عجبي.. بقلم/ غرام نعيم.

وعجبي عليك يازمن
من مر في الأوطان
فيك اللي ماله تمن
ويبات كسير حزنان
واللي مايدفع تمن
لو حتى كان غلطان
ده الفقر مش خذلان
ولا عار على الانسان
يعني عشان غلبان
نتهمه بالبلطجة ولا بالإدمان
مش كل من اتغنى
يعمل بقى سلطان
ما قارون بعد الغنى
أصبح في خبر كان
فيه ناس فلوسها كثير
وما بتعمل شيء للغير
لاعمرها فادت حد
ولا مدت إيدها بخير
وناس على قد حالها
ولغيرها فاتحة بيبانها
مش كل ساكن قصر
مفتوح له طاقة قدر
دي كلها ابتلاءات
ولكل ماض آت
فيا بنت الباشمهندس
ماتقولي كلام كويس
أو سيبي الناس في حالها
وكفاية كلام يضايق
اسكتي ولو دقايق
مابقاش فيه حد رايق
وعجبي عليك يازمن
بترقي فيك خلايق
وكثير للغلب دايق