صموئيل نبيل أديب يكتي : نظرية غطاء باسكت الزباله” مقال لمن يشعر بالفشل..

و لأجل أن تفهم النظرية تخيل معي انك قررت تحل مثلا مشكله الزباله المرميه في الشارع بوضع باسكت زباله شيك في الشارع تتلم فيه الزباله..
و لأنك شخص ذكي قررت تعمل الباسكت من مواد قوية تستحمل.. و دهنته بمادة غالية لا تتفاعل مع الكيماويات أو الأحماض.. و الأحسن عملته بغطاء يقفل علي الزباله علشان الريحه و الحشرات.. و بعجل متحرك سهل ان تضعه في أي مكان.. و ربطته بسلسلة لكي لا يسرق مثلما اتسرق موبايلك قبل كده
الأن معاك باسكت زباله محترم تضعه أمام أي محل و انت مطمئن أن الباسكت شئ جميل و حضاري و انه مافيش زبالة تاني هتترمي في الشارع..
آخر اليوم.. تذهب لترى انجازك تجده فاضي و الزباله ماليه الشارع حوله…
ماذا حدث ؟ انت فشلت و لا ايه؟
… و لكن انت عملت كل حاجة صح !
في النهاية.. الزباله لاتزال في الشارع…ليه الناس ترمي الزباله بره الباسكت؟؟؟؟!!
التفسير..” نظرية غطاء باسكت الزباله” ..
الناس لا تحب أن تلمس غطاء الباسكت عشان ترفعه و ترمي الزباله فيه.. فكرة ان الغطاء يمكن يكون مليان ميكروبات فطبيعي مش هحب أمسكه. فكرة اني لما افتح الغطاء اكيد هشم ريحه وحشه… فكرة انه ممكن يكون فيه حشرات فأنا مش عايز اقرب من الباسكت…
كلها أسباب تخلي الناس ترمي الزباله بره الباسكت مش جواه..
هذا هو التفسير المنطقي لسؤالك (.. أنا عملت كل حاجة صح لماذا فشلت) ؟؟

الخلاصة :
أحيانا مش معني عملت كل حاجه صح 100٪ انك تنجح و الناس تسقف لك و الفلوس تجري في ايدك..
أحيانا لازم تفكر في رد فعل الآخرين. رد الفعل ده تعرفه من حاجه اسمها
(Feedback)
أو المعلومات المرتدة.
جامعه هولندا نزلت متطوعين واقفه جنب باسكت الزباله و تسأل الناس لماذا ترمي الزباله خارج الباسكت؟ و عرفت ما انت تعرفه الان..
المعلومات المرتدة هي اساس نجاحك في حياتك. في شغلك و حتى في زواجك..
لأجل ذلك تعود أن تسأل الناس عن شغلك.. . كويس/ سئ؟ .لماذا؟ . كان ممكن يكون احسن؟ و ازاي..؟
.. و كانت نتيجه البحث : ناس عملت فتحة في غطاء الباسكت.. وقتها انت ممكن ترمي جواه بدون ما تمد ايدك و ترفع الغطاء و الفتحة صغيرة فمش هتطلع ريحة
. هولندا عالجت المشكله بفكره بره الصندوق حرفيا ..جعلت باسكت الزباله عبارة عن حفرة في الأرض متصلة بشبكة مواسير مثل الصرف الصحي ترمي الزبالة في الحفرة. و الزباله تمشي في المواسير

.. في النهاية أهمس لك في اذنك :
لا تزعل عندما تصنع كل حاجه صح و تفشل.. ف ابسط حاجه زي باسكت الزباله فشلت فيه الدول الكبرى …
…* كمل و فكر تاني *. و تذكر ان لِكل مجتهد نصيب و ان الله يعطينا حسب تعبنا لا حسب النتائج لأنه قال “و قل اعملوا”
و انت قد “عملت” فأنتظر المكافأة منه لا من بشر ..
بس عندما تنجح تذكرني بدعوة حلوة..