عُمر الأنبيا….بقلم الشاعرة/إنتصار حسين

عُمر الأنبيا….بقلم الشاعرة/إنتصار حسين
…..
عُمر الأنبيا كان ألف عام
من لدن أدم
لنوح عليهم السلام
عاش ألف عام ..إلا خمسين
ومابين خمسين وستين
دي أعوامنا…
لا مِتعظِين ولا حاسين
باللي يجرالنا
سايبينها تودينا تمرجحنا
تطوحنا شمال ويمين
ومين يسعفنا.. ينجدنا
وهي حياتنا يادوب سنين
سنين توهة
سنين دوخة
ولاعارفين
ليه قاعدين
في بلونة منفوخة
يرجُّونا شمال ويمين
تِعب العضم واتكسَّر
ولسة الحِلم ما اتفسَّر
مستنيين .. يلعب
زَهرنا ونكسب
وفاكرين كده هنغلب.
ولا داريين..
ودنيتنا يادوب ساعتين
سايبينها تلعب بينا
وباصين هناك.. باعْدِين

وقدامنا بيتجهز
خط الرجعة للسابقين
ولاحاسين..
ولا شايفين …
وعيونا مِتغميين..
وايدينا بيها متكتفين..
ولا منها مِكتِفيين
وساكتين..
نقول هتحِن هي علينا
وصابرين…
يجوز تلف نظرها لينا
وراضيين…
باللي يلهينا..
طب وبعدين؟
إيه آخرت ظلمها لينا
إيه آخرت صبرنا عليها
ليه واقفين ..متسمرين
ليه فاكرينها بعد سنين
هترضَى مرة وتدينا
وطول العمر تاخد منا
وعمرها مابِقيِت علينا
ولا هتقول لينا ااامين
ده العمر فاضل منه يومين
لاهو عمر أدم عليه السلام
ولا نوح .ألف إلا خمسين
عمرنا يادوب ايام
تتعد ع الإيدين
ولا خايفين .
نتفاجئ بسفرنا
ولا ضامنين
ايه آخرت مشوارنا
ياريت الوقت يسعفنا
وعنها ياريته يوقفنا
ولانفضل في بلونة منفوخة
ترج فينا شمال ويمين
ونطلع مرة م الدوخة
كفايانا بقى.. سنين دايخين