إعداد وحوار: ريهام طارق
ساعات قليلة وتنطوي صفحة 2025، و نودع معها 365 يوم محملين بذكريات حب بدأ ونهايات كتبت.. عشنا فيها أيام مليانه بالفرح وأيام تانيه حزينة عشنا فيها لحظات انكسار، مرينا بمواقف حسينا فيها بالقوة وأوقات تانية واجهنا الخذلان والقسوة ، فقدنا فيها أعز الناس، ودخلت حياتنا ناس جديده أصبحوا ناس عزاز.
خلصت 2025، و خدت معاها ذكريات صعب ننساها، في كل قلب ذكرى عاشت فيه أغنيه… ارتبطت بتفاصيلها، و شاهد عليها.. 2025 كانت سنة استثنائية، اتقدم فيها عدد ضخم من الأعمال الموسيقية الناجحة وتركت بصمة قوية في المشهد الفني العربي.
وتكريما لهذه الأعمال المميزة نسلط في هذا الحوار، الضوء على عناوين الأغاني الأكثر تميزاً و نجاحا في 2025، و نحولها لدعوه دخول العالم الخاص لكل فنان لمع نجمه في 2025وكان له حضور خاص، وحقق نجاح كبير.
و حواري اليوم مع الشاعر الغنائي عبد الرحمن محمد.. حوار صريح و مختلف، فتح لنا فيه قلبه و كشف عن جانب جديد من شخصيته من حياته الخاصة، لم يكشف عنه من قبل..
في البداية نرحب بالشاعر عبد الرحمن محمد في جريده اسرار المشاهير ونشكره على إتاحة الفرصة لإجراء هذا الحوار:
مين اول حد فكرت فيه حالا و نفسك تعزمه على.. “العنب الساقع“؟
ولاد أخويا طبعا بيحبوا العنب الساقع زي عمهم.
بعدت عن مين في 2025 وبتقوله في نهايتها “كيفك علي فراقي“؟
لما ببعد عن حد مش بفكر كيفه ع فراقي عشان لو وصلت لمرحلة البعد بكون وصلت لنقطة انه مش فارق معايا.
أمتي تعبت في 2025 وقلت ده.. “هد حيل” ؟
انا على طول في هد حيل الحمد لله عشان بشتغل في أكثر من مجال بس إن الله لا يضيع أجر من أحسن عملا.
بتقول لمين أنت “حبيبي وابن حبيبي“؟
أخواتي حسام و أحمد و بسام.
تقول لمين.. “صاحبي يا صاحبي” أنت معايا في 2026؟
مش ٢٠٢٦ بس دول معايا بإذن الله طول العمر أصحاب المدرسة (شلة المقطم) أرجل و أجدع خلق الله ربنا يديمهم في حياتي.
فنان ودعنا في 2025 .. بتقوله.. “فعلا مبيتنييش“؟
صاحبي و أخويا الشاعر الغنائي أحمد علي موسى
تقول لمين في بداية .. 2026 “ميتعزش” وهتقفل بابك في وشه؟
مفيش حد الحمد لله وصلني للمرحلة دي و حتى الي وصلوني للمرحلة دي في يوم من الأيام ب اتعامل معاهم بتربيتي.
لو تم دعوتك لحضور.. “حفله تنكريه” تلبس اي شخصية من زمن الأبيض والأسود ؟
رشدي أباظة أو محمد فوزي الله يرحمهم.
شخص لما بتفتكر قلة أصله معاك في 2025 بتقول والله.. “عيونه عليا هدمع“؟
شخص واحد بس في حياتي قررت ابعد عنه في ٢٠٢٥ بسبب عطلني كتير اوي في شغلي ورغم ده مش بتمناله غير كل خير و أكيد مش هتمنى إن عيونه تدمع ربنا يسعده ولكن بعيد عني.
تقول لمين انت.. “سيد الناس” في 2025 وكل السنين إللي جايه؟
والدي رحمة الله عليه
مين في حياتك كان.. “ضل حيطة” في 2025؟
الحمد لله مش بمشي في ضل حد ابدا طول عمري ماشي بكرم ربنا و بمجهودي الشخصي.
مين اللي حلفت وقلت والله لاكون.. “عقدة حياته” في 2026؟
مفيش حد انا مش شخص انتقامي للدرجة دي .
مين هيكون في حياتك .. “رقم واحد” في 2026؟
أمي طول العمر مش بس ٢٠٢٦ ربنا يخليها ليا و يديها الصحة.
جه عليك وقت قولت في 2025 وقلت الوسط الفني.. “خذلني“؟
مفيش شك اكيد قلت ده ، بس الخذلان موجود في كل مكان للأسف مش بس في الوسط الفني.
امتى حسيت انك شايل.. “الشيله كامله” ؟
طول عمري برمي حمولي على ربنا و عمري ما شيلت حد شيلتي و لا حتى همي الحمد لله ربنا يديمها نعمة..
كام مره اتقال لك.. “اهدي” وأنت بتشتغل في 2025؟
على طول بسمعها و خصوصا من حبايبي عشان بدي شغلي معظم طاقتي.
تقول لمين كل كلامك في 2025 طلع.. “كلام فارغ”؟
هو فنان معروف دايما يصرح انه احسن واجمد واحد في الوسط و ناسي ان العظمة لله وهو سبحانه اللي بـ ايده يمنع المدد عن أي إنسان، و زي ما وهبه الموهبة في لحظة ممكن يمنعها عنه وهو على كل شئ قدير.. بتمنى له من كل قلبي أن ربنا يهديه لانه فعلا شاطر بس كلامه سبب انه يقلل من احترام فنانين لهم تاريخهم له وتخليهم يشوفوه صغير .
مين الشخص اللي بتقول لنفسك “مكرهتوش” بعد ما ودعته في 2025؟
واحد بس اللي اتكلمت عنه قبل كده هو نفسه مش عارف اني ودعته بس لكل مرحلة ناسها و ربنا يوفق الجميع.
مين اللي دخل حياتك في 2025 و حسيت.. “كأنه مجاش“؟
مافيش الحمد لله كل اللي دخلوا حياتي في ٢٠٢٥ ناس محترمة و جميلة و اتشرفت بيها زيك أنتي كده يا ريهام..
مين اكتر ناس اتعاملت معاهم في 2025 وكانوا ايقونه “الذوق العالي” ؟
اتعاملت مع ناس كتير محترمة جدآ منهم حبايبي الملحنين الكبار أحمد زعيم و محمدي و غيرهم كتير ناس على راسي موهبة و فن و ذوق.
مين اكتر شخص كان.. “بيستهبل” في حياتك 2025؟
مطربة كانت عايزاني أعملها غنوة بدون اجر مش بس كده كانت عايزاني اكلم لها ملحن و موزع عشان تبقى الغنوة كلها ببلاش خلينا نقول انه عشم زيادة عشان بيستهبل كلمة تقيلة شوية.
تقول لمين .. “تيجي نحارب” في 2026؟
بقولها دايما لـ عبد الرحمن محمد.
مع مين بتحس انك مطمن وبتقوله محتجالك.. “احكيلك خوفي” ؟
أمي و زوجتي.
شخص لو سألوك عنه في 2026 هتقول.. “معرفش حد بالاسم ده“؟
لا مش بقول كده بقول اعرفه و بقول عنه كله خير معنديش فجر في الخصومة الحمد لله.
تقول لمين في بداية 2026.. “تيجي نرجع“؟
بقولها لنفسي عايز ارجع اتعلم العزف على آلة موسيقية.
بتقول لمين في 2026 “قبلت التحدي“؟
بقولها لنفسي.. أنا بتحدي نفسي دايما في فكرة و مفردات و اللي شغالين معايا عارفين ده كويس الحمد لله.
نفسك تقول لمين.. “بدي اقول بحبك“في بداية 2026؟
زوجتي الحبيبة.
امتي صرخت بصوت عالي وقلت.. “خطفوني” في 2025؟
ولا مرة عشان صوتي واطي اغلب الوقت مش هعرف اصرخ.
مين.. “بابا” المجال؟
الهضبة عمرو دياب.
تصرف عملته في 2025 واعتبرته .. “خطيه“؟
الحمد لله محصلش قبل كده عشان مش باخد خطوة غير بعد تفكير و بعض الأوقات استخارة.
مين الشخص اللي بتقول له.. “بتمني انساك” وأنت بتقفل 2025؟
مفيش الحمد لله
مين زعل منك في 2025 وبتقوله “سوري” صافيه لبن قبل ما نبتدي 2026؟
على حد علمي مزعلتش حد مني و لو حصل بدون قصد مع أي حد يبقى حقه على راسي.
مين تقوله ومن داخل 2026 “الله يحنن” و هتقفل الباب في وشه ؟
الي بيرجع بفتح له الباب بس بشكل مختلف عن الاول عشان مفيش حاجة هترجع زي الأول للأسف.
مين شايفها Superwoman” 2025″؟
أمي و زوجتي
مين نفسك تشوفه قبل ما تنتهي 2025 وبتقوله.. “واحشني يا ابن اللذينا” ؟
ناس كتير و الله عشان بقالي كتير مشغول جدا و بعيد و مقصر مع ناس كتير بس ولاد اللذينة صحابي و عشرة العمر بإذن الله نتجمع قريب إن شاء الله.
مين في حياتك شايفها “ملكه جمال الكون“؟
أمي و زوجتي حبايب قلبي الغاليين.
كام مره قلت محتاج “دكتور” نفسي في 2025؟
و لا مرة الحمد لله ربنا يبعد عننا المرض النفسي.
رسالة تهديد هتبعتها لمين في 2026 تقوله صبرا.. “لينا ميعاد“؟
مفيش حد مش اسلوبي و لا تربيتي الحمد لله..
هتقول لمين في نهاية 2025 .. “خلونا نشوفكم تاني“؟
كل حبايبي دايما دعموني و بيحبوني من قلبهم
كام مره قلت في 2025 “الاحتياج وحش” ؟
مستورة دايما بفضل الله.
هتقول لمين وانت خارج من 2025.. “هوينا“؟
مفيش حد بس في ناس شرفونا.
امتي تشوف الست..”سلطانه“؟
الست المحبة الحنونة الواثقة في نفسها تبقى سلطانة مفيش شك
هترسم.. “احلى رسمه” لشخص واحد بس..مين ؟
أمي الغالية.
قلت.. “حب تاني” لا في 2025؟
محدش يقول للحب لا بس يارب كل الدنيا تحبني و الأهم يا رب ربنا يحبني.
ايه.. “الوعود” اللي وعدت بيها نفسك في بداية مشوارك الفني وحققتها، و إيه الوعد اللي دورة مجاش؟
الحمد لله حققت جزء كبير من وعودي لنفسي أهمهم اني محافظ علي مستوي شغلي اللي الناس تعودت عليه مني و لسه فيه كتير ما تحققش بدعي ربنا يوفقني إني احققه أن شاء الله قريب جدآ..
مين كان مستحيل يهون عليك في 2025 وبتقول له في 2026 اوعدك “عليا تهون” ؟
ببعد بهدوء من غير دوشة و محدش بيهون عليا عشان العشرة صعب تهون بس بقى فيه أولويات.
شخص صدمك في 2025 و خلاك تسأل “أنا تبيعني“؟
الحمد لله بطلت احط آمال كبيرة على أشخاص فـ مابقتش اتصدم.
“كلام عيب يتحكي“.. في 2026؟
الكلام لسه هيبدأ ان شاء الله في .٢٠٢٦
امتى حسيت انك محتاج صحابك واكتشفت ان .. “مفيش جدعنه خالص“؟
كلمة (صاحبي) بدأت احطها في مكانها الصح لان ببساطة اللي طلع مش جدع مينفعش اقول عليه صاحبي عشان كده الصحاب بقوا في حتة تانية لوحدهم.
“خبر عاجل”.. نفسك تعلن عنه خاص بحياتك الشخصية في بداية 2026؟
اشارك في عمل فني ضخم وناجح من كلماتي بصوت فضل شاكر وحمزة نمرة ومن كلماتي.. حلم مسيرة يتحقق .
“قرار شخصي“.. هتنفذه في بداية 2026؟
إعادة ترتيب الأوراق والأولويات ان شاء الله.
لو “لينا عمر“.. ايه أول حلم نفسك تحققه في 2026؟
نفسي اقوم بفريضه الحج بيت الله الحرام أن شاء الله.. خطوه اتاخرت كتير أوي.
في النهاية أشكر الشاعر الغنائي عبد الرحمن محمد علي هذا الحوار الأكثر من رائع علي وعد بحوار آخر مع نجم جديد ونجاحات جديدة مع ريهام طارق.
نبذة عن الكاتب:
ريهام طارق صحافية مصرية من أصول لبنانية، متخصصة في الأخبار الفنية والثقافية، أجرت حوارات صحفية مع كوكبة من أبرز نجوم الفن في الوطن العربي، تشغل حاليًا مساعد رئيس التحرير ورئيس قسم الفن بمؤسسة “اليوم للإعلام“، والتابعة للهيئة الوطنية للإعلام والتي تضم جريدة أسرار المشاهير، اليوم الدولي، اخبار مصر 24، وجريده تريندات العالم في جمهورية مصر العربية.
بدأت مسيرتها المهنية من المملكة العربية السعودية عبر جريدة {إبداع}، في الرياض قبل أن تنتقل للعمل في عدد من المؤسسات الإعلامية الكبرى في الوطن العربي، منها {جريدة الثائر و جريده المغرد} في لبنان، وجريدة {النهار} في المغرب، ومجلة {النهار} في العراق، ومجلة {المحور} في الكويت.
كتبت ريهام طارق أيضا مقالات تحليلية في مجالات السياسة الدولية وأسواق المال الأمريكية والأوروبية، كما تولت عضوية اللجنة الإعلامية في المهرجان القومي للمسرح المصري، وتقدم حاليًا محاضرات متخصصة في الصحافة في مسقط، سلطنة عمان.