عالَم ما حدش فيه عالِم

كتبت
فاتن فتح الله نصر
=========

قصة منقولة نقلتها لنا صديقة على إحدى مجموعات الفيسبوك
مؤلمة ولكنها تعبر عن واقع العالم الذي انفصل عن الواقع ليعيش في عالم صنعه لنفسه يغترب معه وهو داخل داره ومع أسرته بالبدن فقط

تابعوها معي
ولا تبكوا فالموت حق
ولكن استفيقوا لتلحقوا ماتبقى من الوقت
======
انا حاسه اني حا اموت من الوجع والحسره .
انا حاحكي حكايتي يمكن حد منكم يلحق نفسه قبل ما يحس ويعيش في اللي انا فيه ..
انا مامتي ماتت ..
وماتت معاها كل حاجه حلوه في حياتي ..
امي ماتت لوحدها ..
في صمت والم وكأنها عايشه لوحدها رغم انها عايشه معانا في البيت انا وبابا واخواتي ..
امي ست جميله وشابه عمرها 53 سنه
جميله ورشيقه و انيقه
ولو شفتها تقول لسه عروسه ..
كل يوم تلبس وتروح شغلها في وظيفه محترمه وترجع تشوف بيتنا وحياتنا..
من كام شهر وهي بتشتكي انها دايما تعبانه ومرهقه ..
واحنا كل واحد مننا في دنيته وشغله وكليته ومواعيده ولا حد واخد ياله ..
ماما بقت تحجز عند دكاتره

وتنزل تروح لوحدها
و لما تحكي لنا نسال بيساطه وقال لك ايه الدكتور ؟..
ترد طلب تحاليل واشاعات .
ماما تروح تعملهم لوحدها برضه ..
واحنا مشغولين في دنيتنا ..
وتحكي لنا هي تحاليلي ملخبطه والدكتور كتب لي ادويه ..

وكلنا شايفين عادي .. يعني حاجه بسيطه يا ماما
ماما تسكت ..
تاخد الدوا .. وتلبس وتروح شغلها ..
وتروح تاني للدكتور بر ضه لوحدها ..
وتروح تعمل التحاليل لوحدها ..

وتروح شغلها وترجع تشوف حياتنا وحياتها .
وفي الوسط تشتكي انها تعبانه .
واحنا برضه عادي شويه وحا تتحسني ..
ماما تعبت في الشغل
و روحت
وقالت حاتاخد كام يوم اجازه علشان تعبانه
والدكتور قال لها تستريح وهي حاسه انها مش قادره .

ارجع من الشغل الاقيها نايمه ..
انت نمتي يا ماما .
طيب خليكي مستريحه ..

بابا واخواتي الولاد ينزلوا الشغل والكليه و يرجعوا يلحقوا مواعيدهم .
وهي نايمه .
يمكن تعبت وبتستريح عادي ..

اريع ايام و ما حدش عارف هي بتصحي امتي ولا هي بتستريح شويه ..
لغايه ما رجعت يوم كالعاده لقيتها نايمه .
عادي سبتها
ودخلت اوضتي اشوف فيلم زي العادي .
اخويا الصغير في اوضته بيلعب بلاي ستشن .
بابا رجع بالليل من الشغل فكرها نايمه ..

بس ماما كانت ميته في سريرها لوحدها

و ماحدش مننا حاسس .
ماما ماتت من غير ما نفكر كلنا نوديها للدكتور او نلحقها من تعبها او نخفف المها ..
ماتت وهي مش قادره تقوم تشرب
واحنا مش حاسين علشان الشغل ومواعيد اصحابنا و وحياتنا اللي ما فيش وقت فيها نشوفها مالها .

ماما ماتت وسابت لي وجع والم وحسره واحساس بالذنب .
كلنا حاسين اننا مجرمين
قتلناها باهمالنا و تجاهلنا .
احنا بقينا مش قادرين نبص في وش بعض .

في العزاء
بابا ييقول للناس هي كانت عيانه بقالها فتره !!
بابا بيداري علي جريمتنا في حقها ..
ولما هو عارف انها عيانه ليه مافكرش يروح معاها لدكتور !!

ليه ما فكرش يقول لنا ويلمنا حواليها !!
بقيت مش طايقه اشوفه او اسمع مبرراته وكلامه ..
احنا ازاي بالقبح والقرف ده !!!
بنت وولدين شباب
و باباهم عايشين معاها في نفس البيت
وشايفينها رايحه جايه علي الدكاتره
وماحدش فكر مره يساعدها او يهتم بيها ..

اللي عرفته انها كان عندها اضطراب في حاجات في جسمها
وانها كانت محتاجه تتعالج
ومتابعه وان اجهزه جسمها اختلت وما حدش اسعفها .

ده حصل علي مدار شهور و اخد وقت طويل واحنا مش حاسين او مش مهتمين !!!

يا جماعه سيبوا الموبايل والبلاي استشن .
حسوا ببعض..
اهتموا بامهاتكم قبل ما تفقدوهم وانتوا مقصرين في حقهم ..

ماما سابتنا لشغلنا و مواعيدنا واصحابنا ومشيت ..
الدنيا وحشه قوي بعدها ..
والاوحش
احساسي قد ايه هي كانت بتتالم ومحتاجه رعايه وما لقيتهاش من اقرب الناس ليها ..
نفسي ترجع وتسامحني ..
نفسي ترجع واروح معاها للدكتور ..
واخد بالي منها ..
ماما ماتت ..
وانا باموت كل لحظه من الالم والحسره ..
سامحيني يا ماما….
وجع قلب والم وحسره

=================

إنتهت رسالة البنت …
زي ما انتهت حاجات كتير قوي في حياتنا …نسيناها واحنا ملهيين باللي بقى في ايدينا بيسرقنا من نفسنا ومن حياتنا
هو احنا بقينا أغراب عن بعض ليه
بقينا جزر منعزلة رغم كونها متجمعة في مكان واحد
ليه البيوت بقت برد
ليه بننسى عيلتنا الحقيقية وبندور مكانهم على اصحاب وعيلة افتراضية تملى مكانها
مليون سؤال وسؤال
كلنا بنسألهم لنفسنا
ومع اننا عارفين الإجابة إلا إننا بنتجاهلها
في نفس الوقت اللي بنستنكر الفعل …. بنعمله
فيه حاجة غلط في التركيبة
فيه خلل ولازم نلحق نفسنا
إنسانيتنا بتضيع مننا

ياترى حانلحق
والا حانموت واحنا بعاد عن بعض
بعاد عن القريبين وبنقرب اللي أصلا بعيد وماتربطناش بيهم صلات دم
سؤال
و مالوش جواب غير جوة كل واحد فينا
إلحق نفسك قبل ماتندم على اللي فات

فاتن نصر