كل ده حصل فى عيد ميلادى

بقلم: رانيا كمال العربى

يوم الميلاد يعنى اليوم اللى سيادتك شرفت فيه للدنيا وانستنا فيه بعياطك وزنك وطلباتك، فلازم اليوم ده يكون يوم مميز اوى ومش عادى،
زمان وانا صغيرة كنت بفرح اوى اليوم ده واستنى الهدايا بلهفة ، ولما كبرت بقيت بحس فى اليوم ده
ان انا بكبر وبالذات لما يوم ميلادك يكون مرتبط بحدث مهم زى وفاة الرئيس الراحل السادات اللى مات يوم سبوعى،و تلاقيهم بيقولوا عمرك كل شوية بكل بساطة على شاشة التلفزيون !!
الذكرى الثلاثون لاغتيال الرئيس
الذكرى الخامسة والثلاثون لاغتيال الرئيس
الذكرى السابعة والثلاثون…….
الذكرررررررى ال………😁😁
ياجماعه ده مات يوم سبوعى مش يوم عيد ميلادى تفرق على فكرة، يعنى مش نفس العمر بالضبط😁😁
وبقيت ابص فى عيونهم وانا باطفى الشمع احس كانهم بيطلعوا لى لسانهم، مش ناقص غير انهم يشغلوا لى اغانى وطنيه عشان الفرحة تكمل😂 اومال لو كنت اتولدت يوم حرب الاستنزاف كنتوا هتعملوا ايه؟؟ تورتة عليها علم مصر 🇪🇬
ولقيت صحبتى اللى عايشة فى المانيا بتقولى ان عيد ميلادى نفس يوم عيد الاتحاد فى المانيا،
كويس لقيت مناسبه تانية فيها فرحة وبهججة شوية
ودخلت على جوجل اشوف اللى حصل فى مثل هذا اليوم😁 لقيت:

_ إيطاليا تهجم على إثيوبيا بأمر من بينيتو موسوليني.

_ أدولف هتلر يعلن هزيمة الاتحاد السوفيتي في الحرب العالمية الثانية.

_ظهور أول صاروخ باليستي ألماني
اكتشاف اليورانيوم في الكونغو برازافيل.

_تفجير أول قنبلة ذرية بريطانية تجاه ساحل أستراليا.

_ اعتقال رئيسة وزراء الهند أنديرا غاندي بتهمة الفساد المالي.

بصراحه احداث كلها جميلة ومبهجة وتشرح القلب الحزين بس برضه مش هيفرق معايا وهغنى ياللا حالا بالا، و كل سنة وانا طيبة يامصر .