عاوز تتشهر …وتبقي تريند ؟!! افعل هذه الأشياء فورا

عاوز تتشهر …وتبقي تريند ؟!!
افعل هذه الأشياء فورا

بقلم / د. سحر نوح
إذا كنت ترغب في الشهرة ويتحدث عنك كل الناس وتصبح تريند عليك فورا بفعل هذه الأشياء وستجد نفسك مشهورا جدا وبأسرع مما تتخيل .

إتجوز واتطلق واتطلق وإتجوز وإتخطب وفركش واطلع افضح واتكلم في أدق خصوصيات علاقتك الشخصيه وبيتك وسبب طلاقك وجوازك وعدم خلفتك واكدب وفبرك براحتك خالص وكتر م الفضايح علشان إلي جاي يقول للي رايح..
انزلنا ببوست فيه صوره ليك وانت في المستشفي وحاطط الكانيولا ونايم واكتب قدر الله وماشاء فعل …
انزلنا بصوره وانت لابس روب حمام غالي ماركه إستعدادا لنزول الجاكوزي في سويت اوتيل غالي جدااااااا في دوله عربيه شقيقه ….
انزلنا بفيديو وانت سايق عربيه رولز رويس مش مهم بتاعت مين وتشغل أغنية لقيت الطبطبه وماتنساش تكون لابس النضاره الشمس الماركه ولازم علامة الماركه تكون كبيره قد بطيخة فيلم لعبة الست كده
وانزلنا وانت في الجيم اوعي تنسي الجيم الله يخليك واهم فقره فقرة الاحبال والتريد ميل بس تكون متمكيج وعامل شعرك وعلي سنجة ١٠ ولابس لبس الرياضه الضيق قوي قوي واغمزلنا بعنيك

انزلنا وانت قاعد في طياره خاصه وقدامك كل انواع الفواكه وماحدش يبقي عارف من اين لك هذا ورايحه فين يا فاطمه وجايه منين يا فاطمه
انزلنا وإنت بتتعشي في مطعم غالي في بلد أجنبيه زي المالديف كده وماتنساش يكون جنبك قزازة ميه بيرييه
انزلنا وانت مجبس رجليك ولابس هوت شورت ونايم علي الارض وبتحرك رجليك هوبا فوق هوبا تحت واكتب الي مركز معايا يخف شويه بما انك اتحسدت وكدزه والعين صابتني ورب العرش نجاني وتحط رمز الكف والعين والإيموشن الحزين ابو دمعه
انزلنا وانت بتتكرم من مجلة ميكي ماوس أو نقابة العمبوريكي وبتستلم السلطانيه ودرع التكريم واشكر جمهورك وماما وبابا وطنت كريمه وإهدي التكريم لشعب مصر إلي ضد الكسر
عليك بقي وعلي دكتور الاسنان تعمل فينير وتخلي لون اسنانك لون سيراميك محلات عصير القصب
وبعدها نفخ شفايف علي ٣٠
وانفخ اي حاجه ممكن تتنفخ
ولو نحت برضه مافيش مشكله مش حايخسر خد من ده حط علي ده
والضوافر كل ضافر لون عاوزين نشوف بغبغان خليها باليتة الوان وزغللنا زغلل زغللنا
الرموش تكون زي المنشه
لون الشعر اصفريكا علي اورانجيكا وشوايتير ٤ متر العرض عرضين
كل ماتلبس طقم جديد اتصور قدام مراية الحمام ولف وشك وورينا جمالك من كل النواحي وماتنساش تحط ايدك في وسطك وانت ماسك الموبايل في الإيد التانيه وياريت مسحه خفيفه علي شعرك علشان الجمال الفتاك يبان وبوز البطه اوعي تنسي البوز ده مفعوله مفعول السحر
لما تلاقي بالصدفه في الاوتيل الغالي قوي قوي الي في الدوله العربيه الشقيقه اياها اي حد مشهور إجري بسرعه خد سيلفي معاه وابتسم وقرب منه قوي كإنكوا اصحاب الطفوله و العمر ونزل الصوره وحط قلوب وغمزه واكتب مع صديقي فلان
بعدها فبرك اشاعه بإحتمال ارتباطك بحد عالمي وماتخافش الناس بعد كام يوم حاتنسي بترند تاني
اطلع علينا في برامج اللت والعجن والنم واتكلم بقي وقد ماتقدر افضح نفسك وافضح طليقك او طليقتك بس ماتنساش تتنهد وتنزل بدمعتين واللانسيز حاتساعد وياريت كمان تحط ايدك علي عينك وتقول اسف مش قادر ممكن نخرج فاصل ..وسيب بقي الموسيقي التصويريه الحزينه في الخلفيه علي المخرج . ده علشان المصداقيه وكدزه
اصطنع خلافات طول الوقت وياريت مع الكبار واعمل بروباجندا حوالين نفسك حبة فضايح علي كام خناقه علي حادث وكتر من البهارات المهم اخبارك تبقي ترند حتي لو بيسبوك ويلعنوك المهم انك ع الساحه والناس تحفظ اسمك وتردده
لو عندك حد تقيل ساندك وبيصرف بقي خليه يشتريلك في اي قناه فضائيه من الي ماعندناش ترددها عدد ساعات تطلع فيهم هوا وعيش علي الناس دور النجم وان الي جالك البرنامج ده مش ضيف تحطه علي راسك لااااااا حاول تكون مستفز ومتعجرف وطريقة نطقك للحروف خليخا عجيبه علشان يبان انك مكمل تعليمك وواخد الإعداديه وياريت تطرده كمان وكله بفلوسك ياباشا ماهو الهوا هوانا ودايما يكون ردك علي اي نقد ..لو انا مش عاجبكم بتشوفوني ليه ترارارارا وكفايه احقاد وغيره من نجاحي
وكده كده انت حاتنزل برنامج علي يوتيوب وشاهد قبل الحذف
ولما تلاقي الناس زهقت منك انزل بقي بالتقيله وطلع علي نفسك اشاعة حادث اشاعة وفاه مرض خبيث غيبوبه شلل اطفال ليمباجو البس حجاب اقلع الحجاب ولع في نفسك نط من فوق الكوبري اي حاجه ندخل فيها الحلزونه بتاعت الصعبانيات
وبكده حاتفضل دايما ترند رقم واحد وكل الناس والجرايد حاتتكلم عنك بس عاوزه اقولك حاجه وامري لله انت كده بالنسبالي زي لعبة فقاقيع الصابون الي تبان فيها الوان الطيف وبتبقي منفوخه وكبيره لكن اول مابتنزل علي الارض لا بتبلها ولا بتسيب آثر …وربنا الشافي المعافي