عمر طلعت زكريا يكشف لـ أسرار المشاهير عن كواليس دوره في حكاية “النظارة البيضا” وهذا ما قالة عن والده الفنان الراحل
عمر طلعت زكريا يكشف لـ أسرار المشاهير عن كواليس دوره في حكاية “النظارة البيضا” وهذا ما قالة عن والده الفنان الراحل
•شخصية أحمد موجودة كتير جدًا في مجتمعنا.
•أمير المصري وكارولين عزمي من أنقى وأطيب الشخصيات اللي ممكن الأنسان يتعامل معاهم.
•المسلسلات المنفصلة أعتقد أنها دخلت كل بيت وكل أسرة حبيتها.
•كنت اتمنى يكون والدي موجود دلوقتي لأن رأيه ونصيحته هي اللي كانت بتخليني أعرف أنا ماشي صح ولا لا.
حوار: مرهان حسام
هو فنان مصري ابن الفنان القدير الراحل طلعت زكريا، عمل في بداية حياته الفنية كمدير لموقع التصوير في عدد من الأفلام السينمائية، باﻹضافة إلى التمثيل على خشبة المسرح، وشارك في حكاية “النظارة البيضا” من مسلسل “نصيبي وقسمتك 4” بدور أحمد.
وكشف لـ جريدة أسرار المشاهير عن دوره في مسلسل “نصيبي وقسمتك 4″، “حكاية النظارة البيضا وعن كواليس العمل وإلى نص الحوار.
في البداية.. حدثنا عن كيف تم ترشيحك للدور؟
تم ترشيحي عن طريق المنتج أحمد عبد العاطي والمؤلف عمرو محمود ياسين والمخرج عصام نصار.
كيف كانت استعدادك لشخصية “أحمد” ؟
شخصية “أحمد” موجودة كتير جدًا في مجتمعنا، وخصوصًا اللي بيكون متجوز وبيحب واحدة تانية، وبيكدب وفاكر أن الكدب ده صح مع أنه للأسف بيدمر بيوت وأسر، كان من السهل أني العب شخصية “أحمد”، والحمدلله اللي شوفته على السوشيال ميديا أكدلي إني عملت الدور كويس، لأن رد فعل الناس أنها كرهت “أحمد” لأنه عايز يفضح نور بس في الآخر، الحمدلله نور ظهرت على حقيقتها والناس حبت “أحمد” شوية وقالوا إنه كان معاه حق، والمخرج الأستاذ عصام نصار ساعدني كتير جدًا في الشخصية دي وبوجه الشكر ليه ولكل كاست العمل.
حدثنا عن تجربتك مع الفنان أمير المصري والفنانة كارولين عزمي؟
أمير المصري وكارولين عزمي من أنقى وأطيب الشخصيات اللي ممكن الأنسان يتعامل معاهم من أول الأستقبال لحد ما خلصت دوري ترحيب كبير بيا، لأنهم ممثلين حاليًا محترفين وكنا سعداء جدًا بالتمثيل مع بعض، واتكلمنا كتير جدًا أكتر ما مثلنا لأن مهم جدًا ترتاح للممثل اللي قدامك عشان تعرف تمثل وانت مرتاح، وده عنصر مهم ومسؤول عن نجاح العمل وبحب أوجه التحية ليهم تاني لأني بحبهم جدًا.
كيف كانت كواليس العمل؟
بما أني مدير إنتاج قابلت معظم الكاست اللي سبق واشتغلنا مع بعض قبل كده وعلى رأسهم الأستاذ وليد الحسيني مدير إدارة الإنتاج، كان سبق واشتغلنا مع بعض في مسلسل “المرافعة”، كان من السهل أن الكواليس تكون خفيفة وجميلة لأني بحب ورا الكاميرا جدًا، وكل جندي مجهول بيكون ورا الكاميرا، كنت عارف الناس والناس عارفاني الحمدلله وكانت كواليس أكثر من رائعة وأتمنى تتكرر تاني.
ما رأيك في المسلسلات ذات “القصص المنفصلة”؟
المسلسلات المنفصلة أعتقد أنها دخلت كل بيت وكل أسرة حبيتها لأنها بتتناول مواضيع مختلفة دايمًا، ومش جديد على الأستاذ المنتج أحمد عبد العاطي إنه يقدم النوعية دي من المسلسلات اللي ممكن اي أسرة واي أعمار ممكن تشوفها وتتابعها، وده اللي حسيته من خلال “النضارة البيضا”، الناس كانت طالبة حلقات تانية وأنها لسه لم تشبع من القصة وأد إيه كان في تعاطف مع المسلسل، ومع أبطاله فاعتقد الـ ٥ حلقات أو الـ ١٠ حلقات هي القادمة وبقوة بإستثناء شهر رمضان الكريم التجربة بتكون مختلفة لكن بعد وقبل رمضان أعتقد أنها هتستمر وتنجح وبشدة.
وجه رسالة لوالدك الراحل الفنان القدير طلعت زكريا؟
كنت اتمنى يكون والدي موجود دلوقتي لأن رأيه ونصيحته هي اللي كانت بتخليني أعرف أنا ماشي صح ولا لا، حابب أقوله اللي أتعلمته منك كان كتير وخلاني لحد اللحظة دي مكمل عايزك تكون مطمن ومرتاح يا حبيبي وعايز أشكرك على كل حاجة حلوة عملتها علشاني واللي وصلتني ليه دلوقتي، بدعيلك وهفضل أدعيلك وكل لما بشوف حد حتى ماشي في الشارع بطلب منه يدعيلك لنا لقاء يا صديقي في الجنة بإذن الله، عايش في خيرك وبسيرتك الطيبة يا طيب الذكر أدعوله أمانة.
وختم الفنان الشاب عمر طلعت زكريا الحوار بتوجيه الشكر لجريدة أسرار المشاهير
إقرأ أيضًا
عمرو عبدالعزيز لـ أسرار المشاهير: تريند شيماء أين محتواه!..و الرجل الرابع شلة عتاولة كوميدية
خالد سرحان لـ أسرار المشاهير :لم أندم على أي دور قدمته من قبل
دينا فؤاد لـ أسرار المشاهير : شخصية مروة تشبه ستات كتير.. وهذا رأيي في كيفية تخلص الأزواج من الملل والفتور
التعليقات مغلقة.