عملي كموظفة حكومية سبب في نجاح مسلسل [ بالطو ]
أجري الحوار : عمر آدم
إعداد صحفي : نورهان هاني ، رحمة حسين
لمشاهدة الحوار فيديو 👇🏻👇🏻
https://fb.watch/jRzhnPfuZ1/?mibextid=Nif5oz
إيه سر حب حضرتك للتمثيل ؟
أنا بصراحه معرفش إيه سر حبي للتمثيل أنا أكتشفت الحكايه دي بدري أوي عن طريق قعدتي مع صحابي و عيلتي و بدأ يحصل تعليقات على كلامي أو أنا أقلد ممثل ؛ التمثيل بالنسبالي علاج نفسي يعني لو ممثلتش ممكن يجيلي إكتئاب .
حضرتك بدأتي تمثيل من أمتي ؟
أنا الحقيقة بمثل من زمان أوي من و أنا طفله من أيام المدارس و الجامعة و إعتمدت في إذاعة إسكندرية سنة 1976 و أنا لسه طالبة في الجامعة و بعد كده إنضميت لفرقة إسكندرية للمسرح و من وقتها و أنا بشتغل و كمان قعدت 30 سنة بشتغل مسرح قبل ما أنتقل إلى القاهرة .
حابين نرجع بالزمن لورا مع الفنانة عارفة عبد الرسول الي كان حلمها و شغفها دايما التمثيل لكن الظروف مسمحتش لكن ده مقللش من إيمانها أبداً و أملها في إنها في يوم هتحققه كلمينا أكتر أستاذه عارفة عن سر الحب ده للتمثيل ؟
حكايات بنت البقال عمرها ما كانت أولى أعمالي أنا بقالي 30 سنة بمثل مسرح في إسكندرية و مثلت كتير جداً و خدت جوايز من ٣ محافظين في إسكندرية ، أنا جيت القاهره من حوالي 15 سنة فا يعتبر جديدة على مجتمع القاهرة لأن إسكندرية برضه إقليم ؛ حكايات بنت البقال زوجي الفنان مصطفى درويش كان مؤيد الفكره جداً و قالي أعملها و كنت بقوله هنعملها إزاي و هينفع و قالي أه دي حكاياتك و لذيذة و إحنا بنحب نسمعها فا خلي الجمهور يشاركنا و نشوف .
شخصية مس ” كوثر ” كانت شخصية حازمة و مش بتحب التهاون في الشغل ابدا حابب اسمع رأي حضرتك الشخصي فيها هل حزمها ده شئ ايجابي لصالح الشغل ولا كانت ممكن تكون مرنه اكتر من كده مع الممرضين ؟
شخصية كوثر في البالطو لما أتعرضت عليا و بدأت أقرأها حسيت إنها قريبه مني جداً مكنتش محتاجة إستعداد و بحث كتير لأن أنا شبه كوثر جداً ؛ أنا كنت في وظيفة حكومية و كنت شديدة و حازمه و هي موظفه عندها ضمير فا كنت حاسه إنها جوايا ف مكنتش محتاجه تحضيرات كبيرة أوي ، و اللي جذبني في دور كوثر إنها موجوده وسطنا في كل المصالح الحكومية موجوده كا جاره ، كا زميله ، هي شخصية شبهنا و عايشه بينا ، أنا شايفه إن الحزم في شخصية كوثر كان ضروري أوي و خاصة إن معظم المصالح الحكوميه إن فيها بعض من التسيب بيحصل .
أستاذه عارفه حضرتك ابتديتي مشوار حضرتك الفني من خشبة المسرح مع أولي أعمال حضرتك الي حققت نجاح كبير و هي ” حكايات بنت البقال ” كلمينا أكتر عن إزاي جت فكرة العرض المسرحي ده ؟
عملنا الجزء الأول من حكايات بنت البقال كانت إعداد و إخراج الفنان [ مصطفي درويش ] و طبعاً هو مكنش أول عرض مسرحي أنا ليا تاريخ في المسرح و لاقت إقبال كبير جداً و بعدين عملنا الجزء التاني و التالت و الرابع و سافرنا لفينا بيها العالم تقريبا و روحنا جنوب إفريقيا و فرنسا و ألمانيا و الأردن و لبنان و تونس و الجزائر .
حضرتك تألقتي في أدوار مختلفة كتير جداً الفنانة عارفه عبد الرسول تحب تحب تقدم إيه تاني للجمهور أو نفسها تعمل دور عن إيه ؟
أنا نفسي أعمل أدوار غير مألوفة يعني آه صح سني أُم بس ممكن أبقي يعني في مكانٍ ما مؤثره يعني دكتورة كبيرة ، جراحة كبيرة ، عالمة مثلا بتكتشف حاجة و بيحاولو يموتوها ، رقاصة تايبة مثلاً ، مجنونة ، مدمنة ، يعني نفسي أعمل حاجات كده مش مألوفة بالنسبة لسني يعني .
إحكيلنا أكتر عن مشاركتك في مسلسل ” الأجهر ” الي بيتعرض حالياً في رمضان ؟
مسلسل الأجهر أنا عرضو عليا الدور و كان رشحني الفنان [ عمرو سعد ] للدور و الشركة المنتجة كانو متمسكين بيا جداً فلما قريت لقيته دور ممتع أوي و في كمية إنسانية و تصوف كده جميل و حب لله و حب للبني آدم يعني لطيف الدور أوي و إنساني جداً .
كلمينا أكتر عن دورك في مسلسل ” بابا المجال ” و تألقك في دور الصعيديه و عن كواليس المسلسل ؟
مسلسل بابا المجال أنا عاملة دور صعيدية متشددة و جاية عايشة في الحاره المصرية كل الناس بتتكلم عادي هي الوحيده إللي بتتكلم صعيدي و جاية ورا واحد عايزة تاخد بالتار منه هي صعيدية قديمة، يعني فاتها الزمن خلاص ، الكواليس بقي مقولكش أنا أول مرة أتعرف علي الفنانة [ سهر الصايغ ] ، و الفنان [ مصطفي شعبان ] و الحقيقة إحنا تآلفنا بشكل جميل جدا و بقي فيه بينا حب و جو عائلي كده لطيف يعني مفيش حاجه كانت منغصة علينا في الكواليس بالعكس إحنا كلنا كنا عايشين الحالة .
كلمينا أكتر عن مشاركتك في فيلم ” 1919 ” و عن كواليسه ؟
فيلم ١٩١٩ أو كيرة و الجن هي تجربة و عدت من زمان يعني ، فنا مش قادرة أفتكر أوي ؛ لأنه الفيلم إتعمل علي تلات سنين أنا كل كام شهر يقولولي تعالي إعملي مشهد فا أنا يعني مش عارفة أحكيلك عن كواليسه ؛ لأني ملحقتش هو بس كل مشاهدي كانت مع الفنان [ كريم عبد العزيز ] ، و الفنان كريم عبد العزيز غني عن التعريف في جماله ، و أدبه ، و ذوقه ، و تعامله معايا بشكل إنساني جميل ، و كان بيعاملني فعلاً علي إني أمه في الفيلم ، و كمان المخرج [ مروان حامد ] كانت أول مره أشتغل معاه و كان لطيف جداً معايا وفيه ليه إبتسامة جميلة كده لما أحس إن المشهد حلو و دخل دماغه ، له إبتسامة حلوه كده فا أنا كنت سعيدة جداً .
كلمينا عن أعمالك الفترة الجيه ؟
أنا لسه مفيش حاجه الفترة إللي جاية غير إن بس فيه مسلسلين إتصورو و خلصناهم و لسه متعرضوش مسلسل [ روز و ليلي ] مع الفنانة [ يسرا ] و الفنانة [ نيللي كريم ] ، و مسلسل [ سيب و أنا سيب ] مع الفنان [ أحمد السعدني ] و [ هنا الزاهد ] ، و من إخراج الفنان [ وائل إحسان ] و يارب يعجبكو إن شاء الله .
