ايام زمان في شبرا…ورمضان
كتبت
فاتن فتح الله نصر
=========
النهاردة فات أول يوم رمضان
في بيتنا في شبرا
كنا زي دلوقت وبعد الفطار والذي منه …. ندخل على المطبخ عشان نشطب المواعين
ونفضل من شبابيك المطبخ نرغي و تغلس على بعض …
واللي تلحق تجري على المطبخ الأول عشان تخلص قبل المية ماتقل او تنقطع
وبعدين نتجمع في اي شقة
نتفرج عالفوازير
وفي رمضان لما كان في الصيف
نتجمع على سطح البيت …وطنط تخرج التليفزيون في السطح
وكل شقة بقى تطلع باللي عندها
واحنا كبنات مالناش دعوة بالمامهات
احنا قاعدين قدام التليفزيون في اي شقة في البيت
والصبيان
في الشارع اللي بيبقى متنضف ومرشوش
وزينة رمضان منوراه
وطبعا في شبرا
ولا تفرق مين مسيحي ومين مسلم
كلنا في كل عيد معيدين
فين ايام اللمة الحلوة
وحلم العيلة اللي كان حقيقة
ودلوقت بقى حلم بنتمنى يرجع
الحلم ده بان اني مش لوحدي باحلم به
كل ولاد شبرا بيحلموا به
وافتكر انه حلم كل مصري عاش زمن الأصول
ده اللي بان مع جروب
مجرد جروب على موقع في العالم الافتراضي حاولنا فيه نرجع لواقع قديم
عمار يامصر
وشبرا عندي هي مصر
فاتن نصر
