صفحة جديدة … للشاعر / محمد زيدان

صفحة جديدة

هعتبر اللى فات كان دور قمار ورهان على ناس كتار خسرت ما خسرت لكن عمرى ماندمت ودلوقت..هصحح المسار

الشاعر / محمد زيدان

صفحة جديدة اليوم بفتحها

بعاهد فيها نفسى

وناس كتيرة ف حياتى همسحها

ارضائا لنفسى

وناس لمكانها الطبيعى هرجعها

 اكراما لنفسى

ومش استعلاء منى ولا انانيه

قد ما إنسان من تجاربة اتعلم

مــ اللى شافة مــ البشر والدنيا

و ف حق نفسة كتير اجرم

مفردات كتيرة فــ قاموسي هلغيها

زى العتاب وخلينى انا الأحسن

والحسنى اللى كنت بعامل الكل بيها

وبشرفى ما هيشوفوها منى تانى ابدا

ومن ها الحين التعامل هيكون ع الشعره

فاحذر قبل ما تتسبب لى فى اى اذى نفسى

صفحة جديدة خلاص بفتحها

 بعاهد فيها نفسى

بعاهدها بان اللى جاى كلة هيبقى بقوانين البيزنس

هقيسة بالاضافة اللى هتتقدملى

ابسط قواعده .. الجرى على تضاريس اطلس

اسهل كتير من ان حد ينال ثقتى

والناس اللى انا كنت ليهم اضافه

وبعدوا واتخلوا ف لحظة ضعف

والله لو جم .. ماشيين .. حافيين .. اضعاف .. المسافة

مهيكون ليهم فيها نصيب بحرف

دى القاعدة اللى هطبقها من بكرة

ودى اعظم صفقه بمضيها مع نفسى

صفحة قديمة خلاص بقفلها

بطويها بالاعتذار لنفسى

بطويها بكل ناسها واحداثها

 وبستعيد بيها نفسى

ومرحلة جديدة خلاص هبداها

اعتزازا بنفسى

مرحلة مختلفة هيكون شعارها

نفسى ثم نفسى ثم …

نفسى