عاشت حياة قاسية وحبسها مأمور السجن وتزوجت فى السر ٧ سنوات

الجميلة ..المتمردة

كتبت / غادة العليمى

لا ينفصل جمال الوجه عن جمال الروح وهى كانت فنانة جميلة ،، جميلة فى الشكل فى الاداء،، فى الروح ،، فى الشخصية ،، فى حياتها الشخصية

اسمها الفنى زوزو نبيل ..أما اسمها الحقيقي المكتوب فى الاوراق الرسمية عزيزة امام حسين.. عاشت حياة قاسية جدا وهى صغيرة لدرجة انها تزوجت فى سن 13عام ، وبعدها بسنة واحدة كانت أم. لا بنها نبيل الذى اتخذت لقبها الفنى بإسمه

زوزو كانت بتحب الفن من صغرها، لكن اسرتها وتحديدا امها كانت رافضة بشكل قاطع أن بنتها تبقى فنانة، لكن زى ما كانت الام رافضة كانت زوزو كمان رافضة انها تستسلم لاى حاجة تمنعها عن تحقيق حلمها،

مرت الايام بها  ولقت الاسرة ان البنت ام ضفاير صغيرة لسه قادرة تقاوح وتقاوم، يعملوا ايه عشان يخلوها تنسى الفن ؟ يجوزوها، مين ؟ مأمور سجن،   حول بيتها لسجن صغير كانت ممنوعة تخرج منه، وكانت الفرصة الوحيدة لخروجها هى أنها تتغطي من فوق لتحت.. وتنزل مع حماتها تتمشى لاول الشارع وترجع، قبل ما جوزها يرجع، من شغله اللى بينه وبين البيت 10 متر فقط.

لم تحتمل فى اخر الامر وانفصلت عنه، و سكنت فى بيت صغير فى حارة صغيرة.. وبعد فترة اتعرفت على بنت صاحبة البيت، التى قالت لها أنها تعرف ان تدلها على طريق الفن الذى تعشقه

بنت صاحبة البيت خدت زوزو من ايديها وطلعت بيها على الست أمينة محمد خالة امينة رزق و كانت بتصور وقتها فيلم

شاهدت زوزو واعجبت بجمالها، وقالت لها انتى شكلك جميل، بس ممكن تعرى رجلك شوية، فوشها جاب الوان وقالت لها : بتقولى ايه يا أبلة؟ فردت الست أمينة بسخرية وقالت : أبلة .. إحنا في مدرسة يا روحي، وطبعا زوزو معرفتش تعمل ايه او تقول ايه فخدت بعضها وهربت.

تمر ايام وايام وتصادف زوزو مسرح متعلق عليه افيشات لزينات صدقى وسنية شوقي وتقف تتفرج عليهم بانبهار عيل صغير فرحان بهدوم العيد ومستنى الساعات تمر عشان يلبسها، فيشوفها مختار عثمان ويقولها: تعالي يا شاطرة، تعرفي تقرأي ؟ فقالت له: ايوه، فقال لها: هل عندك فكرة عن التمثيل فقالت له: ايوه ونفسى امثل بس من غير رقص ولا غيره،

فقالها مفيش عندنا رقصات فى المسرحية، ومن هنا بدأت زوزو مشوارها مع التمثيل، وبدأت تاخد ادوار صغيرة لحد ما كبرت وبدأ اسمها يتعرف فيقرر يوسف وهبى يروح يتفرج عليها، ويسأل عن أجرها فيقولوا له 6 جنيه، فيعرض عليها 8 بس هى ترفض وتقول انها هتفضل مع فرقة مختار عثمان لانه اول حد دعمها، لكن طبعا لما فرقة عثمان اتحلت راحت ليوسف وهبي، وبدأت من مسرحه رحلتها مع النجومية والشهرة اللى استمرت لحد ما ماتت.

زوزو مكنتش حابه أن اسمها الفنى يبقى هو اسمها الحقيقى فاختارت اسم “زوزو نبيل”، “زوزو” دلع عزيزة.. اما نبيل فهو اسم ابنها الوحيد

تزوجت زوزو نبيل للمره الثانية من رجل طيب متزوج ولديه ابنه وعاشت معه حياة سعيدة لمدة ٧ سنوات من دون علم زوجته الاولى التى تسكن فى نفس الشارع ولكن السر لا يعيش للابد ذهب احداهم وابلغ زوجته الاولى فثارت وطالبت بالطلاق فقبل الزوج لكن زوزو نبيل طالبته ان يدعها تقدم محاولة لمنع هدم بيته فذهبت لزوجته وطلبت منها ان تتراجع عن قرار الطلاق ويعيشوا معا وتعهدت انها ستعاملها معاملة الاخت وهذا ماحدث بالفعل وحين كبر نبيل ابنها اوارد الزواج زوجته بإبنه زوجها وعاشوا جميعا معا فى خير وسعادة حتى استشهد الابن  فى حرب ٧٣

ثم نوفى زوجها وعاشت مع زوجته حياة طويلة طيبة حتى ان ضرتها اصيبت بالاكتئاب وفقدان الوزن بعد وفاة زوزو نبيل رحمة الله عليها