علي الطيب لأسرار المشاهير: السوشيال ميديا سلاح ذو حدين..وفى ناس بتستخدم السوشيال ميديا بشكل خاطئ
علي الطيب لأسرار المشاهير: السوشيال ميديا سلاح ذو حدين..وفى ناس بتستخدم السوشيال ميديا بشكل خاطئ
حوار:سهام صلاح
ممثل مصرى ولد فى ٢٤ مارس حاصل على ادارة اعمال من جامعة ٦ اكتوبر اشتهر فى الفترة الاخير بشخصية هشام الاوفيشيال فى مسلسل الا انا وكانت بدايته فى عام ٢٠٠٤ عن طريق برنامج مسابقات للتمثيل والغناء يدعى نجم النجوم وحصل على المركز الاول وكان متسابق مصرى فى وسط متسابقين كثير من الوطن العربى وكان لجريدة أسرار المشاهير حوارًا ممتعاً مع الفنان علي الطيب
في البداية من قام بترشيحك لدور هشام فى مسلسل بالورقة والقلم؟
كان فى تواصل من شركة اروما لكن الظروف كانت مش بتسمح انى اشترك معاهم لغاية ماحصل انهم بيعملوا الموسم التانى وكلمونى وكان الاستاذ محمد بكير عمل المشروع من البداية وكلمنى وكان مصاب بكورونا بعد ماعملنا بروفات وصورنا اول يوم استلم المشروع المساعد الاول اسامة عرابى وهو اللى كمل المشروع وكان فى تواصل معاه كتير لانه فضل فترة التصوير فى الحجر الصحى والمشروع خرج للناس بالشكل اللى انتوا شوفتوه.
ما الذى جذبك لشخصية هشام؟
إنها شخصية جديدة عليا ومش شبهى تمامًا وانا كان بيستفزنى اكتر الاشخاص اللى معرفش هما بيقدموا ايه ونلاقى عندهم فولورز منعرفش هما فيك ولا حقيقيين ومش بيقدموا حاجة عكس الشباب اللى هى بتبدأ تقدم حاجات وبكون من الناس اللى بتابعهم وبتفرج عليهم بس اكتشفت ان الشخص اللى معندهوش حاجة يعملها او بيعرض طول الوقت وبيقعد يتمنظر اكتر هما دول اللى موجودين على الساحة بشكل كبير، ومشكلته انه ابوه سايبه ومن هو صغير وقابلت شخصيات كده كتير وشوفت قد ايه بيبقى عندهم حاجة مأثرة فيهم بشكل كبير وكان هيفرق فى وجود ابوهم اللى عايش فى حياتهم، عكس اللى عارفين ان ده واقع ان الوالد مثلاً توفى وكبروا وهو مش معاهم اى حد بيفقد ابوه او امه بيبقى عايش باحساس محدش هيحسه غير اللى مر بيه، ودى كانت شخصية بالنسبالى غريبة والتفاصيل اللى بينه وبين والدته غريبة اكتر من خلى بالك من زيزى لانه كان مرتبط بالشغل فى البلد عنده فى المنصورة ونزوله القاهرة ومش عارف ليه لغاية مالقى ان بنته هى الاهم ويصلح الموضوع ده وبعيدة عن شخصية هشام الاوفيشيال زى ماكان مسمينوه فى السكريبت.
من وجهة نظرك مالفرق بين الشخص المطيع لوالدته وبين من تقوم والدته بالغاء شخصيته وعن تحضيرك للدور؟
هو المفروض كلنا نبقى عندنا الموضوع ده بنطيع اهلنا على قد مانقدر طول الوقت ومهما حصل ربنا وصانا عليهم ومينفعش نعاملهم وحش او نعمل حاجة تغضب ربنا مننا او تغضبهم لان رضاهم الواحد بيتمناه طول الوقت، وبحاول طول الوقت بعد وفاة أبويا اللى فاضلى امى ان اكون تحت رجلها فى دى حاجة انا مش حضرتها بس الشخصية حضرتها بشكل مختلف، وان هشام معندوش شخصية قصاد والدته ممكن شخص ناجح وعنده تفاصيل كتير مش حلوة ومؤذية وفى نفس الوقت امه متعرفش ده وانها سبب من الأسباب اللى وصلته لده لانها لاغية شخصيته قصاد اى حد وهى اللى بتختارله وبتعمله ومش عايز يفقدها زى ماابوه سابه وفى النفس عنده مشاكله النفسية، وفى بنات كتير كتبت على السوشيال الميديا انا قابلت الشخصية دى وفى فرق بين إنك لازم تبقى مطيع لاهلك وانك تناقشهم بتخص شخصيتك بشكل يليق بالتعامل مع الأهل واتعلمنا ده من واحنا صغيرين والواحد لما بيكبر مع الوقت بيحاول انه يكسب رضاهم طول الوقت ويعمل اللى عليه معاهم.
كيف كان رد فعل الجمهور على شخصية هشام من ناحية ان والدته لاغية شخصيته من بسبب حبها له؟
رد فعل الناس كان فى مثلاً هتفصصى لجوزك السمك لما تتجوزى ولا لا او انتى متجوزة ولا لا فى اللى قال اه طبعًا انا بعمل كده مش محتاجة حد يقولى وفى حد قال لا طبعًا مايفصص لنفسه، فى حسب كل واحد ورد فعله الموضوع انتشر جامد جدًا وبقت الناس متضايقة من هشام وده اللى كان المفروض يحصل لان شخصية هشام كده وفى حياتنا سواء بنات او ولاد وفكرة انه الظاهر بيعمل حاجة وهو من الباطن بيعمل حاجات تانية بقى شبه الناس اللى هو كان متضايق منهم لما اتجسس عليهم ودى الناس كلها بدأت تتكلم بشكل كبير فى الموضوع ده على السوشيال ميديا ودى حاجة فرحتنا كلنا لانه احنا تعبنا وكنا مضغوطين جدًا فى الشغل.
ماهى وجهة نظرك فى ظاهرة الهاكر؟
بشوفه انه حاجة مش لذيذة ان محدش ليه الحق انه يتجسس على حد وده مذكور فى القرآن كلنا كأشخاص من حقنا ان فى حاجات شخصية محدش يعرفها غيرنا وده رأى فيه وكله لازم ياخد باله من حاجة زى دى واللى بيفكر يعمل كده يعرف انه بيعمل حاجة مؤذية جداً وحاجة مش صح وضد الأخلاق.
ماهى علاقتك بالسوشيال ميديا؟
أنا شخص عادى مش طول الوقت بحب أنزل حاجات عمال على بطال وانا مطلعتش لايف ولا مرة وده عكس شخصية هشام وفى نفس الوقت عندى اسرتى وبحب الحاجات دى تبقى حاجات شخصية إيه اللى ممكن الناس تعرفه وايه لا فى دى حاجة مش مصرح بيها لاى حد انه يتدخل فيها عكس هشام تمام، لو مثلاً فى صورة لذيذة ممكن تنزل لمناسبة او فيلم او مسلسل نازل او بقول لحد من صحابى على السوشيال ميديا كل سنة وانت طيب لان مش طول الوقت بعرف اشوف صحابى وبتبقى فرصة كويسة ان انا ابعتله او اكتبله زى زمان بيبعتوا لبعض كروت معايدة وبعتبر ده التطور بتاع المرحلة، والسوشيال ميديا مهمة وهى سلاح ذو حدين وفى نفس الوقت للأسف فى ناس بتستخدم السوشيال ميديا بشكل مش مظبوط كتير وده اللى حاولنا ننوه عنه جوا المسلسل عشان الاهالى تاخد بالها والبنات تاخد بالها والشباب تاخد بالها والموضوع بقى فيه نصب كتير واستخدام بشكل غير شرعى لحاجات كتير ويارب المسلسل يكون عرف يوصل حاجة الناس تستفيد منها
هل يوجد اعمال قادمة لك ؟
فى حاجات بقرأها مش هقدر اقول عنها دلوقتى، بشارك فى مسلسل غرفة ٢٠٧ عن رواية الراحل احمد خالد توفيق والسيناريو والحوار استاذ تامر ابراهيم واخراج استاذ تامر عشرى وبطولة محمد فراج صديقى وربنا يكرمه فيه ومشروع جديد عليه وان شاء الله يكون قده ويعمله بشكل جديد زى مامتعودين لفراج انا بشارك فى حلقة من الحلقات هو ١٠ حلقات منفصلة متصلة فى نفس الوقت كل احداثه بتدور عن الغرفة ٢٠٧ وكل حلقة مختلفة عن التانية وبشارك فى الحلقة بتاعتى مع مريم الخشت وفراج والاستاذ كامل الباشا والاستاذة ريهام عبد الغفور ومن انتاج فيلم فيكتورى وهيتعرض تبع mbc studios و يتعرض على شاهد.
التعليقات مغلقة.