طبق حلو شرقى مشكل مقدمه من الشيف شوشو عرابي
طبق حلو شرقى مشكل
مقدمه من الشيف شوشو عرابي
اول حاجة هنعمل البسبوسة هنكرمل على النار ٢٠٠ جرام سكر + ١/٤ كوب ماء + م ك عسل جلوكوز من غير تقليب لحد مااللون يبقى بنى فاتح
نضيف ١٧٠ جرام سمنة + ١٥٠ مل حليب ونقلب بسرعة ونطفى ونسيب الخليط يبرد لحد مايبقى دافى زى دمعة العين
نصبه على ٥٠٠ جرام دقيق سميد ونخلطهم سوا
وفى صنية مقاس ٣٠ مدهونة سمنة هنزل الخليط واساويه واضيف رشة بندق مجروش وتدخل فرن ٢٠٠ لمدة ٣٠ دقيقة وممكن نفتح الشواية فى الاخر للوش ونسقيها سيرب سخن ( ٢ كوب ماء + كوب ونص سكر ) على النار لمدة ٥ دقايق
تطلع اغطى الصنية بكيس واسيبها لتانى يوم
العزيزة
انا بعملها بطريقة مختلفة وطعمها بيبقى وهمى
على النار ( لتر حليب + علبة قشطة + ٦ م ك نشا + فانيلا + ١/٤ كوب جوز هند + ١/ ٢ كوب سكر ) هنقلب لحد ما القوام يبقى كريمى اجيب صنية مدهونة زبدة وانزل الخليط فيها وادهن الوش بزبدة سايلة واسيبها ساعة تبرد
وادخلها فرن ٢٠٠ لمدة ٢٥ دقيقة تخرج نسيبها تبرد وتدخل التلاجة ساعتين وبالهنا والشفا
البقلاوة
نجيب لفة جلاش ونجهز الحشوة الاولى ( ربع فول سودانى مقشر من غير ملح هنضربه فى الكبة ونضيفله جوز وزبيب وسكر) هناخد ورقة من لفة الجلاش وندهنها كويس زبدة ونرش جزء من الحشوة بطول الجلاش ونلفه روول وندهن فوق الوش زبدة
وهكذا فى باقى لفة الجلاش والحشوة التانية كنافة محمصة بدون اى اضافات وبنفس طريقة الحشو وهضيف بس للزبدة ٢ نقطة لون أخضر زى البقلاوة التركية كده ونرص الرولات فى صاج مدهون زبدة ونقطعهم الحجم اللى نفضله ويدخل فرن ١٨٠ درجة لمدة ٢٥ دقيقة وتطلع نسقيها سيرب بارد وبالهنا والشفا
اما كنافة عش البلبل والكنافة السيجار بصراحة جبتهم جاهزين على السوا ضفتلهم بس سمنة ودخلتهم الفرن ١٥ دقيقة ولما طلعوا سقيتهم سيرب بارد وضفت لعش البلبل مكسرات مضاف ليها عسل ابيض للتماسك
وبكده اكون نزلت كل وصفات الطبق المشكل
والف هنا
رئيس قسم المطبخ ا سمسمه سعد