على فكرة….. ازيهم (1)
كتبت
فاتن نصر
========
على فكرة ازيهم ….
كانت حلوة قوي الغنوة دي لمحمد قنديل
وعلى فكرة برضه أسأل نفسي دايما
ليه بعد ماكنا بنغني ونقول ونعيد وندعي في الأغاني زي مثلا إن شاء الله ما اعدمك
وحاجات جميلة كده
ايه اللي خلانا تحولنا وبقينا نتخانق في الغنا
قال تجديد قال
والأمثلة كتير اكتر من ذكرها هنا …. يكفي مثلا أغنية فيها تحرش رسمي
قال فنان قال يغني يقول هاتي بوسة يابت
أقسم بالله أول مرة سمعتها قلت انا اكيد سامعة حاجة غلط لازم اروح للدكتور يشوف الودان جرى فيها إيه
لو ركزنا شوية
حانلاقي ان كل ده مقصود
وياريت بتوع
هو انتوا كل حاجة تقولوا نظرية المؤامرة يركنوا على جنب …مش طالباهم خالص دلوقت
ولو بيفكروا حايفهموا
ان فعلا فيه مؤامرة وان إنكارهم لها جزء منها
الموضوع بدأ على طريقة خطوات الشيطان
واتبعناها سيرا
ثم هرولنا
ثم سابقنا الشيطان
وقلنا له كفاية عليك كده حبيب قلبي …معلش تعبناك معانا
عملت اللي عليك حانكمل مشوارك
وفعلا
ريح هو خالص
وشياطين الإنس مكملين
للمنكرين للمؤامرة التي سرنا فيها جميعا نياما
تذكروا شيء بسيط جدا
انت ماتقدرش تزق صخرة قوية وجامدة جدا ….
ولكن تقدر تسيب سرسوب مياه يتغلغل فيها …
مجرد سرسوب مياه لا حا يودي ولا يجيب
لكن حايفضل ماشي بانسياب جميل كده وصوت حلو جايز برضه لحد الصخرة ماتقع من نفسها
كل شيء وصلنا له بدأ في بلادنا من زمان
و احلوت الحكاية ومشينا ومشينا ومشينا وللأسف لسة ماشيين
فاكرين
زمااااااااااااااااااااااااااااااااااااااااان
كانت الصورة الذهنية لليهودي في العالم إيه ؟؟؟؟؟
فاكرين تاجر البندقية مثلا
والشكل اللي صوره لنا
لدرجة اننا واحنا أطفال مثلا كنا بنتخيلهم بشكل معين وأنف معووجة …وصوت أخنف
عملوا إيه الصهاينة ؟؟؟؟؟
ولا حاجة خالص …..
ببساطة شديدة تغلغلوا في صناعة السينما ….
تدريجيا سيطروا عليها …
وتدريجيا تحولت صورة اليهودي إلى إنسان راق متحضر وسيم جميل
والعربي إلى همجي شهواني يأتيهم لينفق ملايينه عليهم
وهم منه ساخرين
ونحن نبتسم سعداء
ثم تحولت صورة العربي
والمسلم حتى لو منهم في الغرب إلى إرهابي
وعلى فكرة برضه احنا ماسكتناش
آه ….
ماينفعش نسكت ونسيبهم يتعبوا نفسهم لوحدهم
ده احنا نافسناهم بقى
وتفوقنا عليهم كمان
و قلنا بقى احنا ملوك اآكشن
إوعى وشك
إحنا جايين اهو
وسع يلللللا
وعملنا من البلطجي بطل …وعملنا أفلام صور الدم فيها أكتر من صور الممثلين
وعشان نبقى مش متطرفين
خلوا المخدرات والدعارة في أفلامهم كأنها الطبيعي في الحياة في بلادنا
وأظهروا نموذج الطبقة الراقية انها طبقة ناسية الدين والمباديء عايشين في النوادي طول النهار وفي البارات ليلا
والنساء فيها لايلتزمن باحتشام بالعكس كله على احدث موضات عارية
وأظهروا الطبقة البسيطة أنها طبقة غارقة في الحشيش والنساء فيها مرتديات الطرح على رؤوسهن وبرغم هذا بيعملوا بلاوي الدنيا
وتفننوا في إبراز سوء على مختلف الطبقات
وللأسف
ييجي حد يتكلم يقول لك ده إبداع
إنتم إيش فهمكم انتم …. إنتم عاملين زي النعامة …
إحنا بنناقش المسكوت عنه … انتم أصلكم مش عايشين الواقع
قال مسكوت عنه قال
عايزين تنتقدوا …. انتقدوا العمل فنيا من حيث التكنيك
ماتحصروهوش في إطار ما اعرفش ايه
وأصلكم متخلفين يابتوع الوهابية والسلفية والملوخية
وشوية المصطلحات اللي تعودوا يهاجموها من غير مايفكروا أصلا مصدرها والا تاريخها
هم سمعوها كده
وخدوا مفهومها من أعوانهم ومعاونيهم على الطرف التاني النقيض لهم
آآآآآآآآآآآآآآآه
معلش أصلي نسيت اقول
إن جزء أساسي من المؤامرة يتجسد في تقسيم الأمة بين الدين واللا دين …
مجموعة تلعب وتشد الحبل من هنا …ومجموعة زيهم بالظبط في الاتجاه التاني تشد الحبل من هناك
وكل طرف يشد جامد بعِزم مافيه
لحد الحبل ماينقطع وتنفرط المجموعتين واللي بينهم ويقع الكل
وهكذا سقطت لويزا ….
آسفة
سقطت بلادنا في الخية بيد ولادها مدعي الإبداع والثقافة والفكر المتقدم
وغيرها من مفاهيم مظهرها جميل …
غلافها منتهى الشياكة ولكنها تحوي قاذورات الكون لتلقيها في بلادنا
وماذا نحن فاعلين ؟؟؟
أبدا ياجماعة….
والله مش مقصرين
نحن نشجب ونستنكر ونصرخ في وش بعض
ونطالب بالتغيير
بس اي حد تاني يتغير غيرنا
إحنا كده حلوين بالصلاة على النبي ….
اللهم صل عليك يانبي…وكل من له نبي يصلي عليه
وأصبح ديدن الأعلبية
إذهب أنت وربك فقاتلا إنا هاهنا قاعدون
وللحديث بقية إن كان في العمر بقية
=============
فاتن فتح الله نصر