عماد حمدي يكشف في حديث نادر كواليس ضربه للعندليب في الافلام

عماد حمدي يكشف في حديث نادر كواليس ضربه للعندليب في الافلام

الفنان عماد حمدي من فناني الزمن الجميل شارك مع العندليب الاسمر عبد الحليم حافظ في فيلمي الخطايا وأبي فوق الشجر، وفي حديث اذاعي نادر كشف الفنان الراحل كواليس القلم الشهير في فيلم الخطايا و كذلك في فيلم أبي فوق الشجر في نهاية احداث الفيلم

قلم حليم في الخطايا سبب لي كارثة

في بداية حديثه الاذاعي كشف الفنان الراحل عماد حمدي كواليس القلم الشهير الذي كان في فيلم الخطايا، فقال” في فيلم الخطايا كان المفروض اني اضرب عبد الحليم قلم في مشهد ماستر سين، وعبد الحليم كان زي أبني فقولت لحسن الامام مخرج الفيلم ازاي اضرب حليم مش معقول، اولا ميتحملش وميجليش قلب، فقالي لا ملكش دعوة أحنا هنعملها بطريقة فنية بحيث ميكنش ضرب حقيقي، وعبد الحليم قالي انت ملكش دعوة اضرب زي ما انت عايز،والقلم المشهور ده جابلي كارثة، لأن عبد الحليم كان محبوب جدا وخصوصا من الجنس اللطيف ازاي انا اضربه، ولما جه تصوير مشهد القلم مكنش جايلي قلب اضرب حليم القلم بجد فكنت بلمس خده وطبعا مخرج العمل كان بيعيد المشهد لحد ما ما اتعاد المشهد 11 مرة والقلم كان جامد لدرجة ان عبد الحليم نزف من شدة الضرب

ضرب حليم في فيلم ابي فوق الشجرة

وأكمل الفنان الراحل عماد حمدي حديثه حول كواليس ضربه العندليب الاسمر عبد الحليم حافظ في فيلم ابي فوق الشجرة حيث كان عماد حمدي يقوم في الفيلم بدور والده، فقال عماد حمدي ” جه الفيلم الثاني بتاع أبي فوق الشجرة، اتصورت نهاية الفيلم وكان لا يوجد ضرب خالص للعندليب، لكن رأي مخرج العمل حسين كمال ان النهاية ضعيفة فقرر يغير نهاية الفيلم، وقرر انه يقوم والد البطل بضربه عدة اقلام،فقولت للمخرج حسين كمال هو انا كل ما تجبوني امثل مع عبد الحليم لازم اطلع اضربه بالقلم، وهو عشان نجح فيلم الخطايا يبقي كل ما اجي مع حليم في فيلم لازم اضربه تفتكرو ده سبيل قالي المخرج حسين كمال دي ضرورة في احداث ، وفعلا لما تيجي اتفرج علي نهاية الفيلم تلاقي الاقلام اللي ضربتها لعبد الحليم في فيلم ابي فوق الشجرة مش دخيلة علي احداث الفيلم، اما عن طريقة ضرب الاقلام فالمخرج حسين كمال اخد المشهد بزاوية احترافية بحيث ان ايدي كانت كف بيلمس خد حليم ومع احترافية حليم في انه يلوح وشه مع اتجاه الضرب وصوت التركيب للضرب المشاهد يحس انه القلم حقيقي.

✍️ احمد علي