فخ الدنيا بقلم ربيع عبد الحكيم

فخ الدنيا
التغير بيحتاج عزيمه واراده وخطه وصبر وقوة تحمل وده الطبيعي لما بنحتاج اننا نتغير للاحسن لكن في نوع من التغير بيحصل تلقائي وبالتدريج مبنحسش بيه لكن بنعرفه لما بيظهر فتعاملتنا مع نفسنا واللي حولينا ..والتغير ده فالحقيقه بيكون نتيجة تاثير الدنيا فينا من صدمات وخبطات بتضعفنا وتهلكنا وده بيزيد لو وجع الدنيا جه من اقرب الناس لينا زي الاهل والصحاب والحبيب وفجأه بنتحول بالتدريج لشخص مؤذي وفاقد الثقه في كل اللي حوليه ..النوع ده من التغير بيكون الفخ اللي الدنيا مخبياه لينا عشان تكسرنا بيه وتهزمنا ومتقملناش قومه بعدها ..فلو انت اتاذيت من حد حبيته ومقدرش او اهل اذوك وحطموك او صحاب كسروك ومكنوش سند ليك وكانت النتيجه انك تبقى مؤذي وتعامل بالمثل فانت اطبعت بطبعهم ووقعت فالفخ اللي الدنيا نصبتهولك ..كنت اعرف واحد حياته كويسة جدا وشاف بنت حبته وحبها جدا لدرجة انه بنى كل احلامه على اساس حبهم ده ولما في يوم طلب يتقدملها رفضت تحت مبرر انها مش قد المسؤلية وبعد ايام سمع انها اتجوزت وده اثر عليه واصابه باكتئاب شديد خلاه يسيب شغله ومستقبله وبقى مريض نفسيا … كان في بنت كل اللي يشوفها يقول ان مفيش حاجه ابدا تهدها وكانت بتعشق التعليم ورغم ان الدنيا كانت بتديها كل ضربة وضربة اسواء من اللي قبلها الا انها ماكنتش بتستسلم وتعبت فدراستها وكل اللي حوليها شجعوها انهم هيقفو جمبها ويخلوها تستمر في تعليمها وبعد ماتعبت الكل اتخلى عنها وبدون مبررات واتحولت البنوتة الجميلة المضحكة القويه لبنت بهتانه مطفية مش قادرة تنطق وبالتدريج القسوة دخلت قلبها كانها نار كلت كل اللي قدامها بدون حساب ..
العشم قاتل والتغير المفاجئ صعب بس النوع الكويس من التغير بيبقى اختيار ولو انت مجبور على تغير شئ اصنع اختيار لنفسك واختار التغير الصح
الدنيا مش بتتحدى قوة ضربك ليها ،الدنيا بتتحدى قوة استمرارك وتحملك …لازم تنجح ولازم تستوعب اللي انت فيه وتنمي مهاراتك ومتخليش حد مهما كان قاسي يلوثك بقسوته ..صدقني النجاح بس هو اللي هيبرد نارك أما طارك فسيبه للايام ..الدنيا دواره وده الشئ الحلو فيها
وقول دايما” ‏اللهم لا تحوجنا للقاسية قلوبهم ولا تجعلنا نقسوا على من يلجأ إلينا ، وارزقنا يا الله النسيان فيما لا نطيق تحمله”
اوعى تقع فالفخ ياصديقي..اتمنالكم مستقبل وتغير يفرح وينشر البهجه فالعالم💗
ربيع عبد الحكيم
….