صرخة طفل مشرد.. بقلم/ غرام.

صرخة طفل مشرد
سامع صوت أمي بيناديني
بس مين ليها راح يوديني
أخدوني من حضنك ومن الحنان
مابقيتش حاسس بالأمان
خلوني تايه ضايع بلا عنوان
ناس قلوبهم فيها قسوة
تاجروا بي لاجل شهوة ولا نزوة
ليه سبتوني اعيش في الضلمه
وابعد عن أهلي واللمه
أنا كل ما اشوف اتنين ماشيين
ابقى اتمنى منهم ضمه
أنا كان نفسي كمان في اللحمة
دول بيقولوا عليها دي طعمه
عمري ياناس مالقيت الرحمه
جوه قلوبكم كده وسط الزحمه
ماتسيبونيش أعيش في الشارع
لاجل ما اعيش كده لازم أصارع
أنا مش شايف بكره بتاعي
أنا ضاع مستقبلي قدامي
وماليش حق حتى في أحلامي
أنا كان ممكن أكون محفوظ أو
يعقوب أو حتى زويل
وابقوا افتكروا بس كلامي
لماتشوفوا مني الويل
وبرضه حأقول ولوجه الله
خلوا بالكم من ولادكم
واحفظوا نعم الإله
وانهي كلامي بس بدعوه
ربنا يجعل في قلوبكم رحمه