ضحكة أميرة…. بقلم.. عاطف محمد
ضحكة أميرة
بقلم/ عاطف محمد
المزيد من المشاركات
وحشتني الضحكة الحلوة
الساكنه ف أجمل وش
إللى ماتعرفش تغش
ولا تعرف يوم تتلون
ولا طالش عسلها المش
ولا حتى صفاها اتحول
ضحكة… بتحل الأزمة
وتفك الجو العتمة
وتطير بالخلق ….لفوق
وتوديهم للذوق
يتوضوا من ميتها
ويدوقوا من حلاوتها
سكر ماخطر ع البال
ماركة خلصان ومحال
ضحكة تجيبك من ظنك
وتهدى ثورة نفسك
وتنسى… هجاءك اسمك
عارفين النسمة الهادية
إللى بتلمس خد الحيران
شوق الدفا للبردان
وجناين أحلى ( ورود)
وشطوط… سفن الأحلام
ونجوم صاحية… مابتنام
هى بالظبط الضحكة
ضحكة بسيطة… من القلب
مرسومة بألوان حب
تاخدك من إيدك…. دوغرى
وتعدى حدود الجى
مرة تلاقيها…. زواتى
وساعات …..من وسط بولاق
وساعات…. اسكندرنية
أحيانا….. م الوراق
وكتير ….هادية ورسيانة
وأيام…. طعمها حراق
وساعات… صوتها مايطلعشى
وتشوفها وماترجعشى
تسمعهاوماتشبعشى
وان سهرت… تفضل صاحى
ماتنامشى عشان تدرسها
وتذاكر وتدرسها
وتشوف… أوراق قواميسها
وتلف فى كل مكان
تجمع مليار تصويره
وتقارن…. بالتقارير
وتعاين….. بالمناظير
ودى ضحكة… رضا وقبول
ودى ضحكة…. صبر مهول
ودى ضحكة …حمد الله
ودى ضحكة…. تخبى الآه
ودى ضحكة… ناس سهرانة
جنبك لو يوم تعبان
ودى ضحكة… صبح منور
ضحكة…. (سبحان )من صور
ودى ضحكة ….ماليه( الخد)
ودى برضه ….ملهاش حد
ودى ضحكة… زى الشمس
بتنور كل الكون
ومزينه كل شوارع
ولا زينة عيد رمضان
ودى ضحكة ….بلون الماس
سهرانة قمر وناس
تنده وتقول يا جميل
هاضحك على طول لوجودكم
ولآخر عمرى راح اضحك
علشان تفتكروا الضحكة
بعد ما اسبكم …وأروح
وتفيض لله الروح
تترحموا دوغرى عليا
وتقولوا دى كانت.
ضحكة
مليانه…. نبض…. وروح
… إلى من أسعدتنا ببسماتها
وضحكاتها وأيامها التى لاتعوض
إلى أميرة الجنة
سمية زوجتى الراحلة
ضحكة هذا الكون
