟
منال: مازال بعض الناس وبعض البلدان ب يحكموا علي البنت من غشاء البكارة.
نادر: أخلاقه وأصوله وسلوكه وتاريخه ودينه.
منال: وليه مانحكمش علي البنت بنفس المعايير؟
نادر: المفروض تكون نفس المعايير.
سارة: احنا محتاجين تجديد للأفكار الفاسدة.
هشام: مفيش بنت بتفرط في نفسها غصب عنها.
منال: والراجل كمان ب مزاجه بس مش ده اللي انا باتكلم فيه.
هشام: شرف الولد في كلمته ورجولته وعدم التلاعب بنات الناس.
منال: وليه مش بنستعمل نفس المعايير مع البنت؟
هشام: هتستعمليها ازاي دي؟ هيتقال عليها مثلا؟
منال: يعني يتقال عن البنت جدعة ب تحترم نفسها وعندها عفة واحترام للنفس وكلمتها واحدة ما بتتغيرش وبتصون الراجل اللي ب ترتبط بيه وبتصون غيبته .. الخ.
هشام: علي فكرة البنات والست دي الحاجة الحلوة اللي في حياة أي رجل ولا نستطيع أن نعيش بدونهم.
مايكل: ده سؤال طرحته نوال السعداوي.
منال: وسيظل يطرح حتي يغير المجتمع نظرته للمرأة ويعاملها بعدل وانصاف.
مايكل: برده فيه جانب سلبي الإعلام بيرسخه ومنتجات التجميل .. إن البنت سلعة للعرض .. كمجتمع بيتم استغلالها كسلعة يروج لها وهي كنت بتتعامل نفسيا كسلعة عايزة تكون مقبولة.
منال: لو نظرنا بموضوعية هنجد أن الرجل كمان اصبح سلعة مش بس الانثي والبنت التافهة الفاضية عقليا وثقافيا هي اللي ب تعتبر نفسها سلعة وعاوزة يتم الإقبال عليها وتكون مقبولة.
اسامة: شرف الولد في العالم العربي مرتبط بجيبه.
منال: للأسف
طارق: بنفس الموضوع.
منال: ازاي؟
طارق: خادش الشرف من أساسه عديم الشرف
حامد: يجب بحث الموضوع من الناحية العلمية، الدراسات الحديثة تؤكد على اهمية حفاظ البنت لغشاء البكارة و لا تفض الا عند الزواج، لأن في فضها ينتج هورمون يجعل المرأة تدمن الرجل الذى فض البكارة، فإذا كان هو ليس بزوجها فإن حالة الإدمان الشبه مستدامة هذه سوف تؤثر سلبا على علاقتها مع أى رجل آخر بعد الذى فض بكارتها و تدخل المرأة فى صراع للتخلص من الماض.
منال: مع احترامي الكامل لرأي حضرتك بس انا عايشة في شمال اميركا وماشوفتش أي دراسة بتقول كده والدليل أن سواء البنت أو الولد بيكون لهم علاقات عديدة قبل الزواج وبتنتهي العلاقة وتبدأ علاقة جديدة بدون ما يكون هناك أي إدمان أو حنين لأول علاقة .. إذا كان الكلام ده بس في الشرق فاكيد دي دراسات غير مجدية لأن أي دراسة تعمم علميا يجب أن تتفق مع كل الثقافات والبلدان.
اياد: كلامك صح جدا يامنال.
حامد: بالنسبة لكلامك يا منال عن العلاقات الجنسية قبل الزواج، فإذا كنا نقصد علاقات الفريندشيب friend ship فى الدول الغربية فهذا يعتبر زواج و لكنه زواج ليس فيه حقوق ما بعد الزواج اى يعتبر “زواج عرفى” كما هو الحال عندنا فى الشرق او مثل زواج المتعة او المسيار و غيرها. شكرا لطرح هذا النقاش.
سامي: فى أخلاقه.. وغشاء بكارة البنت حكمة من الله لمنع اختلاط الانساب وبعدين ما تزعليش غشاء البكارة دلوقت بيترقع والشبان ما بيفرقش معاها عروسته بنت ولا مرة وعادة هما ليكونوا متجوزين قبل المأذون ولا كمان حضرتك عاوزاها تبقى شرع ؟
وليد: مرتبط بكلمته ووعوده.
احمد: الصدق في القول والفعل.
ولاء: لا اعتقد انهم اتربوا في مجتمعاتنا انهم ليهم شرف يحافظوا عليه .. بالنسبة لهم الكلمة زي دي نسائية وليس لها معني ذكوري.
محمد: المجتمعات الشرقية فيها كل حاجة موجودة في المجتمعات الغربية الاختلاف في المجتمعات الشرقية ان كل الناس عاملة شريفة الا من رحم ربي.
محمد: في كلمته في الوفاء بوعوده في الاخلاص في احساسها بالامان معاه.
علاء: حلاص يافندم نفتحها عالبحري لو مكانش غشاء البكارة مهم ودليل على شرف الأنثى ماكان خلقه ووضعه الله ولو مهم للرجل كان خلق الله له غشاء بكاره
وماكان وضع للرحل ٤ زوجات وللمرأه زوج واحد.
منال: أولا غشاء البكارة ربنا خلقه لأسباب تانية غير أنه يرتبط ب شرفها ومع العلم فيه بنات بتولد بدونه .. وبعدين ايه موضوع نفتحها عالبحري دي؟ هي تتفتح عالبحري للرجال وتضيق لدرجة الخنق للنساء؟
علاء: ومين قال لحضرتك ان الرجاله فتحاها على البحري
وبعدين مش محتاجه الحرب دي الي عاوزه تعمل حاجه بتعملها من غير مبررات والمحترمه بتفضل محترمه برده من غير مبررات.
وسام: ماهو بسبب الحريات دي انا اسف في اللفظ اغلب البنات باقو ارخص من كوباية الشاي وبيتعمل معاهم كل حاجة وفي الاخر بتترمي للاسف وتقعد تندب حظها ع الفيسبوك و تشتم في الرجالة مع ان هي اللي باعت نفسها وبنفسها.
منال: حضرتك اللي قولت نفتحها عالبحري .. انا كل اللي قولته ليه شرف البنت مرتبط بغشاء البكارة والراجل لا .. لا جبت سيرة أخلاق ولابحري ولا قبلي مجرد موضوع آثار اهتمامي واستفزني لأن فيه ظلم للانثي.
انا باتكلم في موضوع عام مش عاوزة اقول ان البنت ببيع نفسها لما بتعمل علاقة جنسية قبل الزواج لأن لو نظرنا للرجل بنفس المقياس فهو بيبيع نفسه كمان بإقامة علاقات جنسية قبل الزواج بس الفرق أن المجتمع بينظر للرجل بشكل مختلف عن الانثي بشكل فيه ظلم كبير للانثي.
محمد: هناك عشرات الأسباب والمواقف التى تفض غشاء البكارة بعيدا عن ممارسة الفتاة لعلاقة جنسية .. ولذا فالإعتماد عليه وحده كمقياس لعبة الفتاة هطل علمى وبعيد تماما عن الدين .. وأما عن شرف الشاب ففى كلمته ووعوده .. فابحث عن كم مرة وعد الشاب فيها فتاة وأخلف .. لتتعرف علي شرفه من عدمه .

النقاش طويل في هذا الشأن لم ينتهي ولن ينتهي الي ان تتغير المعايير والقوانين الوضعية بالنسبة للمرأة وماتعانيه في المجتمعات الشرقية الي وقتنا هذا ولكن السؤال الذي يطرح نفسه هل فعلا غشاء البكارة هو المقياس لشرف البنت وعفتها مع العلم ان هناك فتيات تولد بدون غشاؤ بكارة واخري تفقد غشاء البكارة عند ممارستها للرياضة وهناك تسباب اخري عديدة تفقد البنت غشاء البكارة بسببه غير ممارسة العلاقة الجنسية .
أمل ان يعيد المجتمع نظرته في معايير ومقاييس عفة البنت وشرفها